¿Kunjamsa jaqenakamp sum parlañ qalltañatak wakichtʼassna?
1. ¿Kunatsa jaqenakamp sum parlañ qalltañasa?
1 Mä suma manqʼa malltʼtan ukhajja, jukʼampiw uka manqʼa muntanjja. Niya ukar uñtasitarakiw jaqenakamp sum parlañ qallttan ukajj Bibliat jukʼamp parltʼañ munapjjañapatak yanaptʼi. Ukampis janiw taqenimpejj pachpak parlañ qalltksnati, jan ukasti kunjamtï mä suma manqʼajj janïräkipan amuytʼaski ukat wakichtʼaskejja, ukhamarakiw sum parlañ qalltañatakejj janïräkipan amuytʼañasa ukat wakichtʼasiñasa (Pro. 15:28). ¿Kunas sum parlañ qalltañatakejj yanaptʼistaspa?
2. Jaqenakamp parlañ qalltañatakejj ¿kunjamsa sum wakichassna?
2 Kunanakats parlañ munapjjaspa ukwa ajlltʼañasa. Kunanakatsa utanejj yatiñ munaspa ukanakatwa parlañ qalltañasa, janitï ukham lurkañänejja utanejj janiw istʼañ munkaspati. Ukhamajj yatiyir sarañatak wakichtʼaskasaw ukanakat sum amuytʼañasa. Yatiytan ukawjanakan ¿jaqenakajj mä suma gobierno utjañapti munapjje? ¿Familian kusisit jakasiñti munapjje? ¿Jan ukajj chʼajjwäwinak tukusiñapcha munapjje? Niya taqeniw kuntï amuyapki uk arstʼañ munapjje, ukhamajj utanin arstʼañapatakejj amuytʼayir jisktʼanakwa jisktʼañasa. Ukatakejj Diosan Apnaqäwipat Yatiyañataki sat qellqatan mistki uka yanaptʼanakarjamaw parlañ qalltsna. Ukat ukjja Familiana Diosar Yupaychañataki Arumanwa yatsuraksna.
3. ¿Kunatsa parlañ qalltañatakejj suma amuytʼasirïñasa?
3 Suma amuytʼirïñasawa. Jaqenakajj kunayman sarnaqäwi ukat costumbrenakanïpjjewa, yaqhep cheqanakanjja kunarus visitir sartan uk jankʼakiw yatiñ munapjje. Ukat yaqha cheqanakanjja, visitirejj utanir kunjamäskisa uk jan jisktʼki ukat jupats jan yatiyki ukhajja, janis respetasirïkaspa ukhamwa amuyapjje. Yaqhep cheqanakanjja religionanakar sarapki ukanakampi Bibliat parlañ qalltañajj janiw chʼamäkiti (Hech. 2:14-17). Ukampis kawkhanakantï jaqenakajj jan cristianöpki jan ukajj jan religionanïpki ukanakarojja, janiw Bibliat cheqaki parlañajj wakiskaspati, jan ukasti visittʼir kuttʼkañäni ukhaw Bibliat parlañajj wakisispa (Hech. 17:22-31).
4. Kuna arunakampis parlañ qalltañäni ukjja, ¿kunatsa sum amuytʼasiñasa?
4 ¿Kunjamsa parlañ qalltsna? Kuna arunakampis parlañ qalltañäni uk sumwa amuytʼasiñasa. Cheqas qhana ukat jukʼa arunakampi parltʼañajj wali askiwa. Ukat kunjam chuymampis parlañ qalltañäni ukajj wali askirakiwa. Kusisit chuymampi ukat munasiñamp parltʼañäni ukhajja, utanir yanaptʼañ munatasajj qhanäniwa. Ukhamajj uka ewjjtʼanakaw sum parlañ qalltañatak wakichtʼasiñ yanaptʼistani, ukhamatwa jaqenakarojj ‘Jehová Tatitun mesapat’ manqʼapjjañapatak yanaptʼañäni (1 Cor. 10:21).