¿Kunas jumarojj ‘wal kusisiytamjja’?
1. ¿Sapa phajjsi tukuyajj kunatsa kusisitañasa?
1 Sapa phajjsi tukuyar informe mayiski ukhajja, ¿kunas jumarojj ‘wal kusisiytamjja’? (Gál. 6:4). Jehová Diosatakejj precursor especialjamas 130 horanak yatiyaskstan jan ukajj 15 minutonakaks yatiyirjamajj Diosatak irnaqtʼaskstan ukasa, taqeniw Jehová Diosar taqe chuyma loqtatasatjja kusisiñasa (Sal. 100:2).
2. ¿Kunatsa Jehová Diosar taqe kunat sipansa sumäki uk churañasa?
2 Taqe kunjjar Munañani Jehová Diosarojja, taqe kunat sipansa wali sumäki uk churañasaw wakisi (Mal. 1:6). Diosar wal munasitas laykuw Jupar jakäwis katuyastanjja, ukhamat munañap phoqhañataki. Ukhamajja, sapa uru tukuyarusa jan ukajj sapa phajjsi tukuyarusa, jiwasatï tiempossa, kuntï sum lurañ yatktan uksa ukat chʼamassa Diosar loqtañatak chʼamachasiskstan ukhajja, kunatï ‘nayrirïki’ uk churasktanjja, ukatwa sapa maynejj wali kusisit jikjjatastanjja (Prov. 3:9). Ukat concienciasatï jukʼamp luraskasmawa sischistu ukhajja, istʼañasawa. Ukat kunjamsa jukʼamp sum loqterista sasaw amuykiptʼasiñasaraki (Rom. 2:15).
3. ¿Kunatsa mayninakjamañ munañajj jan walïki?
3 ‘Janiw mayninakar uñtasaki kuns lurañasäkiti’. Janiw mayninakar uñtasaki kuns lurañasäkiti ni nayrjam lurirista sasin amuyañas walïkaspati. Kunattejj sarnaqäwinakasajj mayjtʼiwa, kuntï sum lurañ yatktan ukas mayjtʼarakiwa. Ukham mayninakjamañ munañajj atip atipa lurañaruw apistaspa jan ukajj janis kunatakis walïksna ukham amuyayistaspa (Gál. 5:26; 6:4). Jesusajj mayninakjamay lurasmajja sasajj janiw arkirinakapar sirikänti. Jan ukasti jan yaqhachasaw taqenir luräwinakapat walikpun ukham lurtajja sas sirïna (Mar. 14:6-9).
4. Jesusajj qollqjjat yatichkäna ukatjja, ¿kunsa yateqtanjja?
4 Jesusajj qollqjjat yatichkäna ukanjja, ‘sapa irnaqeriruw qollq chʼamaparjama churäna’ (Mat. 25:15). Ukat kunaratutï patronajj kuttʼanjjäna ukhajja, sapa maynejj kunjamsa irnaqapjjatayna ukwa mayïna, ukat taqe chuyma kuntï sum lurañ yatipkäna ukat qhawqtï lurirjamapkäna ukarjam irnaqtʼirinakarojj walikpun ukham lurtajja sänwa. Jichhajj “mantanim ukatsti nayampirak kusisim” sarakïnwa (Mat. 25:21, 23). Ukhamajja, jiwasatï taqe chuyma Diosan Reinopat jan tiemponi yatiyaskakiñäni ukhajja, ¡Diosarojj kusisiyañäniwa ukat jiwasas ukhamarakiw wal kusisiñäni!