¿Kunas yatiyir sarañatakejj chʼamañchtʼistu?
1. Diosan arunakap yatiyañatakejj munasiñaw utjañapa sasajj ¿kunatsa sissna?
1 Jichhürunakanjja, Jehová Diosan Reinopat jaqenakar yatiyañajj wali aski luräwipuniwa. Cheqas uk lurasaw Jehová Diosan aka pä mandamientonakar istʼatas uñachtʼaytanjja; Jupar munasiña ukat jaqe masisar munasiña (Mar. 12:29-31). Uka munasiñaw Diosan arunakap jan aynachtʼas yatiyaskakiñatakejj yanaptʼistani (1 Juan 5:3).
2. Diosan arunakap yatiyasajj ¿kunjamsa Jupar munasitas uñachtʼaytanjja?
2 Jehová Diosar munasitasa. Jehová Diosajj wali munat amigosawa, ukampis Supayajj 6.000 jila maranakaw Diosat jan walinak parlawayi, ukatwa Diosar arjjatañatak yatiytanjja (2 Cor. 4:3, 4). Supayan kʼarisitapatwa jaqenakajj Diosat jan walinak amuyjjapjje. Jucharar jaqenakarojj infiernonwa tʼaqhesiyi, Diosajj kimsa diosat mayar apthapitawa ukat jaqenakat janiw llakiskiti sasinwa sapjje. Waljaniw Diosajj janis utjkaspa ukham amuyjjapjjaraki. Ukhamajj kunatï alajjpachankir Awkisat cheqäki uk jaqenakan yatipjjañap wal muntanjja. Cheqas Diosan qhanañchiripäñatak chʼamachasitasajj Jupar wal kusisiyi, ukampis Supayarojj aynachtʼayiwa (Pro. 27:11; Heb. 13:15, 16).
3. Diosan arunakap yatiyir sarasajj ¿kunjamsa jaqenakar munasitas uñachtʼaytanjja?
3 Jaqe masisar munasitasa. Jaqenakar Diosan arunakap yatiyktan ukhajja, jupanakar munasitaswa uñachtʼaytanjja. Ukatwa jan inaktʼas aka qhepa urunakan jaqenakar yatiyaskaktanjja. Waljaniw Jonás tiempon jakapkän uka ninivitanakjam jikjjatasipjje, jupanakajj ‘janiw kupi amparampi chʼeqa amparapampi mayjätap amuyapkänti’ (Jon. 4:11, NM). Ukampis Diosan arunakap yatiyasajj kusisit jakasipjjañapatakiw yatichtanjja (Isa. 48:17-19). Ukat suytʼäwinipjjañapatakiw yanaptʼaraktanjja (Rom. 15:4). Ukat jupanakatï istʼasin ukarjam sarnaqapjjanejja, “qhespiyatä[pjja]niwa” (Rom. 10:13, 14).
4. ¿Kunsa Jehová Diosajj jan armkani?
4 Suma wawanakajj sapa kutiw awk taykapar munasiñ uñachtʼayañatak chʼamachasipjje, janiw mä aski wakichäwi utjki ukaratuk uñachtʼayapkiti. Ukhamarakiw Jehová Diosaru ukat jaqenakar munasitasajj uñachtʼayasispa, mä arunjja, kawkhanjjay jikjjatastan ukhan yatiyañasapuniwa, janiw yatiyañatak tamampipuni mistuñ suyañasäkiti. Ukhamajj jan inaktʼasaw yatiyañasa (Hech. 5:42). Ukhamtï lurañänejja, qhawqsa Jehová Diosar munastan uk uñachtʼayañäni, ukat Jupajj janirakiw uk armkaniti (Heb. 6:10).