¿Kunjamatsa jan sum liytʼirinakarux yatichsna?
1. ¿Yatiykasax khitinakarus jikxataraktanxa?
1 Diosat yatiykasaxa awisax Bibliat yatiqañ munirinakaruw jikxattanxa, ukampis yaqhipax janiw sum liytʼasiñ yatipkiti. ¿Jupanakar yanaptʼsnati? Jïsa yanaptʼsnawa.
2. ¿Kunatsa jan sum liytʼasirinakarux respetompi uñjañasa ukat kunjamatsa uk lursna?
2 Respetompiw uñjañasa. Wali yatiñanïtanti janicha ukak uñjañat sipansa kunjam chuymanïtansa ukaw Jehová Diosatakix jukʼamp wakiskirixa (1 Sam. 16:7; Pro. 21:2). Jupat yatiqasisaxa, janiw khitirus jan sum liytʼatap laykux jiskʼachktanti. Ukhamarusa akaw amuyasi, respetompi ukat pacienciampi uñjañäni ukhaxa, inas yanaptʼayasiñ munapxchispa (1 Ped. 3:15). Ukhamaxa, yatichañ qalltkasax janiw Biblian mä jiskʼa tʼaqapatsa ni Bibliat apstʼat qillqatan tʼaqanakapatsa liytʼañapatak waytʼañasäkiti. Biblian suma yatichäwinakapat jukʼamp yatiqxasaxa, jupapachpaw sum liytʼañatak chʼamachasxaspa ukhamat Diosan Arupa ‘urusa arumasa’ liytʼasax kusisitäñataki (Sal. 1:2, 3).
3. ¿Kunjamanakatsa jan sum liytʼirinakarux yanaptʼsna?
3 Kunaymanitwa yatichsna. Dibujonakampi fotonakampi yatichañaxa wali askiwa, ukat yatichäwit amtañapatakis yanaptʼarakiwa. Nayraqatax yatiqiriru mä foto uñachtʼayam ukat kunsa akan uñjta sasaw jisktʼarakïta. Ukxarusti kawkïr yatichäwittix yatiqaski uk sum amuytʼañapatakis jisktʼarakismawa. Tukuyañatakixa, Biblian kawkïr jiskʼa tʼaqanakapas uka yatichäwi sum qhanstayi uk liytʼarapïta. Uka dibujonakaxa kuntï yatiqki uk amtayañatakiw yanaptʼarakispa. Ak amtañaw wakisiraki: janiw walja yatichäwinak yatichañasäkiti. Kuna tuqitsa uka yatichäwix parli ukat kawkïrinakas wali wakiskirinaka uk qhanañchtʼañamawa, janiw yaqha qillqatampi yaptʼañax wakiskaspati. Bibliat apstʼat jiskʼa tʼaqanakxa Bibliatpunwa liytʼarapïta ukat sumti yatiqaski janicha uk amuyañamatakisa jisktʼañamarakiwa. Biblian chiqa yatichäwinakap jukʼampi jikxatañatakix inas jupa pachpa sum liytʼañatak chʼamachaschispa.
4. ¿Kunjamatsa yatiqirirux sum liytʼañapatak yanaptʼsna?
4 Kunjamatsa sum liytʼañ yatiqaspa. Maynin jan sum liytʼasirïtapaxa janiw jan yatiqirïtapa, jan amtirïtap sañ munkarakiti. Ukhamaxa, Bibliat apstʼat qillqatanakasat grabacionanakax utjki uk sum istʼañapataki ukat pachpa qillqatapat jiskʼat liytʼas arktañapatakiw chʼamañchtʼarakïta, ukhamatwa sum liytʼañ yatiqarakispa. Ukat Liyiña qillqaña yatiqañaru uchasim sat folletoxa yanaptʼarakispawa. Yaqhip lugaranakanxa irpir chuymaninakaw liyiñatak yatichäwinak taman wakichtʼapxi. Chiqasa, khitinakatix jan sum liytʼasirïpki ukanakar yanaptʼañatakix uka suma iwxtʼanakaw yanaptʼistaspa, ukhamatwa Diosan ‘arunakapat’ sum amuytʼasin qhispiyasipxarakini (2 Tim. 3:15).