Jisktʼäwinaka
◼ Ajay toqet nayrar sartapjjañapatakejj ¿kunsa wawanakajj yateqapjjañapa?
Awk taykanakajja, wawanakapar Diosan arunakap yatichañatakiw wal chʼamachasipjje (Efe. 6:4). Sañäni: sapa alwaw Sapür yatjjatañataki sat folletot wawanakapampi yatjjatapjje, ukham yatjjatañajj wali askïtapwa amuyapjje. Familjam Diosar yupaychkasa, jan ukajj yaqha horasanakanwa, mä video uñtasin ukarjam yatjjatapjje, jan ukajj Wayn tawaqunakataki libron mä yatichäwipat parlakiptʼapjje, jan ukajj Biblian utjki uka sarnaqäwinakarjamaw mä dramar uñtat lurapjje. Ukampis wawanakajj ajay toqet nayrar sartapjjañapatakejja, Biblian yatichäwinakapat sumpach yatjjatapjjañapaw wakisi (Heb. 6:1).
Jaqenakarojj kunanaksa yatichtan ukanakat amuytʼañäni. Visitʼktan ukhasa ukat wasitamp kutʼktan ukhasa, ¿Kunsa Bibliax chiqpachapuni yatichi? sat librompi Bibliat yatichañ qalltañatakiw chʼamachastanjja. Uka librompi yatichañ tukuyjjasajja, “Diosan munasiñapan jakasipxañäni” sat librompiw yatichjjaraktanjja. ¿Kunatsa ukham lurtanjja? Kuna laykutejj Kunsa yatichi sat librojj Biblian yatichäwinakap yateqapjjañapatakiw yanaptʼi. Ukampis Diosan munasiñapa sat librojja, Biblian yatichäwinakaparjam sarnaqapjjañapatakiw yanaptʼi. Ukat uka qellqatanakat yatjjatañajja, Bibliat yateqañ qalltasipki ukanakarojj ajay toqet suma “saphintatäpjjañapa[taki]” ukat iyawsäwin suma “uttʼatäpjjaña[patakiw]” yanaptʼi (Col. 2:6, 7). ¿Janit wawanakasarojj uka qellqatanakamp yanaptʼkaraksna? Jïsa, jupanakajj Jesusan loqtasïwipata, Diosan Reinopata ukat jiwatanakajj kunjamäsipkisa ukanak yateqapjjañapawa. Ukat kunatsa Diosajj tʼaqhesiñanak jan jankʼak tukjpacha, qhepa urunakan jakaskatas kunjamats yattan ukanaksa yateqapjjañaparakiwa. Jehová Diosan Qhanañchirinakapjamajj kunatï cheqäki uk yatichatasjja, jupanakajj amuyapjjañapawa ukat Biblian aski yatichäwinakapsa sum amuyapjjañaparaki, ukhamatwa kunatï waliki ukat jan waliki uk “amuytʼasiñjj” yateqapjjani (Heb. 5:14). Cheqas awk taykanakaw wawanakapajj ukanak yateqerjamäpjjeti janicha uk amuyjjapjjañapa. Ukampis walja wawanakajja, jiskʼäsipki ukhatpachwa Biblian yatichäwinakap sum yateqapjje (Luc. 2:42, 46, 47).
Awk taykanakar yanaptʼañ amtampiw jw.org cheqan Kunsa yatichi sat librot apstʼat yanaptʼanakajj utjani. Ukatakejj ENSEÑANZAS BÍBLICAS > JÓVENES siski uka cheqaruw Internetar mantapjjaspa. Jutïrinakatakejja, Diosan munasiñapa sat librotwa jukʼamp yanaptʼanakajj wakichasiskani. Ukat pachpa libronakampis yanaptʼasipjjarakispawa. Ukampis awk taykanakaw Familjama Diosar yupaychkasajj uka yanaptʼanakampi yatjjatañajj wakisispati janicha, jan ukajj sapa mayni wawanakapampich yatjjatapjjani, jan ukajj wawanakaparuch sapa mayni yatjjatapjjañapatak yatichapjjani uk amtjjapjjañapa.