¿Yatiqañ utar sarañatakix wakichatäxtati?
1. ¿Yatiqañ utar sarxäta ukhax kun lurañas waktʼätamxa?
1 ¿Jichhakit saraskta, jan ukax walja maranakach sarxta? Chiqas yatiqañ utar sarkasaxa, cristiano wayn tawaqjamax jan walinakar wiytata ukat inas yantʼanakans uñjasirakchïta. Ukampis ‘kunatix chiqäki uk yatiyañatakix’ punkus jistʼartkaspa ukhamäniw jumatakixa, ukxa jan armasimti (Juan 18:37). ¿Ukhamax wakichatäxtati?
2. ¿Yatiqañ utan yatiyañatakix wakichatäxtaw sasax kunatsa sissna?
2 Sum amuykiptʼätaxa, jakäwiman suma ukat kʼuchiki jakasiñamatakix janiw kunas faltktamti, kunattix Jehová Diosasa awk taykamas ukat Amuyasiri Chiqapa Uywatasa sumwa yatichawayapxtamxa (Pro. 1:8; 6:20; 23:23-25; Efe. 6:1-4; 2 Tim. 3:16, 17). Yatiqañ utan kunanak lurañamas wakisi ukanak inas sum yatxsta. Kunjamänis ukanak yatxstaxa, kunanaktï Bibliat yatiqawaykta ukanak janipun armasimti jan ukasti yatiyañatak wakichtʼasim (Pro. 22:3). Kunsa wayn tawaqunakax yatiñ munapxi sat pä libronakax utjki ukanakan suma yatichäwinakapatsa iwxtʼanakapatsa sum lupʼikiptʼam, ukhamaraki ¡Despertad! sat revistan wayn tawaqunakatak utjki ukanakatsa amuykiptʼarakma.
3. ¿Yatiqañ utankkasax kunjamanakatsa Diosan Arupat sum qhanañtʼasma?
3 Janiw yaqha chiqan ukham yatiyañax utjkaspati, yatiqañ utanx kunaymanitwa yatiyasma, uk amtasipunim. Mayni wayn tawaqunakaxa, yatiqaskay isthapisitamsa kʼachachtʼasitamsa parlatamsa ukat sarnaqäwimsa sumwa uñjasipktamxa. Yatichirinakaru, masinakamarus respetompi uñjatama ukat suma notanak apsutamsa amuyasipkiwa. Jakäwitak suma wakichtʼatätamsa sum amuyapxaraki. Ukhamasti, ¿kunatsa jan mayninakjamäkta?, sasaw jisktʼapxiristamxa (Mal. 3:18; Juan 15:19). Ukhamäni ukaxa, Biblian kuna yatichäwinakaparus iyawsta ukanakwa qhanañchtʼasma (1 Tim. 2:9, 10). Yatiqañ utanxa marpachaw jachʼa marka uruyañatak urunakasa yaqha fiestanakas utjani. Ukat ‘kunatsa uka fiestanakar jan jutkta’ sapxätam ukhaxa, ¿kamsätasa? “Jehová Diosan Qhanañchiripätwa janiw ukanak lurkiristti” sätati. Jan ukax kunjamsa Jehová Diosax uka fiestanakar uñji ukanakcha sum qhanañchtʼäta. Wali sum wakichtʼasitamampi ukat Jehová Diosan yanaptʼapampiw Diosan arunakap khitirus yatiyaskakiñatakix yanaptʼätamxa, sañäni, yatichirinakarusa masinakamarus yatiyaskakïtawa (1 Ped. 3:15).
4. ¿Kunatsa yatiqañ utar sarañ jan axsarayasiñamäki?
4 Inas yatiqañ utar sarañ axsarayassta, ukampis ak amtañamawa, waljaniw kunatï jumatakix askïki uk munapxi ukat yanaptʼapxarakïtamwa. Yatiqañ utan yatiyañax janiw kikpax yaqha chiqan utjkiti uk yatisax kusisiñamawa. Ukhamasti, ¡jan axsarayasimti! ¡Yatiqañ utar sarañatakix wakichatäxtawa!