¿Wawanakamax wakichtʼatäpxiti?
1. ¿Kunatsa wawanakaman wakichtʼatäpxañapax wakisi?
1 Yatiqañ utanxa, cristiano wayn tawaqunakax kunayman jan waltʼäwinakaruw saykatapxani, ukampis kunatix chiqäki uk yatiyapxarakispawa (Juan 18:37). Ukhamasti, ¿wawanakamax wakichtʼatäpxiti?
2. Wawanakaman sum wakichtʼatäpxañapatakixa, ¿kunsa yatipxañapa?
2 ¿Kuna luräwinakampis markar jachʼañchasi ukat kuna fiestanakas aka pachan costumbrenakaparjam lurasi uk wawanakamax sumti yatipxi? ¿Kunatsa ukanak lurañax jan walïki uk sumti amuyapxi? Jachʼa yatiqañ utarux sarañamapuniw sasin waytʼapkani ukhaxa, ¿ukar saykatañatakix wakichtʼatäpxiti? Kunapachatï maynimp mistuñapataki jan ukax alcohol umañapataki, jan ukax droganakampi qulljasiñapatak wiytapkani ukhaxa, ¿kunsa lurapxani uk yatipxiti? ¿Religionaj contraw ukaxa, ukatwa jan lurkiristi sasakit sapxi, jan ukax kunatsa jan lurapkaspa uk sumti qhanañchañ yatipxi? (1 Ped. 3:15.)
3. ¿Kunjamsa awk taykanakax Familiana Diosar Yupaychañataki Arumax wawanakapan wakichtʼatäpxañapatak yanaptʼapxaspa?
3 Familiana Diosar Yupaychañataki Aruman wakichtʼapxam. Inas yaqhipaxa, kuna yantʼanakansa wawanakax yatiqañ utan jikxatasipki ukanakarjam saykatañatak yanaptʼapxsta. Ukampis janiräkipan ukanakar saykatapxañapatak yanaptʼapxäta ukhaxa, wawanakamax jan axsarasaw uka yantʼanakar saykatapxani. ¿Janit Familiana Diosar Yupaychañataki Aruman wakichtʼapxasma? Yatiqañ utan kuna jan walinakas wawanakamar llakisiyi ukwa jisktʼasma. Ukhamarusa, kuna jan waltʼäwinakarus pasïr maranakan saykatawayapxi ukanak amtañax walirakispawa, inas jichhax ukanak sumpach amuyxapxchi (Sal. 119:95). Ukatxa, kuna yantʼanakansa yatiqañ utan uñjasipxaspa ukat ukarux kunjamsa saykatapxaspa uk yatsupxarakismawa, jumanakaw yatichiripäpkasmasa jan ukax yatiqir masinakapäpkasmas ukham tukupxasma. Bibliamp qhanañchapxañapatak wawanakamar yatichapxam ukat kunjamsa Razonamiento ukat Kunsa wayn tawaqunakax yatiñ munapxi (mayïr ukat payïri) libronakamp yanaptʼasipxaspa uks yaticharakim. Mä kullakax ukhamwa wawanakapampi yatsupxirïna, ukhamat sapa marax escuela jan ukax colegio qalltki ukhax profesoranakapamp parlapxañapataki ukat Jehová Diosan Qhanañchirinakapjam uñtʼayasipxañapataki. (Yatiyañataki diciembre 15, 2010, 3 janat 5 janakam uñxattʼäta.)
4. ¿Kunsa suma amuytʼasir awk taykanakax lurapxañapa?
4 Aka qhipa urunakanxa, kuna jan waltʼäwinakarutï wayn tawaqunakax saykatapxañapäki ukax jukʼamp chʼamäxiwa (2 Tim. 3:1). Ukampisa, suma amuytʼasiri awk taykanakax kunaymanitwa ukhaman jan jikxatasipxañapatakix wawanakapar yanaptʼapxi (Pro. 22:3). Ukhamasti, janïr jan waltʼäwinakan uñjasipkipan sum wakichtʼatäpxañapatak yanaptʼapxam.