¿Kunjamanakatsa sum yatichsna?
1. Sum yatichañatakejj ¿kunatsa chʼamachasiskakiñasa?
1 Diosan arunakap yatiyir taqe jilat kullakanakajj yatichirïpjjewa. Yatiykasasa, Bibliat yateqañ munapki ukar kuttʼkasasa jan ukajj Bibliat yatichkasasa, kuna yatichäwitï wali wakiskirïki uk yatichañ muntanjja. ‘Diosan arunakap’ yatichktan ukhajja, ‘qhespipjjañapatakiw’ yanaptʼasktanjja (2 Tim. 3:15). Ukatwa yatichañatakejj sum wakichtʼasiñasa. ¿Kunjamsa wakichtʼasna? Uk kimsa toqet uñjañäni.
2. ¿Kunjamsa jukʼa arunakampik yatichsna?
2 Amuytʼkañ yatichañasa. Jiwasatak wali uñtʼat yatichäwïki ukajja, istʼirinakasatakejj amuyañajj chʼamäskaspawa uk janipun armañäniti. Ukhamajja, Bibliat yateqerinakarojj janiw walja yatichäwinakamp qarjayañasäkiti. Antisas kunatï wali wakiskirïki uk qhanstayañasawa. Mä suma yatichirejja amuytʼkaña jukʼa arunakampikiw yatichi (Pro. 10:19). Ukat Bibliat apstʼat tʼaqanakajj janiw taqpach liyiñajj wakiskapuniti, jan ukasti wakiski ukanakakwa liytʼsna. Ukat kuna toqettï parlasktan ukwa liytʼasajj qhanañchtʼañasaraki. Jesusajj Wali Uñtʼat Arstʼäwipanjja, chʼama yatichäwinakwa yatichäna (Mat. 5-7 jaljakama). Ukampis amuytʼkaña ukat jukʼa arunakampikiw yatichäna janiw sint parlkänti.
3. ¿Kunatsa uñachtʼäwinakajj wali wakiskirejja ukat kawkïrinakas askïspa?
3 Uñachtʼäwinakampiw yatichañasa. Uñachtʼäwinakajja, sum amuytʼasiñataki, sum istʼañataki ukat jan armasiñatakiw yanaptʼi. Ukham uñachtʼäwinakamp yatichañatakejj janiw wali yatjjatatäñapunejj wakiskiti. Jesusajja, taqen uñtʼata amuykañ uñachtʼäwinakampiw yatichirïna (Mat. 7:3-5; 18:2-4). Maysa toqetjja, amuykañ dibujonakampiw yanaptʼasiraksna, mä arunjja jiwas pachaw dibujtʼaraksna. Wakichtʼasiñäni ukhajja suma amuyunakaw utjistaspa.
4. ¿Kunjamsa jisktʼampi sum yatichsna?
4 Amuyumpiw jisktʼañasa. Jisktʼanakajja, Bibliat yateqerirojj amuytʼayiwa. Jisktʼasinjja, yateqerin jaysañapjja pacienciampiw suytʼañasa. Jiwasak qhanañchjjsna ukhajja, yateqerejj amuyaskit janich uk janiw amuyjjsnati. Pantjasini ukhajja, yaqha jistʼanakampiw jupa pachpa amuytʼañapatak yanaptʼañasa, janiw jankʼaki qhanañchañasäkiti (Mat. 17:24-27). Cheqansa, taqe yatichiriw pantjasirïtanjja. Ukatwa Bibliajj kuntï yatichktan uk sum amuyasiñatak ewjjtʼistu, ukhamat jiwas pachpasa ukat istʼapkistu ukanakarus yanaptʼarakiñäni (1 Tim. 4:16).