Llakinkirinakaru chuymachtʼapxañäni
1. ¿Kunatsa llakinkirinakaru chuymachtʼañax wakisi?
1 Sinti llakkañapuniwa mä munat masisax jiwxi ukhaxa, jan kuna suytʼäwinïpki ukanakax jukʼamp llakitapxiwa (1 Tes. 4:13). Waljaniw akham sas jisktʼasipxi: “¿Kunatsa jiwxpacha? ¿Kawkirus sarxpacha? ¿Wasitat jupamp uñjasiristi?” sasa. Yatiyir mistusaxa, khitinakantix mä familiapasa jan ukax munat masipas jiwawayxchi ukanakar chuymachtʼañatakixa aka iwxanakar istʼañaw yanaptʼistaspa, uka iwxanakat jichhax amuykiptʼañäni (Isa. 61:2).
2. Mä jaqitix llakinktwa jiwatajaw utji sistaspa ukhaxa, ¿jaya tiempo parlaskakiñäspati?
2 Utat uta yatiyasa. Sañäni, maynix familiajaw jiwata sasin sistaspa. ¿Jachatjamati uñnaqi? ¿Jiwirin familiapacha utan phuqäski? Ukhamächi ukhaxa, mä jukʼaki parltʼañaw wakisispa (Ecl. 3:1, 7). Mä qhawqha arunakampi chuymachtʼawayasaxa, mä tratado, mä revista jan ukax jiwirinakat parlki uka folletwa churawaysna ukham lurasinxa sarxañasaw wakisispa. Ukat Biblian chuymachtʼäwipata jukʼamp parltʼañatakixa yaqhüruw kuttʼañax walïspa.
3. Wakisirjamächi ukhaxa, ¿jiwirin familiaparuxa Bibliat apstʼat kawkïr jiskʼa tʼaqanaksa liytʼarapsna?
3 Awisaxa, sum amuytʼasisakiw yatsnaxa qhawqhampsa parltʼawayaskañäni ukxa. Ukampisa, parltʼasinxa janiw askïkaspati pantjat amuyunakapat jiskhisiñasaxa, jan ukasti Biblianxa kuna suytʼäwis jiwatanakatak utji uka tuqit inas liytʼarapsna (Juan 5:28, 29). Biblian yatichäwiparjamax kunjamsa jiwatanakax jikxatasipxi uka tuqit qhanañchañasax inas wakisirakchispa (Ecl. 9:5, 10). Kunjamsa jiwatanakar jaktayasïna ukax Biblian qillqtʼatarakiwa uka qillqatanakat liytʼarapiñäni ukhaxa chuymaps qhanartayaraksnawa (Juan 11:39-44). Yaqhasti, Jehová Diosat jan jithiqtas sarnaqiri Job chachan suytʼäwipat yatxatañaw wakisispa (Job 14:14, 15). Janïr sarxasinxa, ¿Qué nos sucede cuando morimos? ukat Maynix jiwxi ukhax kamachsnasa sat folletonakwa churawayaraksna, jan ukasti ukar uñtasita yaqha folletsa jan ukax tratadsa jaytawayaraksnawa. Inasa ¿Kunsa Bibliax chiqpachapuni yatichi? sat libro jaytawayaraksna, ukat uka libron 6 jaljap jistʼartʼasinxa mä jukʼa jupamp uñakiptʼaraksna, ukhamatwa jutïrin kuttʼasinxa uka jaljapat jukʼamp yatxataraksna.
4. ¿Kunjamanakatsa chuymachtʼaraksnaxa?
4 Yaqha horasanakana. Tantachasiñ Utan jiwat imxañataki arstʼäwi utjaspa ukhaxa, ¿tantachasirinakatxa taqinit Biblian yatichäwipar iyawsirïpxi? Jupanakar chuymachtʼañatakixa Bibliat apstʼat qillqatanak churañaw wakisispa. Yaqhip ataud aljañ utaninakaxa jiwatan familiaparu churañataki Bibliat apstʼat qillqatanak katuqasaxa wal yuspärapxi. Ukhamaraki yaqhip jiwatanakan sutinakapaxa periodiconakanwa uñstaraki uka jiwatan familiaparu chuymachtʼañataki mä carta qillqtʼañax wali askirakïspawa. Mä kullakaxa ukham qillqtʼasinxa, mä viudo chacharu ukat phuchapampiruw walja tratadonak apayatayna. Mä uruxa, uka chachampi ukat phuchapampixa uka kullakan utaparuw sarapxatayna, akham sasa: “Jumanakat aka qillqat apayanipxista? Bibliat jukʼamp yatiqañ muniristxa” sasa. Uka chachampi phuchapampixa Bibliat yatiqañ qalltapxäna ukat tantachäwinakarus sarxapxarakïnwa.
5. Jiwirin familiaparu horasapar yanaptʼañatakixa, ¿kunatsa wakichtʼatäñasaxa?
5 Eclesiastés 7:2 siwa: “Kusisiñaru sarañata sipansa jiwirin utaparu sarañawa askixa” sasa. ¿Kunatsa? Kunattix kusistʼañak munaski uka jaqit sipansa jiwirin familiapaxa Diosan Arup istʼañxa munaspawa. Ukatwa, taqinix horasapar yanaptʼañatakix wakichtʼatäñasa, ukhamatwa khitinakatix mä munat masipan jiwatapat jachasipki ukanakarux chuymachtʼarakiñäni.