Profetanakat yateqasipjjañäni: Nahúm
1. ¿Kunsa Nahúm librot yateqtanjja?
1 Jehová Diosajj uñisirinakaparojj mutuyiwa sasaw Nahúm chachajj arsuwayäna, uka arunakajj cheqätapjja nayra Nínive markan laqayanakapaw uñachtʼayistu. Cheqas Diosarojj janiw khitis saykatkaspati (Nah. 1:2, 6). Nahúm chachan profecía arunakapat sum yatjjatañajja, yatiyañatakejj yanaptʼistaspawa.
2. Yatiyktan ukajj suma yatiyäwinakawa sasajj ¿kunatsa sistanjja?
2 Chuymachtʼapjjañäni ukat yanaptʼapjjañäni. Nahúm libronjja, jachʼa jachʼa tukur nayra Asiria markan Nínive sat capitalap contra juchañchäwi arunakakis utjkaspa ukhamaw amuyasi (Nah. 1:1; 3:7). Ukampis Diosan markapatakejja, uka arunakajj wali askïnwa. Uñisirinakamajj niyaw tukjatäjjani sasaw parte judionakarojj chʼamañchäna, kunattejj Nahúm sutejja, “Chuymachiri” sañwa muni. Ukat Jehová Diosajj “llakisiñ horasansti arjjatasirirakiwa” sasaw chuymacharakïna (Nah. 1:7). Yatiykasajja, jaqenakarojj ukhamarakiw suma yatiyäwinak yatiytanjja, Jehová Diosar confiyapjjañapatakiw yanaptʼtanjja (Nah. 1:15).
3. Nahúm chachjamajja, ¿kunjamsa yatiykasajj uñachtʼäwinakampi parlsna?
3 Uñachtʼäwinakamp yatichapjjañäni. Jehová Diosan amuytʼayatajja, kunas Nínive markar pasani uk qhanañchañatakejj Nahúm chachajj Egipto markankir Tebas (jan ukajj No-amón) sat markat parläna (Nah. 3:8-10). Aka ñanqha pachan tukusiñapat jaqenakar parlkañäni ukhajja, kunjamsa Jehová Diosajj arunakapar sum phoqe uk amuytʼayañatakejj Biblian profecianakapatwa qhanañchañasa. Sañäni, 632 nayrïr pacha maranjja, Babilonia, Media sat markanakajj mayachtʼasisaw Nínive marka contra nuwasipjjäna. Wal jalluntatap laykojj Tigris sat jawirajj qʼal phullchhiräna, ukatsti uka markan mä parte perqanakapajj tinkjjänwa. Nínive markajj katuntataw uñjasïna, kuntï Jehová Diosajj arsuwaykäna ukajj phoqasïnwa (Nah. 1:8; 2:6).
4. Diosan arunakap yatiykasajja, ¿kunjamsa qhana ukat amuykaya parltʼsna?
4 Qhana ukat amuykay arunakampi parlapjjañäni. Nahúm chachajja, amuytʼkaya, qhana ukat chuymar purtʼkirwa profecianak qellqäna (Nah. 1:14; 3:1). Ukhamarakiw kuntï parlktan ukajj taqenin amuytʼkayäñapa (1 Cor. 14:9). Jaqenakar visitʼkasajja, kunatsa visitʼtan uk qhan yatiyañasa. Bibliat yatichasktan ukanakarojj Diosar iyawsañapataki ukat Bibliaru confiyañapatak yanaptʼapjjañäni, ukat kunjamsa kuntï yateqasipki ukajj jupanakar yanaptʼi uk amuyañapatakis yanaptʼapjjarakiñäni (Rom. 10:14).
5. Nahúm chachan profecianakapajj ¿kunjamsa yanaptʼistu?
5 Jehová Diosan arupajj phoqasipuniniwa sasin Nahúm chachan confiyirïtapajj sutip apki uka libron qhanaw amuyasi. Supayan apnaqata akapachan tukusiñap jakʼachasinkipanjja, Jehová Diosan aka arunakapaw wal chuymachistu, Jupajj akham siwa: ‘Llakisiñajj janiw pä kuti saytʼaskaspati’ sasa (Nah. 1:9).