Jan axsarayasimti
1. ¿Kawkinsa yatiyañax chʼamäspa, ukat kunatsa?
1 ¿Nayat burlasipxitaniwa sasin may kutis Bibliat yatiyañ axsarayasirïtati? Chiqpachansa, escuelan yatiyañax chʼamakiwa, yamas axsarirïsta ukhax jukʼampiwa. Ukampis ¿kunas yanaptʼiristam?
2. Escuelan yatiykasaxa, ¿kunjamsa suma amuytʼasirïtam uñachtʼayäta?
2 Sum amuytʼasim. Escuelansa jumax yatiykchismaxa, ak amtañamapuniwa: janiw taqinimpix Bibliat parlkasmati, kunjamtï utat uta yatiyir sarktan ukhama. Ukhamasti kuna pachasa Bibliat yatiyasma uk sum amuytʼañamawa (Ecl. 3:1, 7). Inas mä yatichäwit parlapkäta jan ukax kuna tarea churapkchïtam ukhax Bibliat parlchisma. Jan ukax inas mä yatiqir masimax kunatsa escuelan yaqhip luräwinak jan lurkta sasin jisktʼchïtam ukhaw Bibliat parlarakisma. Yaqhip jilat kullakitanakaxa, escuelar sarañ qalltapki ukhaw yatichirinakaparux Jehová Diosan Qhanañchiripätwa sasin yatiyapxi ukat kunanakarus iyawstan uka tuqit parlir qillqatanakwa churapxaraki. Yaqhipaxa Bibliat apstʼat qillqatanakwa bancop patxar uchapxi ukhamat yatiqir masinakapax jisktʼapxañapataki.
3. ¿Kunjamsa escuelan yatiyañatakix wakichtʼasisma?
3 Wakichtʼasim. Wakichtʼasïta ukhaxa, janiw añch axsarkätati (1 Ped. 3:15). Kunsa jikstʼapxiristam ukat kunjamsa qhanañchasma ukanakatwa amuytʼañama (Pro. 15:28). Biblia ukat Kunsa wayn tawaqunakax yatiñ munapxi jan ukax Razonamiento libronakwa apasisma, ukat Bibliat apstʼat qillqatanakax Diosan luratanakapat parlki ukanaks apasirakismawa, ukhamatwa wakisini ukhax ukanakamp yatiyasma. Ukhamarusa, familian Diosar yupaychapkta ukhaw uk yatsuñatakix awk taykamar mayisma.
4. ¿Kunatsa escuelan yatiyaskakiñatak chʼamachasiñamax wakisi?
4 Janiw aynachtʼañamäkiti. Nayat burlasipxitaniwa sasin janiw aynachtʼañamäkiti. Inas mä qhawqhanix ukham jan axsaras Bibliat yatiyatamat muspharapxchini ukat istʼapxchïtam. Ukampis janitï maynis istʼkätamxa, jan aynachtʼamti. Ukham chʼamachasitamatxa Jehová Diosax kusisiniwa (Heb. 13:15, 16). Ukhamasti, “jan axsaras” yatiyañatak Diosat mayisiskakim (Hech. 4:29; 2 Tim. 1:7, 8). Maynikis istʼätam ukhax kunja kusisitakis jikxatasïta uk amuytʼasim. Ukat inas tiempompix istʼkätam jupax Jehová Diosan yupaychiripäxchini.