Jan sum liytʼasirinakarojj ¿kunjamsa yanaptʼsna?

1. Jan sum liytʼasiñ yatipki ukanakar Bibliat yatichañajj ¿kunats chʼamajja?

¹ Yatiyktan ukanakat mä qawqhanejj Dios toqet jukʼamp yatjjatañ munapjje, ukampis jan sum liytʼasiñ yatipjjatap laykojja, Bibliata ukat yaqha qellqatanakat yatjjatañ ajjsarayasipjjewa. Ukhamajj Kunsa yatichi sat libro jupanakar churañajj inas qalltan jan wakiskchispati. ¿Kunjamsa ajay toqet jupanakar yanaptʼsna? Experienciani walja jilat kullakanakaruw 20 jila markanakan uka toqet jisktʼasïna, jupanakajj kamsapjjänsa uk jichhajj uñjañäni.

2. Jan sum liytʼañ yatipki ukanakar yatichañatakejj ¿kuna qellqatanakas utjistu?

² Bibliat yateqeritï jan sum liytʼasirïkchi jan ukajj jan liytʼañ yatkchejja, Diosar istʼañäni jan ukajj Diosar istʼañäni ukat wiñayatakiw jakañäni sat folletonakampiw yatichañ qalltsna. Estados Unidos markankir mä precursor jilatajj paypach folleto uñachtʼayasajja, ¿kawkïrits yatjjatañ munasma? sasaw jisktʼi. Kenia markankir sucursalajja, uka folletonakajj mä suma yanaptʼapuniwa sasaw yatiyi, kunattejj África cheqan jakasirinakajj jisktʼanakar qhanañchañ qellqatanakampi yateqañat sipansa, sarnaqäw toqenakat parlki ukampiw yateqapjje. Sum liytʼasiñ yatirinakatakejja, liytʼañas jisktʼanakar qhanañchañas inas jan chʼamäkchiti ukampis jan sum liytʼasiñ yatipki ukanakatakejj chʼamäspawa. Yateqerin mä jukʼa liytʼañ yatiskatap amuyasajja, walja jilat kullakanakajj Diosan apayanit suma yatiyäwinaka, Diosan munasitapäsnawa jan ukajj Bibliat apstʼata sarnaqäwinaka sat qellqatanakampiw yatichapjje.

3. Jan liytʼañ yatipki ukanakar yanaptʼañatakejj ¿kuns lursna?

³ Chʼamañchtʼañasawa. Jan liytʼasiñ yatipki ukanakajja, inas ajjsarayasipjjchispa ukat janis kunatak askïpkaspa ukham amuyasipjjchispa. Bibliat yatichkasajj jan ajjsarayasipjjañapatakiw yanaptʼañasa, ukhamatwa jupanakajj yatjjatañ munasipkakini. Jupanakat jila partejja, amuytʼasirïpjjewa, ukat ratukiw yateqapjjaraki. Ukhamajja, munasiñampi ukat respetompiw uñjañasa (1 Ped. 3:15). Jupanakatï kuntï yateqapki ukajj wali askïtap uñjapjjani ukat ajay toqet jiltasipkatap amuyapjjani ukhajja, yateqañ munasipkakiniwa. Ukhamajj chʼamañchtʼaskakiñasawa.

4. Jan sum liytʼasiñ yatipki uka yateqerinakarojja, ¿kunjamsa wakichtʼasipjjañapatak yanaptʼsna?

⁴ Yateqerejj jan sum liytʼasirïkchi ukhasa, wakichtʼasiñapatakejj chʼamachtʼañasawa. Sudáfrica markankir yaqhep jilat kullakanakajja, Bibliat yateqerinakaparojj sum liytʼasiñ yatipki uka familiarapampi jan ukajj amigopampi yanaptʼayasiñapatakiw chʼamañchtʼapjje. Gran Bretaña markankir mä jilatajja, yateqerinakan sum wakichtʼasipjjañapatakejj boligrafompi (lapicero) suma chimptʼat libropwa yatichkasajj yaqhep tʼaqanakatak yateqeriru maytʼi. Ukhamatwa wakichtʼastan ukhajj jisktʼar qhanañchañajja, jan chʼamätap yateqerejj amuyi. India markankir mä jilatajja, kuntï jutïr semanan yateqapkani uka dibujonakwa yateqerinakapar uñachtʼayañ yati, ukhamat janiräkipan uka toqet lupʼiñapataki.

5. ¿Kunjamanakatsa paciencianïtasjja uñachtʼaysna?

⁵ Paciencianïñasawa. Ukatjja, kawkïr qellqatattï yatichasktan ukan wakiskir yatichäwinakapwa jukʼampi qhanañchtʼañasa, ukat yateqerin sum amuyañapatakiw yanaptʼañasa. Qalltanjja, mä 10 minuto jan ukajj 15 minutonakakwa yatichsna. Sapa kuti yatichkañäni ukhajja, janiw walja yatichañasäkiti, mä qawqha tʼaqanakatakwa yatichañasa. Yateqeritï jan jankʼak liytʼkchi ukhajja, paciencianïñasawa. Jehová Diosar jukʼat jukʼat munasjjani ukhajja, jupa pachpaw jukʼamp sum liytʼañatak chʼamachasispa. Ukhamajja, uka munasiñap jiltaskakiñapatakejj qalltatpachwa tantachäwinakar jutañapatak invittʼañasa.

6. ¿Kunjamsa maynir liytʼañ yatichsna?

⁶ Yateqeritï sum liytʼañ yateqani ukhajja, ajay toqet ratukiw jiltani (Sal. 1:1-3). Walja jilat kullakanakajja, sapa yatichäwi tukuyataruw Liyiña qillqaña yatiqañaru uchasim sat folletompi yateqerinakapar mä qawqha minutonakan yanaptʼapjje. Ukampis, yateqeritï mayjtʼasjjani ukhajja, ¿kamachsnasa? Kunanaktï lurañ yateqawayki ukanak amtayañaw jupar chʼamañchtʼaspa. Ukat ‘Jehová Diosaw yanaptʼätam Jupan yanaptʼap mayisiñamapuniwa’ sasaw sañasa (Pro. 16:3; 1 Juan 5:14, 15). Gran Bretaña markankir yaqhep jilat kullakanakajja, kuntï lurapkaspa ukat jukʼat jukʼat phoqapkaspa ukanak lurañatakiw yateqeripar chʼamañchtʼapjje. Sañäni: letranak uñtʼaña, Biblian jiskʼa tʼaqanakap jikjjataña ukat liytʼaña, ukat kawkïr qellqatanakatï liytʼañajj jan chʼamäki uk liytʼapjjañapatakiw chʼamañchtʼapjje. Mayniru liytʼañ yatichañatakejj nayraqatjja, liytʼañ munañapatakiw jupar chʼamañchtʼañasa.

7. Jan sum liytʼañ yatipki ukanakarojj Bibliat yatichañatakejja, ¿kunatsa chʼamachasiskakiñasa?

⁷ Jan sum liytʼasiñ yatipki ukanakarojj Jehová Diosajj janiw yaqhachkiti (Job 34:19). Kunatï chuymapan utjki ukwa Jupajj uñji (1 Cró. 28:9). Ukhamajj jan sum liytʼasiñ yatipki ukanakar Bibliat yatichañatak chʼamachasiskakiñäni. Ukat tiempompejj Biblian yatichäwinakap sum amuyjjañapatakejj Kunsa yatichi sat librompiw yatichjjaraksna.