¿Ukat phuqaskä sasktati?
¿Kuna tuqitsa parlasktanxa? Jehová Diosan Qhanañchirinakapax Directriz anticipada para la atención de la salud (DPA) jan ukax Consentimiento informado para la atención médica (CIAM) uka tarjetanïtanwa, uka tarjeta phuqantañ tuqit parlasktanxa. Janiw yatktanti “kunatix qharürux paskani ukxa”, ukhamax akatjamat chijin uñjasiñäni ukhaxa, kunjamsa qullayasiñäni ukat kuna yanaptʼanaksa wila jan ina chʼusar wartañatakix katuqañäni ukxa nayraqatwa amtxañasa, ukat qillqtʼasiñasawa (Sant. 4:14; Hech. 15:28, 29). Uka tuqinakat sum amtañatakixa, Asistencia médica sin transfusiones. Necesidades y derechos del paciente sat videow wakichasiwayi. Nayraqatxa uka video uñtañasawa, ukatxa Diosat maytʼasisax kunanaksa uñjawaytan ukanakwa aka jisktʼanakampi yanaptʼayasisax amtapxañasa. (Awk taykanakatï jiskʼa wawanakapampi uka video uñjapxani ukhax sum amuyasipxañapawa, kunattix yaqhip chiqanakanxa jaqinakar operasipkirwa uñjasiraki.)
1) ¿Kunatsa yaqhip doctoranakax wila uchañ tuqit wasitat parlakipasipki? 2) Kunjamsa wila jan uchasax wali chʼama operacionanak lurapxi ukanakat kimsa arstʼma. 3) ¿Qhawqha doctoranakasa ukat operacionanak lurir doctoranakas (cirujanos) wil jan uchasax usutanakar qullapxiristwa sasax sapxi? ¿Kunatsa ukham lurañ amtapxpacha? 4) ¿Wila uchayasiñ tuqitxa kunsa walja hospitalanakan yatxatawayapxi? 5) ¿Wila uchayasisax kuna jan waltʼäwinakasa utjaspa? 6) Wil jan uchayasisa yaqha yanaptʼanakampi qullayasiñ tuqitxa, ¿walja yatxattʼatanakax kamsapxisa? 7) ¿Kunatsa anemiax utji? ¿Qhawqha hemoglobinankamas mä anemian jaqix aguantaskaspa? ¿Kunampis yaptʼasispa? 8) Usut jaqin wilapan glóbulos rojos satäkis uk jilxattañapatakixa, ¿kunjamsa yanaptʼasispa? 9) Mä jaqir operasiski ukhaxa, ¿kunjamanakatsa wil jan ina chʼusar wartañatakix yanaptʼasispa? 10) Wali usuntat wawaru jan ukax jiwañampïski uka jaqiruxa, ¿jan wilampix qullasiskarakikispati? 11) Usutanakar sum uñjañ tuqitsa ukhamarak sum qullañ tuqitsa, ¿doctoranakax kamsapxisa? 12) Cristianonakjamaxa, ¿kunatsa wali wakisirixa wil jan uchayasisa sum qullayasiñataki nayraqat qilltʼasipxañasaxa? ¿Kunjamatsa uk lursna?
Kuna yanaptʼäwinaktix aka videon uñjawayktan ukhamarjam qullayasiñax sapa maynitäxiwa, ukat sapa mayniwa Bibliat yatiqataparjamax chuymapat amtxañaparaki. ¿Kunjamsa wil jan uchayasisax qullayasïta ukhamaraki wil jan ina chʼusar wartañatakixa kuna yanaptʼanaksa katuqäta uk sumti amuyxta? ¿Wawanakamax kunjamsa qullayasipxani uk amuyxaraktati ukat DPA jan ukax CIAM tarjetamxa phuqantxtati? Uka tuqit sumpach yatxattʼañatakixa “Diosan munasiñapan jakasipxañäni” sat libron 7 yatichäwipa ukatxa uka yatichäwin uñstki uka qhanañchtʼäwinak uñxattʼäta. Ukat “¿Qué opino de las fracciones sanguíneas y de los procedimientos médicos que impliquen el uso de mi sangre?” siski uk uñxattʼarakisma, ukaxa Nuestro Ministerio del Reino de noviembre de 2006 ukanwa jikxatasi. Ukatxa kunjam qullayasiñtï amtawaykta ukxa taqpachti DPA jan ukax CIAM uka tarjetar qillqantta uk uñakiptʼañamawa. Chiqansa, arxatirinakamasa (representantes) ukhamaraki familiamat Jehová Diosar jan luqtapki ukanakax wila jan uchayasis qullayasiñ tuqit amtatamxa yatipxañapawa.