Jisktʼäwinaka
◼ Tantachäwinakansa ukat Diosan arunakap yatiykasasa ¿Biblian kawkïr ewjjtʼanakapas celular apnaqañ toqet yanaptʼistaspa?
“Taqe kunas horasanikiwa.” (Ecl. 3:1.) Kuna mensajenak qellqtʼasin aptʼayañatakisa jan ukajj maynimp parltʼañatakisa celularajj yanaptʼistuwa. Ukampis cristianonakajj wali amuyumpiw apnaqañasa. Kunattejj tantachäwinakanjja, Jehová Diosaruw yupaychtanjja ukat ukanwa suma yatichäwinak katoqtanjja ukat jilat kullakanakampis ukanwa purapat chʼamañchtʼasiraktanwa (Deu. 31:12; Sal. 22:22; Rom. 1:11, 12). Ukhamajj tantachäwinkkasajj celularanak jiwtʼayañasawa, ukat tantachäw tukuyataruw maynejj mensajenak liytʼañatakejj celularap naktayjjaspa. Awisajj inas maynin jawsäwip suyaskatas laykojj celular jan jiwtʼayksnati, ukhamajj jilat kullakanakar jan pantjasiyañatakejj celular amuktʼaysnawa.
Diosan arunakap “yatiyañ” laykuw taqe kuns lurañasa (1 Cor. 9:23). Diosan arunakap yatiykasajj celularanakajj yanaptʼistaspawa. Amuytʼañäni: Grupo sarayir jilatajj yaqha cheqan yatiyasipki ukanakar jawsaspa. Ukat yaqhep jilat kullakanakan Bibliat yateqerinakapasa jan ukajj Bibliat yateqañ munapki ukanakas jaya cheqanakan jakapjjchi ukhajja, janïr jupanakan ukar sarkasaw celularat jawsapjje. Ukampis amuytʼasiñasawa, kunattejj yatiyktan ukhaw celularajj wararjjaspa (2 Cor. 6:3). Ukat mayni jilat kullakanakarutï suyañasächi ukhajja, janiw amigosar celularat jawsaskañasa ni mensajenak aptʼayaskañasa walïkaspati. Antisas kunjamsa Diosan arunakap yatiyaski uk istʼañatakiw chʼamachasiñasäspa.
‘Mayninakan askipwa thaqhapjjañasa’ (1 Cor. 10:24; Fili. 2:4). Awisajj akham amuyañaw utjaspa “yatiyir mistuñatak tantachäwir qheptʼat purï ukhaw kawkhans yatiyasipki uk yatiñatakejj celularat mensajenak qellqtʼas apayä jan ukajj jawsä” sasa, ukampis janiw ukham amuyañasäkiti. Kunattejj qheptʼat pursna ukhajja, inas wasitat taqe kunas mayjtʼayaschispa. Ukampis jan munañasar taqe kun apnaqatas laykojj qheptʼañajj utjakipunispawa. Ukhamajj horasapar puriñatak chʼamachasiñäni ukhajja, Jehová Diosarusa, jilat kullakanakarusa, ukat grupo sarayir jilatarusa respetataswa uñachtʼayañäni.