Experiencianaka
◼ Australia. Wali yatjjatat John sat chachajja, wawatpachaw Iglesiar sarirïna. Ukat qhepatjja, “Diosajj janipuniw utjkiti” sasaw sisjjäna. Mä urojja, mä precursor jilataw ¿Es la vida obra de un Creador? sat folleto jupar jaytatayna ukat yaqha urusti, El origen de la vida sat folletwa jaytarakitayna. Bibliat jukʼamp yatjjatañ munañapatakejja, kawkïr revistanakatï Diosan luratanakapata jan ukajj Biblian profecianakapat parlki ukanakwa jilatajj sapa phajjsi aparapirïna. Ukat Bibliat jukʼamp yatjjatañ munjjatap amuyjjäna ukhajja, La Biblia... ¿la Palabra de Dios, o palabra del hombre? sat libro churarakïna. Libro liytʼasajja, John sat chachajj “Diosar uñtʼañataki jan chʼamachasir jaqjamätwa” sasaw sisjjäna. Ukat jilatajja, Kunsa yatichi sat librotwa 20 janapat 8 tʼaqa uñachtʼayäna, ukatsti 23, 24 jananakatwa 13 tʼaqat 16 tʼaqakam jupampi yatjjatapjjarakïna. Uka qellqatan Biblian jiskʼa tʼaqanakapajj utjkäna ukajj chuymaparuw purtʼäna ukat akham sänwa: “Bibliat yatjjatañajajj inas wakischispa” sasa.
◼ México. Bibliajj janiw Diosan Arupäkiti sasaw mä chachajj mä jilatar säna. Ukat jilatajja, kunatsa Bibliajj Diosan Arupawa sasajj sissna uk mä qawqhanak uñachtʼayirisma sasaw uka chachar säna. Jupampi walja kuti parlasajja, kuntï Bibliat liytʼkäna ukajj chuymaparuw purtʼäna. Ukat qʼoma sarnaqañ toqet parlki uka jiskʼa tʼaqanakajj chuymap wal chʼalljjtayäna. Ukat jupa pachpaw jilatar akham säna: “Qalltan Biblia liytʼkayätan ukhajj aleq libron ewjjanakapakïkaspas ukham amuyayäta ukat janiw yäqerïkti. Ukampis jichhajja, qʼoma sarnaqañ toqet Bibliat sapa kuti liytʼktan ukhajja, concienciajajj walpun juchañchitu” sasa.
◼ Estados Unidos. Walja jaqenak utjki uka cheqanakan Bibliat apstʼat qellqatanak mä mesar uttʼayasin yatiyaski uka wakiskir wakichäwinwa mä chacha warmejj yatiyasipkäna, ukaruw Taiwán markankir mä warmejj jakʼachasïna, jupajj Jehová Diosan utjatap iyawsänwa, ukampis Bibliajj Inti jalanta toqenkir jaqenakatakïkaspas ukham amuyäna. Ukhams amuykchïnjja, Bibliaw kusisit jakasiñatak yanaptʼitani sasaw atinisïna. Taqe kunapas jupan utjkchïnjja, janis kunanïkaspa ukhamwa wali llakita jikjjatasïna. Ukat uka chacha warmi jilat kullakajja, Kunsa yatichi sat librompi ukat Cómo hallar paz y felicidad duraderas sat folletompiw Bibliat yatichañ qalltapjjäna. Libron 2 yatichäwipat yatjjatañat sipansa, folleton “Una guía para toda la humanidad” siski uka yatichäwipatwa yatjjatapjjäna. Sojjta tʼaqanak liytʼjjasajja, Bibliajj janiw religionanakat parlir yaqha libronakjamäkiti sasaw uka warmejj amuyjjäna. Ukat Biblian kawkïr profecianakapatï phoqasjjäna ukanak liytʼasajja, akham sarakïnwa: “¡Janipuniw Bibliar uñtasit taqe kuns cheqapar sum qhanañchir yaqha librojj utjkaspati!” sasa.
◼ Japón. Mä jilatajja, Diosar jan iyawsiri mä chachampiw parläna. Ukampis jilatajja, ¡Despertad! revistan “¿Casualidad o diseño?” siski uka yatichäwip uñachtʼayañatakiw visittʼaskakïna. Ukat jukʼat jukʼatwa uka chachajj taqe kun Lurir mä Diosajj utjpachawa sasin amuyjjäna. Jichhajja, Diosajj utjaskapuniwa sasaw taqe chuyma iyawsjje, jilatajj Diosan apayanit suma yatiyäwinaka sat folletompiw Bibliat yatichaski.
◼ Canadá. Mä warmejja, utapat mistuwayasin autopar janïr sarjjatkasaw mä revista mä kullakat katoqasïna. Ukat kullakajj utapar visittʼir kutʼkäna ukhajja, janiw uka toqet kuns yatiñ munkti, nayajj Diosan utjatap janiw iyawskti sasaw qhana arumpi säna. Ukampis kullakajj janiw ukhamak qheparkänti, jan ukasti Kunjamatsa wali kusisit jakassna sat folleto aparapiñ amtäna. Uka warmir wasitampi visittʼäna ukhajja, Diosar jan iyawsatamsa yatkstjja, wawamar sapaki uywaskatamwa amtasta ukat yanaptʼañ munsma sasaw kullakajj säna. Ukat folletotwa 4 janapat 6 tʼaqap uñachtʼayäna, ukanjja suma ewjjanak jikjjatañajj kunja chʼamasa uka toqetwa parli. Ukjjarusti 2 yatichäwin ewjjtʼanakajj utjki ukwa liytʼayäna, ukanjja wawanakar uywañjjatwa parli. Ukat taqe chuymaw folleto katoqasïna.