¿Jukʼampti yatiyañajäspa?
1. ¿Kunas mä cristianorux llakisiyaspa?
1 Awisax inas luratamampix jan sum jikxatasirïsta, ¿kunatsa? Inas chuymankipstata, usuntata jan ukax familian walja lurañanakan uñjasta, ukhaw yatiyañ tuqitxa, munkta ukham jan phuqirjamäsax wali llakit jikxataspachätaxa. Ukhamarakiw kimsa wawani mä kullakax wali llakit awisax jikxatasi, kunattix familiapar uñjasaw yatiyir sarañatakix jan chʼamani ukat jan tiempon uñjasi. Ukhaman uñjasisaxa, ¿kunas sum amuytʼasiñatakisa ukat jan añcha llakisiñatakis yanaptʼiristamxa?
2. ¿Kunsa Jehová Diosax mayistu?
2 Kunsa Diosax mayistu. Taqiniw Jehová Diosatak irnaqtʼañ muntanxa, ukampisa, kuntï lurañ munktan ukat kuntï jan lurirjamäktan ukax janiw pachpäkiti. Ukhamäkchisa, awisax luratasampix janiw chuymas chuym jikxatasktänti. Ukat ak amtañasapuniwa, kunsa lurirjamäktan uk Jehová Diosax sum yatistu; janiw kuntï jan lurirjamäktan uk maykistuti (Sal. 103:13, 14). Ukhamasti, ¿kunsa mayistu? Taqi chuyma Jupar luqtañasa ukat kuntï lurirjamäktan uks taqi chuyma phuqañasarakwa muni (Col. 3:23).
3. Yatiyir sarañ tuqitxa kuntï lurirjamäktan ukxa, ¿kunjamsa amuytʼassna?
3 ¿Kuntï lurirjamäktan ukat jan lurirjamäktan ukxa kunjamsa amuytʼassna? Uk sumpach amuytʼasiñasatakix Jehová Diosaruw mayisiñasa (Sal. 26:2). Ukatxa, khititï sum uñtʼkistu, atinisiñjamäki ukat jan axsaras kunatï chiqäki uk sistaspa uka amuytʼasir mä kullakaw jan ukax jilataw kun lurañas wakisispa uk amuytʼayistaspa (Pro. 27:9). Ukampis jakäwisax mayjtʼaspawa, ukhamasti mayamp uka tuqit amuytʼasiñax askirakïspawa (Efe. 5:10).
4. Bibliarjam yatiyañ tuqit iwxtʼapxistu ukhaxa, ¿kunjamsa katuqasiñasa?
4 Kunjamsa iwxtʼanak katuqasiñasa. Kunapachatï tʼijurinakax tʼijusipki ukhaxa, maynirux wali askirjam uñjapki ukanakaxa, kawkharutï puriñapäki ukar puriñapatakiw suma arunakamp artʼas chʼamañchtʼapxi, janiw chʼam laqʼjtayañatakïkiti. Niya ukhamarakiwa, tantachäwinakana ukat Bibliata apstʼat qillqatanakan yatiyañ tuqit iwxtʼapxistu jan ukax amtayapxistu ukhaxa, Diosan arunakapat yatiyir saraskakiñatakiw chʼamañchtʼapxistu, janiw luratasax janis askïkaspa ukham amuyañasatak amtaykistuti (2 Tim. 4:2). Ukhamasti, kuntï lurirjamäktan ukarjam taqi chuym yatiyaskakiñäni ukhaxa, Jehová Diosax ‘janiw armaskaniti kuntix lurapktan’ ukanakatxa, ukhamarak Jupar munasitasatxa (Heb. 6:10).