“Iyawsäwi layku suma nuwasïwi nuwasim”
1 “Iyawsäwi layku suma nuwasïwi nuwasim” sasaw apóstol Pablox Timoteorux iwxtʼäna (1 Tim. 6:12, Machaka Testamento). Pabloxa uka arunakarjamaw sarnaqäna. Niya jiwañap jakʼäxipanxa, taqi chuymaw iyawsäw laykux sum nuwasiwaytxa sasaw säna (2 Tim. 4:6-8). Taqi chuyma, jan axsartʼasa ukat aguantasa ukhamwa yatiyirïna. Jupat yatiqasisaxa iyawsäw layku nuwasiñataki chʼamachasiñäni ukhaxa jupjamarakiw jikxatasiñäni.
2 Yatiyañataki chʼamachtʼasiñäni. Jan qarjasa, taqi chuymaw Pablox yatiyirïna (1 Cor. 15:10). Jupjamarakiwa kawkha chiqanakantï yatiyktan ukhanxa suma chuyman jaqinakar jikxatañataki chʼamachasiraktanxa (Mat. 10:11). Sañäni, jupanakaru yatiyañatakixa alwat sartañaw wakisi, ukhamat callenkasipki ukanakar yatiyañataki. Ukatxa khitinakatï utanakaparu kuttʼasipki ukanakar yatiyañatakisa niya jaypʼthapi jan ukax arumasa yatiyir mistuñasarakiwa.
3 Librot yatiqañatak jiwasamp chik tantachasipki uka jilat kullakanakampi horasapar yatiyir mistuñatakix sum waktʼayasiñasawa ukat chʼamachtʼasiñasarakiwa. Sañäni, Betelankir yaqhip jilat kullakanakaxa sabadosa jan ukax domingosa tamapamp chika yatiyañ laykuxa, wali jay sarapxi, yaqhipanakaxa tamapar puriñatakixa mä horaw sarapxi. Ukatxa wali kusiskañarakiwa kunapachatï yaqhip yatiyirinakasa ukat familianakapasa yatiyir mistuñ laykuxa wali jayar sarapkchi ukhasa horasapar purirïpxatapat uñtʼatäpxi. Ukham taqi chuyma ukat suma waktʼayat yatiyir jilat kullakanakatxa yatiqasiñasax wali askipunïspawa.
4 Yatxatañ munasipkchi ukhaxa, yatichir sarañatakiwa chʼamachtʼasiñasa. Callenakan jan ukax kawkin sarnaqkasasa Bibliat apstʼat qillqatanak jaytasaxa, kawkinsa utjasi uk yatiñaw wakisispa jan ukax telefon numeropatsa yatxatañaw wakisispa, ukatxa yatxataskakiñapatakiw chʼamañchañasa ukat Bibliat yatichañwa qalltaraksna.
5 Yatiyirix mistsupxapuniñäni. Pablox jan chhaqasisa chuymapatjamwa yatiyarakirïna (Rom. 15:19). ¿Jiwasasti? ¿Ukham jan chhaqasisarakit misttanxa? ¿Aka phaxsix yatiyir misttanti? Taqinit sapa phaxsix tantachasirinakat yatiyir mistusipki, ukwa Librot Yatiqañataki sat Taman tantachäwip sarayirinakaxa amuyasipki. Jupanakaw mistupxañamatakix yanaptʼapxätamxa.
6 Pabljam suma yatiyäwinak sum yatiyañataki chʼamachtʼasiskakiñänixa, ‘iyawsäwi layku suma nuwasïwxa nuwasiskakiñäniwaʼ.