Kunjamsa Bibliat yatichtan ukxa, ¿yatiykasax qhanañchtʼtati?

Kunapachatï, maynirux “Bibliat yatiqañ munasmati” sasin jisktʼktan ukhaxa, janiw kuns yatiñ munkti sapxiwa, yaqhipasti Iglesiar sararaktwa ukanak yatxtwa sasaw sapxi. Mä jukʼa yatisax taqsa yatxapxaspa ukham amuyasipxi, kuna tuqinakatsa Bibliax jukʼamp qhanañchi ukat ukanak yatxatañax kunja askis ukxa janiw yatipkiti. Ukhamasti, “¿Bibliat yatiqañ munasmati?” sañat sipansa, ¿janit kunjamas yatxatasiñapa uk qhanañchtʼañax wakiskaspa? Sañäni: mä suma manqʼa phaytʼasin mayan apanirapïma sañat sipansa, ¿janit uka ratpach malltʼayañax wakiskaspa? Kunjamtï Nuestro Ministerio del Reino enero 2006 qillqatan 6 janapan qhanañchkänxa, ukarjamaw mä qhawqha minutonakan malltʼaysna jan ukax qhanañchtʼsna.

Uka qillqatan akham siwa: “¿Aka arunakax phuqasiniw sasmatï? [Isaías 33:24 liytʼarapïta, ukat kamsanis uk istʼäta.] Uka tuqit ak uñachtʼayañ munaskayäma”, sasaw Kunsa Bibliax chiqpachapuni yatichi sat libro churasin 36 janat 22 tʼaqa uñxatayasma. Uka tʼaqan jisktʼap liytʼarapïta, ukatxa “nayaw liytʼarapïma ukat jumax ukarjamaw amuytʼanïta” sasaw säta. Liyiñ tukuyasax mayamp jisktʼäta ukat kamsanis uk istʼäta. Ukatxa Biblian yaqha jiskʼa tʼaqanakapatwa liytʼapxäta. Ukat mayan kuttʼañatakix ukarjamaw mä jisktʼa jaytawayäta, kuna urus mayamp parltʼapxäta ukxa sum amtawayapxäta. ¡Ukhamaw maynir Bibliat yatichañ qalltawayasma!