Yatiykasax kunjamatsa maynit maynikam chʼamañchasipxsna
1 “Mä suma aruxa horasana arsutaxa” taqinitakiw chʼamañchkirixa (Pro. 25:11). Yatiyir sarktan ukhax maynit maynir chʼamañchtʼasiñatakixa, ¿kuna tuqinakatsa parlañasäspa?
2 Chʼamañchkir arunakar. Yatiyir sarkasax Dios tuqit parltʼasipxañänixa arunakasax wali chʼamañchkirïniwa (Sal. 37:30). Sañäni, kuna arunakamp parltʼañsa wakichtʼasiniwaytan uka tuqitwa parltʼasma jan ukax yatiyir mistkasax kuna askinakasa pastam uka tuqitwa chʼamachtʼañataki parltʼarakisma (Hech. 15:3). Ukat Bibliat sapak liytʼasasa, jichhak purinki uka revistanak liytʼasasa, ukhamarak tantachäwinakansa, ¿kuna askinaksa apstanxa? ¿Janit uka tuqit parltʼañax askïkaspa? Tantachasiñ Utan taqinitak arstʼäwin arstʼaski ukanakatsa parltʼaraksnawa.
3 Utat uta yatiykasax utanin arsutaparux jan kuns sañs yatksna ukhaxa llakissnawa. Ukampisa, yaqha utar janïr sarkasaxa jilatasampi jan ukax kullakasampi Razonamiento sat librot mä jukʼa uñakiptʼañaw wakisispa, ukat jutïrin ukham pasaspa ukhax sum parltʼañataki. Mä tuqitxa, wali suma arunakamp parltʼchi ukhax sumpun yatiytax sasin chʼamañchtʼañax askipunïniwa.
4 Jumaw qalltañama. ¿Librot yatiqañataki uka jiskʼa taman tantachasipki uka jilat kullakanakasampix taqimpit yatiyir misttanxa? “Maynit mayniru yanaptʼasiñataki[xa]” jan jiwasampi yatiyir mistki uka jilat kullakanakasampiw mistuñasa (Rom. 1:12). Sinti alwasa jan ukax jaypʼusa jukʼanikiw yatiyir mistupxi ukat precursor regularanakasa ukhamarak auxiliaranakas wal yuspärapxaspa jupanakamp chika yatiyir sarsna ukhaxa. ¿Usurnukstatäsincha mä yatiyirix jan yatiyir mistxi? Ukhamächi ukhaxa, yatiqirinakasan ukaru Bibliat yatichir jupamp chika sarasawa jupanakar yanaptʼsnaxa (Pro. 27:17).
5 Taqi kunan ukham suma arunakampi chʼamañchasiñax wali askipunïspawa. Ukhamasti yatiyir sarasaxa, janipun ukham lurañxa armasiñäniti, ‘ukhamatwa maynit maynikama chʼamañchasipxañäni’ (1 Tes. 5:11).