‘Kunatix sumäki uk lurañatakix jankʼakïpxañäniʼ
1 Jesucristox janïr yatiyir sarkasinxa arkirinakapar wakichtʼañatakiw tiempo apstʼasïna (Mat. 10:5-14). Jiwasaxa, walja luräwinakanïkstansa, utat uta sum yatiyañatakix mä qhawqha minutonak wakichtʼasiñatak tiempo apstʼasiñäni ukhaxa wali askinakwa jikxatañäni (2 Cor. 9:6).
2 Kunjamsa wakichtʼassna. Kuna qillqatanakampitï yatiykañäni ukanak sum yatxatasaw wakichtʼasiraksna. Ukhamarak kunjam jaqinakarus parlañäni uks amuytʼañarakïspawa. ¿Kunanakatsa llakisipxi? ¿Kuna kasta yupaychäwinkirinakampisa jikisiñäni? Diosan Apnaqäwipat Yatiyañataki sat qillqatanwa ukat Razonamiento a partir de las Escrituras sat libronwa kunjamsa parltʼsna uka yanaptʼanakax utji.
3 Yatiyañataki Tantachäwinwa demostracionanakax utji, ukanak sum istʼañaw yanaptʼistaspa. Jukʼampi yatiqxañäni ukhaxa jukʼa tiempokiw wakichtʼasiñatakix munasxani, ukampisa jiwasatï yatiyañataki wakichtʼasiskakiñäni ukat kunanakatsa sapa kuti yatiyir sarkasax yatichañäni ukanakat lupʼiñäni ukhaxa jukʼamp yatsurakiñäni. Maletinansa ukat bolsansa kunanaktï yatiyir sarañatakix wakiski uk uñakiptʼañatakix mä qhawqha minutonak apstʼasiñax wakisirakispawa.
4 Kuntï yatiykañäni uk jan armasiñatakixa, ¿kuns lursna? Kuntï yatiyañ munktan ukxa jachʼat arsus yatsuñaw jan armasiñatakix yanapistaspa. Yaqhip jilat kullakanakaxa familiapampi Bibliat yatxatasipki ukhaw kunjamsa parltʼapxani ukxa yatiqapxaraki. Yaqhanakasti mä papelaruw jukʼa arunakamp qillqtʼasipxaraki ukat janïr punku liqtʼkasaw uñxattʼapxaraki.
5 Kunatsa wali askixa. Wakichtʼasktan ukhaxa sum yatiytanxa ukat jukʼamp kusisiñ jikxataraktanxa. Yatiykasax jan axsarayasiñatakiw yanapistu. Ukhamatwa kuna tuqitsa parlañäni ukatak llakisiskañat sipansa khitimpitï parlktan ukarux sum istʼañäni. Ukampisa, kuna tuqitsa qillqatax parlaski uk sum yatisinxa jukʼamp kusisitaw yatiyañäni.
6 Bibliax sistuwa: ‘Kunatix sumäki uk lurañatakis jankʼakïpxam’ sasa (Tito 3:1). ¿Suma yatiyäwi yatiyañat sipansa kuna luräwiraki jukʼamp aski utjaspasti? Jehová Diosan Qhanañchirinakapjamaxa, sum wakichtʼasisaxa Diosaruw respeto uñachtʼaytanxa ukhamaraki istʼkistu uka jaqirusa (Isa. 43:10).