Jisktʼäwinaka

◼ ¿Walïskaspati Jehová Diosan mä Qhanañchiripax kʼari yupaychäwin apnaqat hospitalansa jan ukax chuymankipstatanakar uñjañ utansa uñjayasiñapaxa?

Walja kʼari yupaychäwinakawa chuymankipstatanakar uñjañ utanaksa hospitalanaksa apnaqapxi, ukampisa janiw kʼari yatichäwinakapa chʼamañchañataki uttʼayapkiti (Apo. 18:2, 4). Jan ukasti, qullq apthapiñatakikiw uttʼayata. Jichhürunxa, yaqhip hospitalanakaxa kʼari yupaychäwin uttʼayatäkchisa suti mayak apapxi, ukampis yaqhipanakanxa uka yupaychäwin irpirinakaparakiw irnaqasipki.

Sapa mayniw kʼari yupaychäwin apnaqat hospitalansa jan ukaxa chuymankipstatanakar uñjañ utansa uñjayasinit janich uk amtañapaxa. Maynix chuymaparjamax uñjayasiñ amtaspawa, maynisti janirakiw munkaspati (1 Tim. 1:5). Ukatwa, uka tuqit kuna amtäwir puriñatakisa amuykiptʼañax wakisispa.

Sañäni, markamanxa kʼari yupaychäwin apnaqat hospitalakiw utjaspa. Jan ukasti, ukakirakiw usutanakarux sum qullarakispa. Ukatsti uka hospitalanakwa kunjam qullatäñs muntan ukhamarjam qullistaspa, jan ukaxa doctoramax uka hospitalanakwa qulliristamxa. Inas kunjamsa mä cristianox wila jan uchayasisa qullayasiñ amtki ukhamarjam qullarakchispa, ukat yaqha hospitalanakax janirak ukham qullañ munapkchispati. Taqi ukanakat sum amuykiptʼasaw kuna hospitalansa qullayasiñäni uk amtañax wakisispa.

Khititï uka kʼari yupaychäwin apnaqat hospitalansa jan ukax chuymankipstatanakar uñjañ utansa uñjayasiñ amtki uka jilat kullakaxa, qullayasitapataksa jan ukax uñjayasitapataksa pagaskaspa ukhamakwa uñjaspa. Uka jilat kullakanakax kʼari yupaychäwin apnaqata empresakïkaspas ukham uñjapxi, janiw uka kʼari yupaychäwir yanaptʼañäkaspas ukham amuyapkiti. Jan ukasti, uñjapxatapatsa jan ukax qullanakatsa pagaskaspa ukhamakiwa.

Ukampisa, cristianonakax janipuniw uka kʼari yupaychäwin kuna luräwinakapansa mitisipxañapäkiti uka tuqita sum amuytʼasipxañapawa. Janirakiw uka hospitalan ukhamarak chuymankipstatanakar uñjañ utanakan irnaqirinakarusa ukat visittʼirinakarusa jachʼanchañatakix “Padre” jan ukaxa “Madrecita” sapxañapäkiti (Mat. 23:9). Qullayasiñatakikiw ukat uñjayasiñatakikiw ukar sarapxi ukxa qhan amuyasipxañapa.

Hospitalan qullayasiñatak katuqayasisaxa mä cristianoxa, Jehová Diosan Qhanañchiripjam uñtʼayasiñapaw wakisispa, ukat kawkhantï qullayaskani uka chiqan irpir chuymaninakampiw visittʼayasiñ munta sasaw yatiyarakispa. Ukhamatwa uka qullayasiñ utankkasinxa Diosar yupaychañ tuqit jan aynachtʼañapatakix yanaptʼanaksa katuqarakispa (1 Tes. 5:14).

Familiapat Diosar yupaychirinakampi, irpiri chuymaninakampi ukat tamankir jilat kullakanakampiwa chuymankipstatanakar uñjañ utankapki uka jilat kullakanakaruxa yupaychañ tuqit suma saytʼatäpxañapatakix uñjapxañapa, mä kʼari yupaychäwin apnaqatächi ukhaxa jukʼampïñapawa. Jankʼaki ukhamarjam uñjapxani ukhaxa chuymankipstat jilat kullakanakaxa wali chʼamañchtʼataw uñjasipxani, ukhamatwa uka kʼari yupaychäwin costumbrenakaparusa, ukat ukar uñtasit yaqha luräwinakaparusa, jan mitisipkaniti.

Taqi akanakat amuykiptʼasaxa, sapa mayniw uka tuqit amtañapa kuna hospitalansa qullayasini jan ukax chuymankipstatanakar uñjañ kawkïr utansa uñjayasini uk ajlliñatakixa (Gál. 6:5).