Yatiyañataki Tantachäwir sarañatak wakichasiñäni
1. ¿Kuna amtampis Yatiyañataki Tantachäwix uttʼayasi ukat kunjamatsa askinak apssna?
1 Jukʼamp sum yatiyir sarañasatakiw Yatiyañataki Tantachäwix uttʼayasi. Chiqpachansa, Diosan Apnaqäwipan suma yatiyäwinakapat kunjamsa yatiyañasa, kunjamsa Jesusar arkirinak tukuysna ukat kunjamsa taripäwi urut parlañasa taqi ukanakatwa uka tantachäwinx yatichasi (Mat. 28:20; Mar. 13:10; 2 Ped. 3:7). Uka tantachäwin sum istʼañatakisa arstʼañatakisa wali sum wakichasiñasawa, ukhamatwa askinak apsuñäni.
2. ¿Mä arstʼäwi sum istʼañatakix kunjamsa wakichtʼasiwaysna?
2 Arstʼäwi. Kunapachatï mä arstʼäwïki ukhaxa, kuna qillqatat apstʼatasa ukat kuna tuqitsa arstʼasini ukaxa sum qhanañchasi. Ukhamax ukarjamaw wakichtʼasiwayañasa, Bibliat apstʼat tʼaqanaksa liytʼawayañasarakiwa, ukat kunjamsa yatiyir sarañatakix yanaptʼistaspa ukatsa lupʼiñasarakiwa.
3. Tantachasirinakan arstʼanipxañapatakiw jisktʼäta siski uka wakichäwitakixa, ¿kunjamsa wakichtʼassna?
3 Tantachasirinakan arstʼanipxañapatakiw jisktʼäta. Kunapachatï ukham siski ukhaxa, qalltañatakis tukuyañatakis mä qhawqha arunakampikiw arstʼasiñapa, ukatxa kunjamtï Yatiyañataki sat revistat yatxatktanxa ukhamäñapawa. Ukatakisti, sapa tʼaqan aski yatichäwinakapwa chimptʼasisma, ukhamat suma yatichäwinak jukʼa arunakamp arstʼañamataki.
4. Tantachasirinakax arstʼanipxarakispaw siski uka wakichäwitakixa, ¿kunjamsa wakichtʼassna?
4 Tantachasirinakax arstʼanipxarakispawa. Ukham siski uka chiqax mä arstʼäwïkaspas ukhamsa waktʼayaschinixa, arstʼiri jilatax mä qhawqha chiqxa jisktʼarakiniwa. Ukhamax jumatï aski yatichäwinak chimptʼasïta ukat Biblian jiskʼa tʼaqanakapsa thaqttʼarakïtaxa, jilatax jisktʼkani ukhaxa, jumax arstʼarakïtawa. Chiqpachansa, arstʼirix tantachasirinakaruw aski yatichäwinak arstʼanipxañapatakix mayini, jan ukax ukhamarjamaw chʼamchtʼasini.
5. Demostracionanak sum yatiqañasatakixa, ¿kunas yanaptʼistani?
5 Demostracionanaka. Yatxatasiski uka yatichäwimpix kunjamsa territoriosan yatichasispa, uka tuqit mä demostracionamp uñachtʼayasiñapatakiw awisax yaqhip wakichäwinakan mayisi, ukxa irpir chuymaninaka jan ukax yatxattʼat yatiyirinaka ukat precursoranakaw uñachtʼayapxañapa. ¿Kunjamsa jiwasax wakichassna? Kunjamsa qhanañchasini uka tuqit lupʼiñasawa. Ukatxa, kunapachatï demostracionax uñachtʼayasxi ukhaxa, kunjamsa arunakamamp parltʼasma ukat kunjamsa yaqhanakampis parltʼarakisma ukwa amuytʼañama. Ukatxa, yatxataskani uka qillqatsa apasiñamarakiwa. Ukat Diosar familpach yupaychañatak tantachasipkäta ukhaw uk yatsupxarakisma.
6. ¿Kunatsa wakichasiwayañax wali wakiskirixa?
6 Yatiyañataki Tantachäwitaki wakichtʼasiwayañäni ukat yatichaskani uka yatichäw lupʼisa sarañäni ukhaxa wali aski yatichäwinakwa katuqañäni. Ukat maynit maynikamas chʼamañchtʼasirakiñäniwa (Rom. 1:11, 12). Tiempoparjam sum wakichasiñäni ukhaxa, yatiyañatakis suma wakichtʼatarakïñäniwa (2 Tim. 3:17).