Machaq tratadonakajj yäparu lurtʼatawa
1. Diosan arunakap yatiyañatakejj ¿kuna machaq qellqatanakas yäpar lurtʼatajja?
1 “¡Diosan Arupajj cheqawa!” sat kimsa uru jachʼa tantachäwinjja (2013 mara), phesqa machaq tratadonakwa katoqawaytanjja. Ukatsti, ¿Jiwatanakajj jaktanipjjpachäniti? (Diosan Apnaqäwipat Yatiyäwinaka núm. 38) sat yaqha tratado katoqawayaraktanjja. Uka sojjta machaq tratadonakajj yäpar suma lurtʼatawa. ¿Kunatsa mayni tratadonakat sipan mayja lurtʼatajja? Utat uta Diosan arunakap yatiykasajj ¿kunjamsa uka machaq tratadonakampejj sum yatiysna?
2. Machaq tratadonakajj ¿kun lurañatakis yanaptʼistani?
2 ¿Kunatsa uka machaq tratadonakajj mayja lurtʼatajja? Jehová Diosan arunakap utat uta sum yatiyañatakejj akanakwa lurtanjja: 1) mä jisktʼampiw parlañ qallttanjja, 2) Bibliajj uka jisktʼarojj kunjamsa qhanañchi ukwa Bibliat uñachtʼaytan, 3) Bibliat apstʼat qellqatanakwa liytʼañapatakejj jayttanjja ukat 4) mayamp visittʼañatakejja, mä jisktʼwa jayttanjja, ukat kunürus uka jisktʼar qhanañchañataki kuttʼañäni ukjja, jupampiw sum amtawayaraktanjja. Machaq tratadonakajj ukanak sum lurañatakiw yanaptʼistu.
3. Diosan arunakap yatiykasajj ¿kunjamsa machaq tratadonak jaytsna?
3 Kunjamsa uka tratadonakampejj yatiysna. 1) Sum arunttʼasinjja, uka tratadon pʼeqeñchäwipan utjki uka jisktʼwa jisktʼañasa, ukat qhanañchañapatak kimsa jisktʼanak uka pachpa janan utjki ukanakat kamsisa uk arstʼañapatakiw mayiñasa, 2) tratado janjasinjja, “¿Kunsa Bibliajj yatichi?” siski ukawjatwa qhanañchtʼañasa. Ukatsti, wakischini ukhajj Bibliatwa uka jiskʼa tʼaqa liytʼarapiñasa. Tiemponïskani ukhajja, “¿Kunjamsa uk yatiñajj yanaptʼätam?” siski uka pʼeqeñchäwit qhanañchañasaraki, 3) tratado jaytasajja, ‘tiemponïkäta ukhajj liytʼaskakitawa’ sasaw chʼamañchtʼañasa, 4) parlañ janïr tukuykasinjja, qhep qhepa janan mä jisktʼajj utjki ukwa liytʼarapiñasa. Uka jisktʼar Bibliajj kunjamsa qhanañchi uk mayan yatjjatañatakiw jupampi amtawayañasa.
4. Bibliat jukʼampi yateqañ munapki ukanakar kuttʼasajja, ¿kunjamsa machaq tratadonakampejj yatichsna?
4 Bibliat jukʼampi yatjjatañ munirinakampi parltʼañatakis janirakiw chʼamäkiti. Kuna jisktʼtï jaytawayktan ukarojja, qhep qhepa janan Bibliat liytʼañatak utjki uka jiskʼa tʼaqanakamp qhanañchtʼañasakiwa. Ukat Suma yatiyäwinaka sat folleton fotop uñstki ukwa uñachtʼayañasaraki. Ukjjarusti, kuna toqettï parlawayktan ukjja, uka folleton jukʼamppach qhanañchi ukwa uñachtʼayañasa. Ukat folleto jaytañatakiw chʼamachasiraksna. Folleto katoqasini ukhajja, yaqha urun yatjjatañatakiw jupampi amtawayaraksna. Ukhamatwa Bibliat yatichañ qalltsna. Jan ukajj folleto jaytañat sipansa, yaqha tratadorakwa jaytsna ukat yaqha uru uka tratadot yatjjatañatakiw amtawayaraksna.
5. ¿Kunatsa machaq tratadonakajj Diosan arunakap yatiyañatakejj wali askejja?
5 Tratadonakampejj 130 jila maranakaw Diosan arunakap yatiyjjtanjja. Ukhat jichhakamajj walja kutiw mayjtʼayasiwayi, ukampis Diosan arunakap yatiyañatakejj wal yanaptʼawayistu. Ukhamajj uka machaq tratadonakampi Oraqpachan yatiyasipkakiñäni (Pro. 15:7a).