Jukʼamp sum yatiyañataki: khitis Bibliat yatjjatañ muni uk qellqtʼasiñasawa
“Jumapachpat [amuytʼasim] ukhamarak yatichäwimatsa” (1 Tim. 4:16). Pablojj Diosan amuytʼayatäsin Timoteor uka arunakampi ewjjtʼkäna ukajja, jichhakis yatiyirjam mistuskstan jan ukajj walja maranakas yatiyaskstanjja, taqeniw Diosan arunakap jukʼamp sum yatiyañatak chʼamachasiñasa, ukwa ukajj amtayistu. Ukatakejja, Diosan Apnaqäwipat Yatiyañataki sat qellqatanwa mä machaq yanaptʼajj utjani, ukajj “Jukʼamp sum yatiyañataki” sat pʼeqeñchäwinïniwa. Sapa yatichäwinjja, kunjamsa jukʼamp sum yatiysna ukatakiw mä wakiskir ewjjtʼajj utjani. Phajjspachajj ukarjam lurañatakiw wal chʼamañchtʼistani. Phajjsi tukuyarojja, Yatiyañataki Tantachäwinwa kunjamsa uka ewjjtʼajj yanaptʼawayistu uk arstʼaskañäni. Aka phajjsinjja, Bibliat yatjjatañ munapki uk sum qellqtʼasiñasatakiw ewjjtʼistu.
Kunatsa wakiskirejja. Kuntï lurañasäki uk phoqañatakejj janiw yatiyañasakïkiti, jan ukasti Bibliat yatjjatañ munapki ukanakar kuttʼañasawa ukat yatichañasarakiwa. Ukhamatwa Diosan arunakap jukʼamp yatjjatasipkakiñapatak yanaptʼsna (Mat. 28:19, 20; 1 Cor. 3:6-9). Ukatakejja, jupanakar wasitat visittʼañaw wakisi, ukhamatwa kunanakatï jupanakar llakisiyki ukanakat parltʼsna jan ukajj kuntï pasïrin parlawayktan ukanakatsa jukʼamp parltʼaskaksna. Ukatwa Bibliat yatjjatañ munapki ukhajj sum qellqtʼasiñasa.
Kunjamsa uk lursna:
• Kunatï qellqtʼasiñatak munaski taqe ukanakwa maletinasar jan ukajj bolsasar apasiñasa. Ukanakajj qʼoma ukat yäpar qellqtʼatäñapawa ukat sapa kuti visitʼktan uksa qellqtʼasiñasarakiwa.
• Bibliat yatjjatañ munki ukan sutipsa, direccionapsa, telefonopan numeropsa jan ukajj Internetan correop utjchi uksa qellqtʼasiñasawa. Ukat kunsa jupatsa, familiapatsa, amuyawayta ukanaksa qellqtʼasiñasarakiwa.
• Kunanakatsa parltʼawaytan, Biblian kawkïr jiskʼa tʼaqapsa liytʼaraptan, Diosar creyiñat kuns amuyi, kuna qellqatanaksa jaytawaytan taqe ukanakwa qellqtʼasiñasa. Ukat kuna phajjsisa, kunürusa ukat kuna horarus visitʼtan uksa qellqtʼasiñasarakiwa.
• Kunanakatsa jutïrin parltʼañäni uksa qellqtʼasiñasawa. Kuna jisktʼcha jaytawaytan jan ukajj kuna toqet parltʼañcha jupamp amtawaytan ukat kunürus kuttʼañäni uksa qellqtʼasiñasarakiwa.
• Sapa kuti visitʼkasaw wasitampi sum qellqtʼasiñasa. Ukat kunanakay qellqtʼasiñ wakischi uksa qellqtʼasiskakiñasawa.
Aka phajjsejj ak lurañatak chʼamachasiñäni:
• Kuntï qellqtʼaskäta ukjja, khitimpitï sarkäta ukarojj yatiyañamawa.