Diosar istʼapjjañapatak jaqenakar yanaptʼapjjañäni
1. “Reinomampisti apnaqapjjeta” sat kimsa uru jachʼa tantachäwinjja, ¿kuna folletonaksa katoqawaytanjja ukat kunatsa ukanakajj mä suma yanaptʼajja?
1 “Reinomampisti apnaqapjjeta” sat kimsa uru jachʼa tantachäwinjja, pä machaq folletow lakirasïna: Diosar istʼañäni ukat wiñayatakiw jakañäni ukhamaraki wali amuytʼkaya jukʼa letrani Diosar istʼañäni sat folletonakwa katoqawaytanjja. Niyakejjay jukʼa letranikïchejja, yaqha arur jaqokipañatakejj jukʼa tiempokiw munasi ukat janiw chʼamäkarakiti. Cheqansa, Diosar istʼañäni ukat wiñayatakiw jakañäni sat folletojj Inglés arut mistkäna ukhatpachwa 431 arunakar jaqokipasiñapatak amtasiwayi.
2. ¿Uka folletonakajj khitinakarus jukʼamp yanaptʼani?
2 ¿Uka folletonakajj khitinakarus jukʼamp yanaptʼani? Oraqpachanjja, kunjamanakansa yatiykasajj sapa kuti uñjastan ukanakat amuytʼañäni:
• Yatiykasawa jan ukajj wasitamp visittʼir kuttʼasawa mä jilatajj utanin jan liytʼasirïtapa jan ukajj jan sum liytʼasiñ yatitap amuyi.
• Mä yatiyiriw yaqha aru parlirinakar yatiyi, ukampis uka arutjja, Bibliat apstʼat qellqatanakajj mä qhawqhakiw utji, jan ukajj janiw mayas utjkiti. Ukhamarakiw kawkhantï yatiyktan ukhanjja, kawkïr artï jaqenakajj parlapki uka arut liytʼañajj jupanakatakejj chʼamaraki.
• Kawkhantï yatiyañapäki ukawjanakanwa mä yatiyirejj oqarapki uka jaqenakar amparamp parlasa yatichi.
• Mä awkejja, jiskʼa wawaparojj kunatï cheqäki uk wal yatichañ muni, ukampis jiskʼa wawapajj janiw liytʼasiñ yatkiti.
3. Diosar istʼañäni sat folletojj ¿kunjam wakichtʼatasa?
3 Uka folletonakajj kunjam wakichtʼatasa. Diosar istʼañäni sat folletojj jukʼa qellqatanikiwa ukat sapa jana tukuyarojj Bibliat apstʼat mä jiskʼa tʼaqaw sum qhanañchasiñapatak utjaraki. ¿Kunatsa? Amuytʼañäni: maynitï jan uñtʼktan uka arut mä folleto liytʼañatak churañ munistaspa ukat janirak letranakap liytʼañ yatksnati ukhajja, wali suma dibujonïkchi ukhasa, ¿yanaptʼistaspati? Cheqansa janiw yanaptʼkistaspati. Ukhamarakiw jan liytʼañ yatipki uka jaqenakarojj walja letranakan qellqatanakajj janiw yanaptʼkaspati. Ukatwa, aka folletonjja, sapa jananakan wali amuyumpi wakichtʼat dibujonakajj utji, ukat mä dibujot yaqha dibujor uñtayañatakejja, mä chimpuw utjaraki.
4. Diosar istʼañäni ukat wiñayatakiw jakañäni sat folletojj ¿kunjam wakichtʼatasa?
4 Diosar istʼañäni ukat wiñayatakiw jakañäni sat folletojj Diosar istʼañäni sat folletor uñtasitarakiwa. Khitinakatï liytʼasiñ jan sum yatipki jan ukajj liytʼañ yateqasipki ukanakar yatichañatakiw aka folletojj wakichtʼasiwayi. Ukhamajja, Diosar istʼañäni sat folletomp yatichkasajja, Diosar istʼañäni ukat wiñayatakiw jakañäni sat folletompejj yanaptʼasiraksnawa. Ukat sapa yatichäwejja pä jananakankiwa. Ukat alayan chʼeqawjaparojja, mä jisktʼaw sapa pä janarojj utjaraki, ukat uka pachpa jananwa uka jisktʼar qhanañchasiraki. Ukat dibujonakamp chikajj Biblian mä qhawqha jiskʼa tʼaqapaw utjaraki. Ukatsti walja jananakan kayüwjaparojja, chhayphuptayat recuadronakaw utjaraki ukajja, wakiskir yatichäwinak qhanstayañatakiwa ukampis yatichiriw kunjamsa yatichaspa uk amuyjjañapa.
5. ¿Kunapachasa ukat kujamsa jaqenakar uka folleto chursna?
5 Kunjams ukampejj yatichsna. Janis aka folletompi utat uta sapa phajjsinak yatiyaskchinejja, kunaratutï yatiyañatak wakisirjamachin ukhajj apnaqaraksnawa (“Kunjamsa uka folletonakampejj yatiysna” siski uka recuadro uñjjattʼäta). Ukat Bibliat yateqañ munapki ukanakar kuttʼasajja, jumar uñachtʼayañatakiw aka folleto apanta sasaw churarakisma.
6. ¿Kunjamsa uka pä folletompejj yateqerinakar yatichsna?
6 Niyakejjay Diosar istʼañäni sat folletojj jan jisktʼanakanïkchejja, ukhamajj janiw Kunsa yatichi sat librjam jisktʼanakampi yatichkañäniti. Walja markanakanjja, sarnaqäwinakat istʼañjja wal munapjje. Ukhamajj Biblian utjki uka sarnaqäwinakampiw jaqenakar yatichasma. Ukat kunsa dibujonakajj yatichistu ukwa qhanañchtʼarakisma. Ukatsti, taqe chuymaw kusisita yatichañama, janiw jumak parlañamakiti. Ukat sapa janan kayuwjapan qellqatäki ukjja liytʼañamawa, ukat kamschiy ukarjamaw qhanañchtʼañamaraki. Yateqerin arsuñapataki ukat amuyaskit janich uk yatiñatakejja, jisktʼañamawa. Ukat yateqeritï Diosar istʼañäni ukat wiñayatakiw jakañäni sat folletomp yateqaskchi ukhajja, Bibliat apstʼat jiskʼa tʼaqanaksa ukat sapa dibujon qellqat utjki ukanaksa, jupampiw liytʼapjjasma.
7. ¿Kunjamsa Bibliat yateqerinakasarojj nayrar sartañapatakejj yanaptʼsna?
7 Yateqerirojj nayrar sartañapatak yanaptʼañäni. Bibliat yateqasajja, yateqerejj liytʼañ yateqañsa munarakispawa ukhamat Jehová Diosar jukʼamp uñtʼañataki (Mat. 5:3; Juan 17:3). Ukat yateqeritï Diosar istʼañäni sat folletompi yateqaskchi ukhajja, tiempompejj inas liytʼañ yaticharakchisma, ukatjja, Diosar istʼañäni ukat wiñayatakiw jakañäni sat folletompirakiw yatichjjasma. Kawkïr folletompisay yateqerejj yateqañ tukuyaskpa, janiw bautisasiñatakejj wakichatäkiti. Ukhamajja, Kunsa yatichi sat librompiw ukjjarojj yatichjjañama jan ukajj yatichañataki wakichtʼatäki uka qellqatampiw yateqerin Bibliat sum amuytʼañapatakejj yatichañama.
8. ¿Kunatsa uka folletonakat Diosar yuspärtajja?
8 Jaqenakatï wiñay jakasiñ munapjjchi ukhajja, Taqe kunjjar Munañani Diosaruw istʼapjjañapa (Isa. 55:3). Jupajj “taqenin” qhespiyasipjjañapwa muni liytʼasirïpas jan liytʼasirïpasa (1 Tim. 2:3, 4). Uka yanaptʼanakatjja Diosarojj wal yuspärtanjja, kunattejj jaqenakar yatichañatakejj wali askipuniwa, ukhamatwa jupanakajj Diosar istʼapjjani.
[3 janan recuadropa]
Kunjamsa uka folletonakampejj yatiysna
Utanirojj 2 ukat 3 jananak uñjjattʼayasajja, akham sasmawa: “¿Akan uñjktas ukham jakasiñ munasmati? [Kamsanis uk istʼäta.] Biblian qellqatarjamajja, Diosajj niyaw aka Oraqjja mä suma paraisor tukuyjjani, ukanjja janiw pisin jakasiñas, usuntañas utjjaniti. Kunsa ukankañatakejj lurañasa uk uñjañäni. [Isaías 55:3 liytʼäta, ukajj 3 jana qalltanwa uñstaraki.] Ukanjja akham siwa: ‘Nayan ukar jutapjjam’ ukat ‘istʼapjjeta’ sasa. Ukampis ¿kunjamats Diosar istʼtanjja?” 4 ukat 5 jananakwa uñachtʼayarakïta ukat kuntï ukan qhanañchki ukjja utanimpiw yatjjatapjjäta. Jan tiemponïkchi ukhajja, folleto jaytasinjja, uka toqet qhanañchtʼañatakiw yaqha uru kuttʼañatak amtapjjäta.