Amuytʼkañ yatichapxañäni
1. Chuymar purtʼañatakixa, ¿kunjamsa yatichañasa?
1 Chuymar purtʼkir yatichañatakixa, qhana arunakamp yatichañaw wali wakiskirixa. Jesusax uñtʼat arunakampiw sum yatichirïna. Ukhamasti, sum yatichañ munstanxa, Jesusat yatiqasis yatichañasawa (2 Tim. 4:2; Juan 13:13).
2. ¿Sum yatichañatakix kunas munasi, ukat ukham lurañax kunats askïspa?
2 Qhan parlasa. Jakäwitak wali wakiskir iwxanakax Mateo 5 jaljat 7 jaljakam qillqatanwa jikxatasi, uka arunakasti wali qhanawa. Jesusan yatichäwinakap waljaniw istʼapxäna ukat “taqi jaqinakaw uka suma yatichäwinak istʼasax muspharapxäna”, Jesusar katuntañataki khitatäpkäna ukanakasa akham sasaw sapxäna: “Janiw kunapachas khitis uka jaqjamax parlkiti” sasa, ukat janiw katuntxapxänti (Mat. 7:28, 29; Juan 7:46). Sum yatichañatakixa, janiw jan uñtʼat arunakampi, jan amuykaya ukat jan uñtʼat uñachtʼäwinakampis yatichañasäkiti; chiqpach yatichäwinakaxa, uñtʼat arunakampix sumaw qhanañchasispa.
3. ¿Kunatsa yaqhipanakax istʼañ munirinakarux qariyapxi? ¿Jan qariyañatakix kunas yanaptʼistaspa?
3 Qhawqsa yatichañasäspa. Khitinakas istʼasipki ukxa Jesusax sum amuyirïna, ukat ukarjamaw qhawqsa yatichani uk amuyäna (Juan 16:12). Ukhamasti, khitinakarus yatichasktan ukxa Jesusjamarakiw sum amuyañasa, ukat familiaranakaru, yatiqañ munirinakaru ukat wawanakaru yatichkasax jukʼämpi amuyumpiw yatichañasa. Yatiqasipkchisa janiw walja yatichäwinakamp qariyañasäkiti. Taqi chuymatï yatiqaskchixa, Jehová Diosar jukʼamp uñtʼañatakix yatiqaskakiniwa (Juan 17:3; 1 Cor. 3:6).
4. Kunatï wakiski ukakiw yatichañasa, janiw yaqhanakampi yaptʼañasäkiti, ¿kunatsa?
4 Wakiskir yatichäwinaka. Jesusax yatichkän ukhaxa, wakiski ukak yatichtʼirïna, janiw walja yatichäwinakampi yaptʼirïkänti. Amuytʼañataki, kunapachatï Jesusax “taqi jiwatanakasti [...] jaktapxaniwa” sasin yatichkäna ukhaxa, khitinakasa ukat kunjamas jaktanipxani, kawkins jakapxani, taqi ukanakxa janiw qhanañchkänti (Juan 5:28, 29). Yatichktan ukhax kunatï wakiski ukanakak qhanañchañasarakiwa, janiw yaqha qillqatanakan yatichäwinakapampix yaptʼañasäkiti.
5. ¿Qhana arunakampi yatichañänixa, kunjamas jikxatasiñäni?
5 ¡Kunatï yatiñasax wakiski taqi ukanakwa Jehová Diosax wali qhan yatichistu, ukatwa wal yuspärtanxa! (Mat. 11:25.) Jiwasax ukhamarakiw amuytʼkaya qhana arunakampi yatichañasa, ukhamatwa wali kusisita, chuymar purtʼkiri yaticharakiñäni.