¿Kunjamsa tratadonakampejj yatiyañ qalltsna?

Enero 2018 marat aksaruw Cristianjam Jakañataki ukat Yatiyañataki qellqatan nayrïr paginapan yatiyañatak yanaptʼanakajj utjawayi. Ukajj Bibliat apstʼat qellqatanakak jaytañat sipansa Bibliampi parltʼañatakiw chʼamañchistu. Ukham lurañatakejja, “Yatiyañatak yanaptʼanaka” siski ukatak wakichat videonakaw kunjamsa Bibliamp yatiyañ qalltsna uk yatichistu. Ukhamajj utat uta yatiykasajj ¿janit qellqatanakampi yatiyañajj wakisjje? Janiw uk sañ munktanti. Amuytʼañataki, tratadonakajj yatiyañ qalltañatakejj mä suma yanaptʼawa. Tratadonakampejj akhamwa lursna:

1. Qalltapan utjki uka jisktʼwa jaqenakar jisktʼsna, ukat qhanañchäwipat maya ajlliñapatakiw maysna.

2. Ukatjja, payïr página qalltapan utjki uka textwa uñachtʼaysna. Tiemponïskchi ukhajja, tratadon utjki uka yatichäwitwa jupamp yatjjatsna.

3. Tratado churasajja, utapan taqpach liytʼañapatakiw chʼamañchtʼaraksna.

4. Sarjjañatakejja, “Lupʼiñataki” siski uka cheqan jisktʼajj utjki ukwa uñachtʼaysna. Ukat mayanwa uka jisktʼar Bibliampi qhanañchañäni sasaw sissna.

Mayamp kuttʼasajja, “Lupʼiñataki” siski ukan qhanañchäwipatwa yatjjatsna, ukatjja mayan kuttʼañatakiw mä jisktʼa jaytaraksna. Ukjja, Internetan jw.org cheqan jisktʼanakajj utjki ukatwa may ajlltʼsna, jan ukajj tratadon qhep qhepa paginapan mä qellqatajj utjki ukatwa mä jisktʼa ajlltʼaraksna. Wakiskani ukhajja, Diosan apayanit suma yatiyäwinaka sat folletwa jaytsna, jan ukajj Bibliat yatichañatak herramientanakajj utjkistu ukanakatwa may jaytsna.