¿Kunjamatsa jachʼa altus utanakansa ‘phuqatpach’ yatiysna?
1. ‘Diosan munasiñapat jaqinakar phuqatpach qhanañchañatakixa’, ¿kawki chiqanakampachsa yatiyañasa?
1 Apóstol Pablox ‘Diosan munasiñapatwa jaqinakar phuqatpach qhanañchañ’ munäna (Hech. 20:24). Jiwasax uka kikparakiw lurañ muntanxa. Ukatwa Diosan Apnaqäwipat taqi chiqanakar yatiyañatakix chʼamachastanxa, ukat jachʼa altus utanakar jan ukax edificionakar sarañsa janiw armkaraktanti. Chiqpachansa uka jachʼa altus utanakan walja jaqinakaw jakapxi, ukatwa suma yatiyäwinak ukan yatiyañax wali askïspa, ukampis walja jaqinakar jikxatañax chʼamarakïspawa. ¿Kunatsa?
2. ¿Kunatsa wal amuytʼasisa edificionakan yatiyañax wakisispa?
2 Kunjamtï yatktanxa, jan waltʼäwinaka ukat lunthatanaka utjatap laykux yaqhip edificionakan punkunakapsa wali sumwa llawthapipxi ukat guardianaksa uskuntapxi jan ukax cámaras de seguridad satäkis uks uskuntapxaraki (2 Tim. 3:1, 2). Ukat uka edificionakan pʼiqtʼirinakapasa jan uñtʼatanakarux janiw mantayapkiti. Jan ukax kunapachatï maynix uka utan colerasxaspa ukhaxa, inas pʼiqtʼirix sarxapxam sasin sischistaspa. Ukhamäspa ukaxa wal amuytʼasiñaw wakisispa.
3. ¿Kunapachas jachʼa altus utanakan yatiysna ukat kunatsa?
3 Kunapachas yatiysna. Jaqinakax edificionakankapki ukhakiw yatiyir sarañax wakisispa, kunjamatï yaqha chiqanakan yatiyktanxa ukhama. Chʼusa utanakaruki sarsna ukhaxa, jan walinakwa jiwasat amuyapxaspa. Yaqhip jilat kullakanakax jaypʼunaka, sábado ukat domingo chika uru pasatatwa jaqinakarux utanakapan jikxatapxi. Ukat sinti alwat yatiyir sarsna ukhaxa, yamas sábado, domingo urunakanxa, edificio pʼiqtʼiriruw quejasipxaspa.
4, 5. Kunapachatï edificio punkux llavempi llawintatächi ukhaxa ¿kunjamsa yatiysna?
4 Kunjamatsa yatiysna. Janïr yatiyir sarkasaxa, janiw uka edificio uñjirirus ni ukan yaqha irnaqirus jutapxäw sañasäkiti. Mä edificiotï llavempi llawintatätachi ukat intercomunicador ukanïchi ukhaxa, uknam parlañaw wakisispa ukat inas mä utanix parltʼañataki edificior mantanim sischitma. Kuna kasta edificiochïya, ukarjamaw mä utanimpi parltʼasax yaqha utanimp parlañatakix wasitamp punkur mistsna, ukhamatwa intercomunicador uknam yaqhamp parltʼsna, jan ukax yaqha punkus liqʼtʼañjamäni ukxa amuytʼañasarakiwa. Ukat uka edificion qhawqha jaqinakampis ukürux parltʼasma ukxa jumaw sum amuyäta.
5 Yaqhip jaqinakaxa, kunatsa utaparu sartan uk yatiñatakix intercomunicador uknamwa jisktʼistaspa. Ukhamäspa ukhaxa, wali respetompiw khitïtas uk yatiyañama. Sutipatï ukan qillqatächi ukhaxa uka sutipatwa aruntañama. Kunatsa jupampix parlañ munta ukwa mä qhawqha arunakamp sañama. Yaqhip jilat kullakanakax Razonamiento librotwa liytʼañ yatipxi.
6. Uka edificiontï mä portero utjaspa ukhaxa, ¿kun lurañas wakisispa?
6 Uka edificio uñjiri porterox jan mantayañ munkätam ukhaxa, juparuw Bibliat yatiyañama. Waljaniw Bibliat apstʼat qillqatanakatxa liyiñ yatipxi. Ukhamächi ukhaxa juparuw Bibliat yatichañ qalltasma. Ukat porterox kawkïr utarutï visittʼañamäki ukar mantaskakim sätam ukhaxa, janiw yaqha utanakar liqʼiñax wakiskaspati.
7. ¿Kunatsa bolsanaksa jachʼa maletanaksa jan apañasäki?
7 Yäpar isthaptʼatäña ukat respetompi saraña. Jan walinak jan amuyapxañapatakixa, bolsanaka ukat jachʼa maletanak apañax janiw wakiskaspati, jiskʼa maletanak apañakiw wakisispa, jan ukax ni uk apañas wakiskaspati. Yaqhip jilat kullakanakax uka phaxsin kawkïr qillqatanakampis yatiyasiñapa ukxa mä cuadernoruw apapxi ukat amparaparuwa Biblia apasipxi jan ukax bolsilloruwa jiskʼa Biblia apasipxi.
8. Kunapachatï jachʼa edificionakan yatiykañäni ukhaxa, ¿kunjam lurañasasa?
8 Ukat uka chiqanakan janiw waljani tantachasiñax wakiskaspati, yämas kawkhantï autonak sayañäki ukhanxa. Maysa tuqitsti, kawkhantï jan waltʼäwinakax utjki ukanakanxa wali amuyumpi yatiyañasawa (Pro. 22:3). Amuytʼañataki, inas mä pusi jan ukax suxta jilat kullakanakax mä pisonaki jan jayarstʼayasisa irnaqapxchispa, ukhamax kunapachatï panin punku liqtʼapkäni ukhaxa mayninakax janiw jayankapxañapäkiti.
9. ¿Kunjamatsa respeto uñachtʼayaraksna? ¿Kunatsa ukax wali wakiskirixa?
9 Edificior mantañatakixa, zapatonaksa sum pichartʼasiñasawa ukat punksa sum jistʼkatañasawa. Ukhamtï lurañänixa uka edificion jakasirinakax janiw kunats quejasipkaniti. Kunapachatï edificior mantxäta ukhaxa, janiw punkunak sayañamäkiti jan ukasti jankʼakiw kawkhantï yatiyañamäki ukar sarañama. Ukhamtï lurañänixa janiw jan walinakxa jiwasat amuyapkaniti.
10. ¿Jan sinti uxuñatakix kunanak lurañas wakisispa?
10 Kunapachatï jaqinakampi parltan ukhaxa, yaqhip edificionakanxa taqi kunaw istʼasi, uk amuytʼañasarakiwa. Ukhamax janiw añcha jachʼat parlañax wakiskaspati. Mayni jilat kullakanakampi parlañ munäta ukhaxa, janiw añcha jachʼata ni añcha jiskʼatsa parlañamäkiti, jan ukax kunjamtï parlañäki ukhamakwa parlañama, sinti jiskʼat parlsna ukhaxa mayjanak amuyxapxaspa. Yaqhip jilat kullakanakax punkut punku liqtʼañat sipansa jaypachankki uka yaqha punkur liqtʼañwa yatipxaraki, ukhamat utaninakar jan colerayañataki. Kunapachatï wali jachʼat punku liqtʼktan jan ukax wali munañanjam liqʼintktan ukhaxa, utaninakar sustjsnawa uk amuyañasarakiwa.
11. ¿Kunapachatï punkun mä jiskʼa vidrion apkatata uñjkañäni ukhaxa kamachañasasa?
11 Uta punkutï uñtañataki mä jiskʼa vidrionjamächi ukhaxa, uka nayraqatan paninpach saytʼañax wali askïspawa. Uka jiskʼa vidrioruw uñkatañama, ukat jakʼachasinkir istʼäta ukhaxa, respetompiw aruntañama ukat yatiyañ munkayäta uka tuqit parlañwa qalltañama. “¿Khitisa?” sasin jisktʼapxätam ukhaxa, sutinakam yatiyapxañamaw wakisïspaxa. Inas uk yatisax punku jistʼarapxiristma. Janitï ukhamäkanixa, kuntï yatiyañ munkayäta ukxa yatiyaskañamakiwa.
12. ¿Jan utankapki ukanakatakix kunjamsa jiskʼa qillqatanak jaytañax wakisispa?
12 Jan utankapki ukhaxa. Awisaxa, edificio uñjirinakax nanakakiw pampar willtat papelanak pallthapisipkta sasaw quejasipxi. Chiqpachansa kunapachatï jiskʼa qillqatanak uta punkur jaytktan ukhaxa tʼunar uñtataw pamparux willirtxaspa, ukhamax jan anqäxat amuykay usktʼañaw wakisispa.
13. Maynitï colerasispa ukhaxa, ¿kun lurañas wakisispa?
13 Colerasxapxi ukhaxa. Utanitix colerasini ukat uka edificio pʼiqtʼirir jawsañ munxäni ukhaxa, uka chiqat sarxañamawa ukat yaqha uru kuttʼañaw wakisispa. Awisaxa uka edificio pʼiqtʼirimpi jan chʼaxwañ laykux sarxañaw wakisispa. Ukhamaxa, janis utanix wasitampi kuttʼanim siskatam ukhaxa kuna numeros utapaxa uk qillqtʼasiñax askïspawa ukat tarjeta del territorio satakis ukar qillqantañaw wakisispaxa, jan uka utar wasitat liqtʼañatäki. Ukatxa irpir chuymaninakaw jaypach tiempo pasatat uka utarux kuttʼapxaspa kunjamtï yaqha utanakampi lurapki ukhama, ukhamatwa janipunit Diosan arunakap yatiñ munapki ukxa yatipxani.
14, 15. Edificion mayni pʼiqtʼirix sarxam siristam ukhaxa, ¿kamachasmasa?
14 Sarxam siskani ukhaxa. Kawkïr edificiontï yatiykäta ukan pʼiqtʼiripasa, guardiapasa, jan ukax yaqha uñjiripas sarxam sätam ukhaxa, ukjpachaw sarxañama. Janipuniw kunäkipansa tuqisiñ munktanti ni policiar jawsañapsa munktanti. Chiqpachansa, edificion irnaqki ukaxa, janiw Jehová Diosan Qhanañchirinakapa contrapunïkiti, jan ukasti kuntï irnaqäwipan phuqañapäki ukakwa phuqaski.
15 Kunapachatï sarxam siskätam ukhaxa, uka edificion pʼiqtʼiriparuw kunatsa uka utarux sarta ukxa wali amuyumpi ukat munasiñampi qhanañchtʼasma (1 Ped. 3:15). Ukampis janïr sarkasax akham sasaw munasiñampi sasma: taqinin sum qamasipxañapwa jumax munpachätaxa ukampis ukax chamakïpachawa sasa. Inas ukhamat yatiyaskakim sischïtma; ukampis janitï ukhamäkanixa, jan tuqtʼasisaw jankʼaki sarxañama. Munirjamäni ukhaxa, sapa kuti jutkä ukhax lavanderiarus jan ukax yaqha chiqarus Bibliat apstʼat qillqatanak jaytiristti sas jisktʼañaw wakisispa (Col. 4:6). Aka luräwinakatxa yatiyañ tuqit irpir chuymani jilataruw yatiyañama.
16. Kunapachatï edificionakan janipun yatiyañjamäkani ukhaxa, ¿kun lurañas wakisispa?
16 Ukat jaypach tiempo pasatatsti, inas uka edificior wasitat yatiyir sarañax wakischispa. Janipunitï uka edificion yatiyañjamäkani ukhaxa, yaqha tuqinakatwa yatiyañax wakisispa, sañäni telefonota jan ukax cartanak apayasaw yatiysna. Yaqhip jilat kullakanakaxa, edificio uñkatasi jan ukax uka jakʼa callenakanwa yatiyir sarapxi alwanaka jan ukax jaypʼunaka, ukhamatwa khitinakatix irnaqäwipar sarapki jan ukax utapar kuttʼapki ukanakar Diosan arunakapat yatiyapxi.
17. ¿Kunatsa edificio ukat wali jachʼa altus utanakan yatiyañax wali askïpacha?
17 Aka jan wali ñanqhapachan tukusiwipax jakʼankiwa, ukat khitinakatï Jehová Diosan sutip artʼaski ukax qhispiyatäniwa. “Ukampisa, ¿kunjämrak juparusti artʼasipxanisti jan jupar iyawsapkchi ukasti? ¿Kunjämarak juparusti iyawsapxanisti jan jupat parlkir istʼki ukasti?” (Rom. 10:13, 14.) Ukat khitinakatix “wiñay jakañatak wakichatäp[ki]” ukanakatxa yaqhipax edificio jan ukax jachʼa altus utanakanwa jakapxi (Hech. 13:48). Jiwasatï wali amuytʼasirïñäni ukhaxa, suma machaq yatiyäwinakxa apañäniwa.