Yatiyir sarañaw nayrankañapa
1. Jesusatakix Diosan arunakap yatiyañaw nayrankäna ukxa, ¿kunjamsa uñachtʼayäna?
1 Jesusatakix Diosan arunakapat yatiyañapuniw nayrankänxa. Niya taqi jaqinakar yatiyañatakixa, Palestina markpachanwa wali jayanak kayuk saräna. Ukatarakwa yänak jan thaqkänti, ukhamat Diosan arunakap jukʼamp yatiyañataki (Mat. 8:20). Ukat kunapachatï jaqinakax usutanak qullañapatak qhiparayañ munapkäna ukhaxa, jupax akham sänwa: “Wakisirakiw nayanxa Diosan reinopat yaqha markanakaru yatiyir sarañaxaxa, ukataki khitanitarakïtwa” sasa (Luc. 4:43).
2. ¿Kunatsa Jesusatakix Diosan arunakapat yatiyañax wali wakiskirïnxa?
2 ¿Kunatsa Jesusatakix Diosan arunakapat yatiyañax wali wakiskirïnxa? Jupatakix Awkipan sutip jachʼañchañaw taqi kunat sipansa wali wakiskirïnxa (Mat. 6:9). Ukat Awkiparux wal munasïna, ukatarakwa Jupan munañapsa ukat kamachinakapsa phuqañ munäna (Juan 14:31). Ukampisa jupax jaqinakat wal khuyaptʼayasïna ukat yanaptʼañwa munarakïna (Mat. 9:36, 37).
3. ¿Kunjamsa Diosan arunakap yatiyir sarañax nayrankkatap uñachtʼaysna?
3 Kunjamsa jupat yatiqassna. Inas jiwasatakix kunjamtï Jesusax lurkän ukham lurañax chʼamächispa, kunattix akapachax kunayman tuqitwa tiempo apaqistu (Mat. 24:37-39; Luc. 21:34). Ukatwa kunatï nayrankañapa uk sum amuyañasa, yatiyir sarañatakisa ukat wakichtʼasiñatakisa tiempo apstʼasiñasa (Fili. 1:10). Ukat Jesusjamarakiw kunatï wakiski ukanakampik jakasiñasa, janiw akapachan yänakap jukʼamppach thaqhañasäkiti (1 Cor. 7:31).
4. ¿Kunatsa yatiyir sarañax nayrankañapa?
4 Kunapachatï jan tiemponïki ukhaxa, mä amuytʼasir jaqixa kunsa nayraqat lurani uk sum amuytʼasi. Jallumpi chhijchhimp jutki ukhaxa, familiapan sum jikxatasiñapatakiw chʼamapsa tiempopsa apstʼasi ukat uta jakʼankirinakaparus yatiyarakiwa. Ukat taqi kun lurañs ¿suytʼakispaxaya? Diosan jachʼa urupaxa niya ukhamarakiw wali jakʼankxi (Sof. 1:14-16; 1 Cor. 7:29). Ukhamasti, jiwas pachpa ukat khitinakatï istʼapkistu ukanakan qhispiñap munstanxa, tamankkasasa jan ukax kawkhankkasasa kunjamsa yatichasktan ukat jiwaspachpas kunjamasktansa uk sum amuyasiñasawa (1 Tim. 4:16). Chiqansa, qhispiyäwisax yatiyir sarañat nayranki janicha ukarjamäniwa.