Yatiyir sarkasajj yanaptʼasipjjañasawa
1. Jilatampi jan ukajj kullakampi yatiykasajja, ¿kunsa apóstol Pablot yateqassna?
1 Apóstol Pablojj jilat kullakanakampi yatiykasajja, ‘maynit maynikam yanaptʼasiñatakiw’ chʼamachasïna (Rom. 1:12). Jiwasajj jilatampi jan ukajj kullakampi yatiykasajja, ¿ukhamarakit maynit maynikam yanaptʼastanjja ukat chʼamañchtʼasiraktanjja? Yatiykasajj amukïñat sipansa, kunas sum yatiyañasatak yanaptʼawayistu ukanakat parltʼasiñajj wali askïspawa.
2. Jan ajjsarayasis yatiyapjjañapatakejj ¿kunjamanakatsa jilat kullakanakar yanaptʼsna?
2 Jan ajjsarayasiñapatakiw yanaptʼañasa. Yatiyir jilat kullakanakat yaqhepajja, janis wakichtʼatäkaspa ukham amuyasisaw ajjsarayasipjje, ukat ukajj parlatapansa, uñnaqapansa qhanaw amuyasi. Jupanakar ‘¡Walikpun ukham chʼamachastajja!’ sasin taqe chuyma sañäni ukhajja, jan ajjsarayasis parlañapatakiw yanaptʼsna. ¿Kunanakas yanaptʼarakispa? Tamanak tumptʼir mä jilatajja, yatiyir masinakaparojj akham sañ yati: ‘Yatiykasajj nayajj ajjsarayasiraktwa, ukatwa jan ajjsarañatakejj Jehová Diosan yanaptʼap mayisipunta’ sasa. Mä jilatajj akham sarakiwa: “Jan ajjsarayasiñatakejja, kusisit uñkattʼañajj wali askiwa. Ukampis nayajj Jehová Diosar jan mayiskta ukhajja, ajjsarayasisajj janiw kusisit uñkattʼirjamäkti” sasa. ¿Kunas jan ajjsarayasis yatiyañatak yanaptʼawayistu? ¿Janit ukanakat jilatampi jan ukajj kullakampi yatiykasajj parltʼañ wakiskaspa?
3. ¿Kunanakatsa yatiyir masisampejj parltʼassna?
3 Kunas yanaptʼawayistu ukanakatwa parltʼañasa. Jaqenakampi sum parlañatakejja, ¿kuna jisktʼampis parlañ qalltta jan ukajj kuna toqetsa parlañ qalltta? Yatiyañatak yanaptʼanak utjki ukarjam pachpa arunakamampi qhanañchtʼasajj ¿kuna askinaksa jikjjatawayta? Jilatampi jan ukajj kullakampi yatiykasajj ukanakat parltʼañajj wali askïspawa (Pro. 27:17). Ukat yatiyir masimampi Bibliat yateqañ munapki ukanakar wasitat visittʼir sarkasajja, kun lurañsa amtta ukat kunjamsa uk phoqäta ukanakatwa jupar parltʼasma. Ukat Bibliat yateqerir yatichañ tukuyasin sarjjasajja, kunatsa uka yatichäwita jan ukajj Biblian uka jiskʼa tʼaqapat qhanañchtʼta jan ukajj kunatsa ukham yatichta ukanakatwa parltʼarakisma.
4. ¿Kunatsa yatiyir masinakasar yanaptʼañatak chʼamachasiñasa?
4 Nayrïr cristianonakajja, janiw yatiyapkäna ukanakar yanaptʼañatakik chʼamachasipkänti, jan ukasti jupanak puras chʼamañchtʼasipjjarakïnwa (Hech. 11:23; 15:32). Ukatwa apóstol Pablojj Timoteo waynarojj suma wakichtʼatäñapatak yanaptʼäna ukat kuntï yateqkäna uk yaqhanakar yatichañapatakiw chʼamañchtʼarakïna (2 Tim. 2:2). Kuntï yateqktan uk jilat kullakanakar yatichañäni ukhajja, jupanakarojj kusisita ukat sum yatiyapjjañapatakiw yanaptʼañäni, ukat Jehová Diosarus kusisiyarakiñäniwa (Heb. 13:15, 16).