Jehová Diosar munasipxañapatakiw yatichañama
1. ¿Kunatsa yaqhip jaqinakax Jehová Diosar jakʼachasipxi?
1 ¿Kunapachatï Jehová Diosat parlir istʼkayäta uk amtastati? ¿Kunatsa Jupar jakʼachasiwaytaxa? Jan jupjam utjatapatwa, wali munasirïtapata ukat khuyapayasirïtapatwa jupar jakʼachastxa sasaw suma chuyman jaqinakax sapxi (1 Juan 4:8).
2, 3. Jehová Diosar jukʼamp munasiñapatakixa, ¿Kunsa yatichi sat librompix kunjamsa yatiqirirux yatichsna?
2 “Akapï jiwasan Diosasaxa.” Jehová Diosan munasiñapata ukat kunatsa Jupan amigopäñax wakisi uka tuqitwa Kunsa yatichi sat librox qhanañchi. ¿Jaqinakax Diosar jukʼamp munasipxañapatakix kunjamsa uka librompi yatichsna? Janïr yaqha tuqit parlkasaxa, yatiqirix kuns amuyaski uk yatiñatakix akham jisktʼañaw wakisispaxa: “¿Aka yatichäwix Jehová Diosat kuns yatichistu?” jan ukax “¿Kunjamsa amuytʼayistu Jehová Diosax wali munasir Awkïtapa, ukat janit taqinis ukham awkinïñ munksna?” sasa. Yatiqirix Jehová Diosamp wiñayatak sum apasispa ukwa muntanxa.
3 Kunapachatï yatiqirix chiqpach jakkir Diosar uñtʼatap amuyasini ukat wali askïtap yatxatäni ukhaxa, Isaías profetjamarakiw akham sani: “Akapï jiwasan Diosasaxa” sasa (Isa. 25:9). Diosan Arupat yatichkasaxa, kunapachatï Jesucristox Jehová Diosan munañap phuqkani ukhaxa walja bendicionanakaw jaqinakatakix utjani uk sum amuytʼayañasawa (Isa. 9:6, 7).
4, 5. ¿Jehová Diosar munasiñaxa kun sañs muni?
4 Kunjamsa Jehová Diosar munasitas uñachtʼaysna. Yattanwa Jehová Diosar taqi chuymasampi, taqi almasampi ukat taqi amuyusampi munañaxa janiw aliq munasiñakïkiti: jan ukasti Jupan amuyuparjam sarnaqañasawa (Sal. 97:10). Ukhamaxa Diosar munasiñaxa kunjamatix mandamientonakapax qillqatäki ukarjam sarnaqasaw uñachtʼayasiñapa, ukat jan waltʼäwinakansa, yantʼanakansa ‘Jehová Dios chuyma ukat jupar katuyasita jakasawa’ uñachtʼayasiñaparaki (2 Ped. 3:11; 2 Juan 6).
5 Diosar munasitas laykuxa Jupan munañap lurañax wali kusiskañawa (Sal. 40:8). Ukampis janïr ukham amuykasaxa, yatiqirix aka tuqit amuytʼañapawa, Jehová Diosan mandamientonakapax luqtirinakapatakix askiwa, wiñay suman jakasiñatakiwa ukat wali muspharkay Luratanakapat taqi chuyma Diosar yuspäratap uñachtʼayañatakixa, Diosan amtaparjamaruw sarnaqañapa (Deu. 10:12, 13). Khitinakatï Diosan mayitanakaparjam sarnaqapki ukanakaxa, jan waltʼäwinakata, llakinakata, ukat pʼiqi usuyanakatxa jarkʼaqasipxiwa sasaw amuytʼayañasa.
6. ¿Maynix Jehová Diosar munaski ukhax kuna bendicionanaksa katuqaspa?
6 Diosar munasirinakatak bendicionanaka. Niyakixay Jehová Diosax jupar munasirinakarux wal munaschixa, “jan amuytʼkay amtatanakapsa” yatiyiwa (1 Cor. 2:9, 10). Diosan amtanakap yatiñaxa, jutïrin kunjamänis uk sum amuytʼayi ukat mä suma suytʼäwinïñwa yanaparaki (Jer. 29:11). Ukhamatwa kunapachatï maynix Jehová Diosar munaski ukhaxa, khuyapayasiñap katuqatapwa amuyapxani (Éxo. 20:6). Ukat Jehová Diosax wal jupanakar munasitapat laykuxa wiñay jakañ suytʼapxäni (Juan 3:16).
7. ¿Jehová Diosar munasipxañapatak yaqhanakar yatichañatxa kamsasmasa?
7 Alaxpachankir Awkisat jukʼamp yatxatktan ukhaxa, jukʼampirakiw jaqinakar uka tuqit yatiyañasa (Mat. 13:52). ¡Ukhamax uk yatiyañaxa wali sumapuniwa! Jïsa, yaqhanakar Jehová Diosar munasipxañapatakix yatichsnawa, ukat sipansa wawanakasaruw jukʼamp yatichañasa (Deu. 6:5-7). Ukhamatwa jiwasanakasa, yatiqirinakasasa wali kusisitapun Jehová Diosar jachʼa khuyapayasiñapat jachʼañchapxañänixa (Sal. 145:7).