Mä machaq qellqataw noviembre phajjsin lakirasini: Diosan Apnaqäwipat Yatiyäwinaka núm. 38
1. ¿Kunsa jiwatanak toqet waljanejj jisktʼasipjje ukat jupanakar yanaptʼañatakejj kunsa noviembre phajjsin lurañäni?
1 Kunarusay maynejj creyiskpan, jiwañajj taqenin uñisiripawa (1 Cor. 15:26). ‘¿Jiwjjapjje uka familiaranakajas ukat munat amigonakajas kunjamäsipkpachasa ukat jupanakamp wasitat jikisiristti?’ sasaw waljanejj jisktʼasipjje. Ukham jisktʼasipki ukar yanaptʼañatakiw Diosan Apnaqäwipat Yatiyäwinaka núm. 38 tratadojj oraqpachan lakirasini, pʼeqeñchäwipajj akham siwa: “¿Jiwatanakajj jaktanipjjpachäniti?” sasa. Noviembre phajjsin nayrïr urut qalltasinwa uka phajjspach lakirasiskani. Uka phajjsi qhepatsa, mayni tratadonakjam lakirasiskakiniwa.
2. Núm. 38 tratadojj ¿kunjam lurtʼatasa?
2 Kunjam lurtʼatasa. Uka tratadojj saytʼur dobltʼañatak lurtʼatawa. Qallt qalltapanjja, mä aski pʼeqeñchäwi ukat aka arunakaw utji: “¿Kamsasmasa? Jïsa, janiwa, inas jaktanipjjchini” sasa. Tratado janjasajja, kunsa Bibliajj uka toqet qhanañchi ukat uk yatiñajj kunjamsa jupanakar yanaptʼi ukwa liytʼirinakajj yatjjatapjjani. Ukatjja, Bibliajj kuntï siski ukajj cheqapunïskiw sasajj kunatsa sissna uksa amuyapjjarakiniwa. Ukat qhepäjjapanjja, yaqha jisktʼaw utjaraki ukat ukaw jukʼamp yatjjatasipkakiñapatak yanaptʼarakini.
3. Núm. 38 tratadjja, ¿kunjamsa lakiraskañäni?
3 Kunjamsa lakirasini. Kunjamtï Jesusan jiwäwip amtañataki ukat kimsa uru jachʼa tantachäwitak invitación lakiraskejja, ukhamwa lakirasirakini. Kawkhantï yatiyktan ukan kunjamsa lakirasini uk irpir chuymaninakaw qhanañchapjjani. Ukjja, 1 de abril 2013 fechani carta katoqapki uka ewjjtʼanakarjamaw lurapjjani. Ukat jiskʼa territorionïpki uka tamanakajja, uka jakʼankir jachʼa territorion tamanakaruw yanaptʼapjjaspa. Yatiyirinakajja, semanan qawqha tratadsa lakirapjjaspa ukakwa apstʼasipjjañapa. Ukat noviembre phajjsin taqe utanakar tratado lakirañ tukuyasjjchi ukat tratadojj jiltʼaskakchi ukhajja, kawkhantï jaqejj walj utjki ukhanwa lakirapjjaspa. Ukat janïr noviembre phajjsi tukuskipan tratadojj pistʼjjani ukhajja, uka phajjsin kuna qellqatampitï yatiyasiñapäki ukampiw yatiyasiñapa. Noviembre phajjsin nayrïr sábado urunjja, Bibliat yatichañ qalltañatak chʼamachasiñat sipansa, tratadonak lakirañatakiw jukʼamp chʼamachasiñäni. Ukat seman tukuyanakajja, wakiskani ukhajj revistanaksa jaytarakiñäniwa. Uka phajjsin tratadonak lakirañatak jichhjatpach wakichtʼasipjjañäni.