Jukʼamp sum yatiyañataki: sum parlañ qalltañatakejj wakichtʼasiñasawa

Kunatsa uk lurañajj wakisi. Jiwasatï Jehová Diosan arunakap yatiykasajj jan sum parlañ qalltksna ukhajja, utanejj janiw istʼañ munkistaspati. Ukatwa walja jilat kullakanakajja, ‘sum parlañ qalltañäni ukhakiw utanejj sum istʼistani’ sasin amuyapjje. Diosan Apnaqäwipat Yatiyañataki qellqatansa ukat Razonamiento libronsa, Diosan arunakap yatiyañatak yanaptʼanakajj utjarakiwa, ukampis janiw kunjamapunis parltʼañasa ukajj phoqatpach utjkiti. Phoqatpach utjaspa ukhasa, jilat kullakanakajj kunjam parltʼañay wakischispa ukarjamaw mayjtʼayasipkaspa. Ukhamajja, janïr parltʼañ qalltkasaw sum amuytʼasiñasa, janiw uka ratuk jan sum amuytʼasis kuns parlañasakïkiti (Pro. 15:28).

Kunjamsa wakichtʼassna:

Mä qellqata janïr jaytkasajja, uka qellqatat kawkïr yatichäwitsa utanejj yatjjatañ munaspa ukwa ajlltʼañasa.
Utanir arunttʼasajj kuna arunakampis parlañ qalltañäni ukwa sum amuytʼasiñasa. Inas akham sissna: “Nayakiw..., uka toqet parltʼir jutawayta”, “Walja jaqenakarojja..., ukanakaw wal llakisiyi”, “Jumajj..., uka toqet kamsasmasa, uk yatiñ munirista” sasa. Jukʼa arunakampi ukat amuykay arunakampi parltʼañaw jukʼamp askejja. Yaqhep jilat kullakanakajja, kuna arunakampis parlañ qalltapjjani ukjja, yatsupjjarakiwa.
Utanin jan amukïñapatakejj jisktʼañasaw wakisi (Mat. 17:25). Visitʼkañäni ukhajja, inas utanejj yaqha toqenakat lupʼiskchïna, ukhamasti janiw jan amuyañjam jisktʼanak jisktʼañasäkiti, ukhamatwa utanejj jan mayjtʼaskaniti.

Aka phajjsejj ak lurañatak chʼamachasiñäni:

Familiana Diosar Yupaychañataki Arumanwa kuna arunakampis yatiykasajj parlañ qalltsna uk wakichtʼasiñasa ukat yatsuñasaraki.
Kuna arunakampi parlañsa qalltañ muntan ukwa yatiyir masisar sañasa (Pro. 27:17). Jan istʼañ munapkistani ukhajja, yaqha arunakampiw parlañ qalltaraksna.