Patak maranakaw Diosan Reinopat yatiyasiski
1. ¿Kun lurapjjañapatakis Rutherford jilatajj chʼamañchäna?
1 Reinon suma yatiyäwinakap Oraqpachan yatiyapjjañapatakejja, Jehová Diosan markaparojj akham sasaw Rutherford jilatajj chʼamañchäna: “Reyejj apnaqjjewa, jumanakaw yatiyiripäpjjtajja. Ukhamasti, Reyita ukat Apnaqäwipat yatiyapjjam, yatiyapjjam, yatiyasipkakim” sasa. Ukhat jichhakamajj niya 100 maranakäjjewa. Uka arunakarojj sum phoqawaytanjja, nayrïr cristianonakjamaw Reinon suma yatiyäwinakap ‘taqe cheqan’ yatiyawaytanjja (Col. 1:23). Pasïr 100 maranakan Diosan Reinopat yatiyañatakejj ¿kunsa lurawaytanjja? Diosan Reinop uttʼasitapat niya 100 maranak phoqaskipanjja, ¿kunjamsa jukʼamp yatiyaskaksna?
2. ¿Kunjamsa qellqatanakasajj Diosan Reinopat yatiyawayapjje?
2 Kunanaksa lurawaytan. Qellqatanakasajj walja maranakaw Diosan Reinopat yatiyaski. Khä 1939 maratwa wali uñtʼat revistasajj Yatiyañataki, Jehová Diosan Apnaqäwipat yatiyaski, sasin uñtʼatäjje. Uka revistajj Reino toqetwa parli ukat kunsa uka Reinojj lurani uksa qhanañcharakiwa. ¡Despertad! sat revistasa, Jehová Diosan Reinopakiw jaqenakatakejj mä suma suytʼäwi apanini sasaw qhanañcharaki. ¡Uka revistanakajj Oraqpachan walja arunakar jaqokipasitapasa, lakirasitapas wal kusisiyistu! (Apo. 14:6).
3. ¿Kunjamanakatsa Diosan Reinop yatiyawaytanjja? Uk mä qawqha qhanañchtʼam.
3 Diosan markapajj kunaymaninakatwa Reino toqet yatiyawayapjje. Qalltanjja, parlanten autonakampi, radio toqe ukat gramófono satäkis ukanakampi. Diosan Reinopat ukham yatiyañajj wali askipunïnwa, mä qawqha yatiyirinakakis utjchïnjja, walja jaqenakaruw yatiyasïna (Sal. 19:4). Aka qhepa maranakanjja, Reino toqet suma yatiyäwinakajj jw.org sat cheqanwa walja apsusiwayi, ukhamatwa walja jaqenakaru ukat kawkhanakantï Diosan arunakap yatiyañajj jarkʼatäki uka markanakarus purtʼasiwayi.
4. ¿Kuna aski wakichäwinakas wakichasiwayi?
4 Reino toqet yatiyasiñapatakejja, aski wakichäwinakwa Jehová Diosan markapajj wakichawayapjje. Sañäni: 1996 maratjja, janiw utat utataki yatiyjjtanti, jan ukasti plazanakana, auto sayañanakana ukat qhatunakanwa yatiyaraktanjja. Jichhanakakiw taqe jachʼa markanakan kawkhantï walja jaqenak utjki uka cheqanakan yatiyañataki amtasiwayi. Walja tamanakaw territoriopan walja jaqenak utjki uka cheqanakan mesanakaru, nuknaqañ jiskʼa carritonakaru qellqatanak uchasa yatiyapjje. Ukhamäkchisa, Reino toqet utat utjja yatiyaskaktanwa (Hech. 20:20).
5. Septiembre phajjsitjja, ¿kunanak lurañas wali askïni?
5 Kunanakampis lurasini. Aka septiembre phajjsitjja (inicio del año de servicio 2015) waljaniw precursor regularjam Jehová Diosar serviñ qalltapjjani. ¿Jumajj qalltarakïtati? Jan ukhamäkchejja, ¿mä qawqha kutikis precursor auxiliarjam serviñ amtasktati? Precursorjamas irnaqchïta janisa, Reino toqet jukʼamp yatiyañatak chʼamachasitamatjja, Jehová Diosajj bendecïtamwa (Mal. 3:10).
6. Aka octubre phajjsejj ¿kunatsa wali wakiskir phajjsïni?
6 Diosan Reinop uttʼasitapatjja aka octubre phajjsirojj patak maranakaw phoqasjjani. Ukhamajj uka phajjsinjja, yatiyir sarañataki Yatiyañataki revistajja, Reino toqetwa jukʼamp qhanañchani. Uka revista walja jaqenakaru churañataki chʼamachasipjjañäni. Nayrar uñtasa ‘Diosan Reinopat’ suma yatiyäwinak yatiyasipkakiñäni istʼañ munapki ukanakaru (Hech. 8:12).