¡Jumax yaqhanakar yatichasmawa!
1. ¿Diosan Apnaqäwipat yatiyirinakjamax kunsa amtañasa?
1 Diosar luqtkasin maynir Bibliat yatichtan ukhaxa wali kusiskañawa. Kunapachatï maynix Bibliat wal yatiqañ munki ukat yatichatax Diosan Apnaqäwipat wali sum yatiqi, ukat ukarjam sarnaqasin Jehová Diosar jakʼachasi, nayra sarnaqäwipsa amuyunakapsa maysar apanukxi ukhaxa wali kusiskañawa (Sant. 4:8). Chiqansa, Diosan taqi luqtirinakapaw yaqhanakarux ukham yanaptʼañ muntanxa (Mat. 28:18, 20).
2. ¿Kunatsa yaqhipax Bibliat yaqhanakar yatichañxa axsarayasipxi, ukat kunjamsa ukar atipjapxaspa?
2 Jehová Diosar atinisiñamawa. Khä nayra maranakanxa, kuntï Diosax maykän ukanak phuqañxa yaqhipax axsarayasipxänwa, janiw sum phuqkiristti sasaw payachasipxäna. Ukampis jiwasjam jaqinakakirakiw axsarañarus payachasiñarus atipapxäna, Moisesampita, Jeremiasampita ukat Amosampita amtapxañäni, jupanakax Jehová Diosar atinisisaw wali muspharkañanak lurapxäna (Éxo. 4:10-12; Jer. 1:6, 7; Amós 7:14, 15). Apóstol Pablox akham sasaw jupampit masinakapampit säna: “Diosaw nanakaru yanapapxitu” sasa (1 Tes. 2:2). Ukhamasti, Bibliat yaqhanakar sum yatichañatakix Jehová Diosaw chʼamsa yatiñsa churistani (Isa. 41:10; 1 Cor. 1:26, 27; 1 Ped. 4:11).
3, 4. ¿Diosan Arupat suma yatichirïñatakix kuna wakichäwinakas yanaptʼistu?
3 Yatichäwi katuqtʼasiñamawa. Wali yatiñani Jehová Dios Awkisax wali sumwa walja wakichäwinakampix suma yatichirïñasataki yanapistu (Isa. 54:13; 2 Tim. 3:16, 17). Jumax janiw qhiparañamäkiti, Biblian yatichäwinakapxa wali sum katuqasiñamawa, ukat Diosan Arupat suma yatichirïñatakiw wal chʼamachasiñamaxa. Chiqansa ukatakiw Yatiyañataki Diosan Yatichäwipa sat tantachäwis ukat Yatiyañatak Tantachäwis utjaraki, ukampis taqi tantachäwinakaw suma yatichirïñatakix yanaptʼistaspa.
4 Kunjamatsa jaqinakax sum yatiqapxaspa, ukat chʼama yatichäwinaksa kunjamatsa sum amuytʼapxaspa uk sum amuytʼañamawa. Ukatakix Benefíciese, sat librox 227 janan kamsis uk chuymar katuqasiñamawa, mä chiqax akham siwa: “Yaqhanakar sum yatichañ munasax jumaw nayraqat sum amuyañamaxa” sasa. Ukat tantachäwinakan arstʼasarakiw yatiqtanxa ukhamata jutïrinakan ukanakampi yatiqirinakar amuytʼayañataki. Ukhamasti suma yatichirjam nayrar sartañatakixa, sum wakichasiñamawa.
5. ¿Suma yatichirïñatakix khitinakas yanaptʼarakistaspa?
5 Nayrïr cristianonakax jaqinakar yatichir sarkasaw purapat yanaptʼasipxpachäna (Luc. 10:1). Jiwasax jupanakat yatiqasiñasarakiwa. Irpir chuymaninakampi, precursoranakampi jan ukax tamanak tumptʼir jilatanakampi Bibliat yatichir sarañataki chʼamachasiñamawa. Kunjamsa jan amuytʼkañ wali chʼama yatichäwinaksa mä uñtʼat uñachtʼäwimpi jan ukax qillqatanakat apstʼat mä suma amuytʼampix yatichapxi uk sum istʼañamawa. Ukatxa suma yatichirïñamatakiw yatichtʼayasiñama (Pro. 1:5; 27:17). Taqi ukanakxa Diosan yatichäwipjam uñjañamawa (2 Cor. 3:5).
6. ¿Diosan Arupat suma yatichirïñatakix kunas munasi?
6 Ukhamasti Jehová Diosar atinisiñamawa, ukatxa kunanakampitï yatichkistu ukanak wali sum chuymar katuqasiñamawa. Ukat nayrar sartañatakixa Diosar mayisiñamarakiwa (Sal. 25:4, 5). Jumjam wali suma yatichirïñapataki mayniru Bibliampi yanaptʼasma ukhaxa, ¡wali kusisitaw jikxatasisma!