Jehová Diosar uñtʼañapatak juykhunakar yanaptʼañäni
1. ¿Kunjamsa Jesusajj juykhunakat llakisitap uñachtʼayäna?
1 Jesusajj Jericó markat niy sarjjañampïskäna ukhajja, akham sasaw pä juykhunakajj jupar artʼapjjäna: “¡Tata, Davidan Yoqapa, khuyaptʼayasipjjetay nanakata!” sasa. Jesusajj jiwañap jakʼäjjatap yatisajja, wali llaktʼatäskpachänwa. Ukhamäkchïnsa, jupanakar istʼasinjja, jawsänwa ukat qollarakïnwa (Mat. 20:29-34). ¿Kunjamsa jupjam khuyaptʼayasirïñ yateqassna?
2. ¿Kunjamsa juykhunakampi callen jikisisajj Diosan arunakap yatiysna?
2 Yanaptʼapjjañäni. Mä juykhumpi callen jikisiñäni ukhajja, jankʼakiw khitïtansa uk yatiyañasa ukat yanaptʼañasaraki. Qalltanjja, inas jupajj jiwasampi parlañ ajjsarayaschini, kunattejj sapakutiw juykhüpan jiskʼachapjje, jan walinak lurapjje. Jiwasatï munasiñampi parljjaytʼañäni ukat jupanakat llakisitas uñachtʼayañäni ukhajja, inas jan ajjsarayaskchiniti. Ukampis juykhunakajj mayj mayjapjjewa, yaqhepajj jukʼampi juykhüpjjewa yaqhepasti janiraki, cheqas ukarjamaw jupanakar yanaptʼsna. ‘Nanakajj Bibliatwa jaqenakar yatichasipkta’ sasaw saraksna. Ukjjarusti, Bibliatwa liytʼarapiñasa, inas Salmo 146:8 jan ukajj Isaías 35:5, 6 liytʼarapsna. Jupatï braille letranakani qellqat liytʼañ yatchi ukhajja, ‘Bibliat apstʼat yaqha qellqatanakwa apanirapirisma ¿munasmati?’ sasaw jisktʼaraksna. Ukat Internetan jw.org cheqat kunjamsa grabacionanak apaqaspa uksa yaticharaksnawa. Jupatï uka qellqanakani qellqatanak liyiri computadoranïchi ukhajja, inas Internetan jw.org cheqan qellqatanak utjki ukanak istʼarakchispa ukat Formato de texto enriquecido (RTF) sasin uñtʼatäki uka formatot apaqarakchispa. (“Juykhunakar yanaptʼkasajja. . .” siski uka recuadro uñjjattʼäta.)
3. ¿Kunjamsa territoriosankir juykhunakarojj jikjjatsna?
3 Juykhunakar thaqapjjañäni. Utat uta yatiykasajja, janiw juykhunakarojj jikjjatktanti, jupanakajj jan uñtʼatanakarojj janiw punkup jistʼarapkiti. Ukhamajja, jupanakar Diosan arunakap yatiyañatakiw chʼamachasiñasa (Mat. 10:11). ¿Yateqeri jan ukajj trabajir masinakasat juykhojj utjiti? Utjchi ukhajja, jupanakaruw Diosan arunakap parlañasa. Territoriosantï juykhunakatak kuna escuelas utjchi ukhajja, directoraruw braille letranakani Bibliat apstʼat qellqatanak bibliotecapataki munchi ukhajj aparapsna. Inas mä familian juykhu utjatap yatstan. Territoriosan inas kuna organizacionas juykhunakar yanaptʼir utjchi, jan ukajj usurnukstatanakar uñjapki uka utanakan juykhunakajj utjchi. Jupanakan familianakaparu, uka utan katoqtʼiriru jan ukajj escuelankir directoraruw ‘braille letranakani Bibliat apstʼat qellqatanakaw utjapjjetu’ sasin yatiysna. Ukat ‘grabacionanakas jupanakatak utjarakiwa’ sasaw saraksna. ‘Diosajj jan mayampitakiw taqe juykhunakar qolljjani’ sasaw Bibliat qhanañchtʼaraksna. Ukat “No sé qué haría sin ella” siski uka video Internetan jw.org sat cheqan uñachtʼayaraksna. Uka videonjja, kunjamsa mä juykhu jilatajj braille letranakani Bibliat sum yatjjatatayna, ukaw qhanañchasi. Kunatsa visittʼasktan uktï sum qhanañchtʼañäni ukhajja, walja juykhunakaruw jikjjatsna.
4. Janet sat kullakan experienciapat ¿kunsa yateqsna?
4 Janet sat mä juykhu kullakajja, kawkhantï juykhunakajj qamapki uka utar visittʼiriw saratayna, ukanjja mä tawaqompiw parltʼatayna. Kullakajj akham siwa: “Jesusajj aka Oraqenkkasajja, kunsa jutïrin juykhunak layku lurani ukwa mä qawqha juykhunakar qollasajj uñachtʼayäna” sasa. Ukat kuntï Apocalipsis 21:3, 4 qellqatan siski ukwa yatjjatapjjäna, ukatjja kunjamsa Diosan Reinopajj taqe ukanak phoqani uksa qhanañchtʼarakïnwa. Uka tawaqojj mä jukʼa lupʼisajja, akham sänwa: “Janipuniw khiti juykhus ukham parlirïkituti. Jan juykhüpki ukanakat jila partejja, jiwasas kuna jan wal lurksna jan ukajj nayra awk taykanakasan jan wali luratap laykus juykhuksna ukhamwa amuyapjje” sasa. Janet kullakajja, correo toqew Kunsa yatichi sat libror mantañatak utjki uk apayäna, jichhajja jupampejj semanan pä kutiw Bibliat yateqasipki.
5. Jiwasajj janiw juykhunakar qollksnati, ukampis ¿kunjamsa yanaptʼsna?
5 Jiwasajja, janiw Jesusjamajj juykhunakar qollqksnati. Ukampis akapach apnaqer diosajja, mä arunjja, Supayajj walja jaqenakan amuyunakap chʼamaktʼayi, jupanak taypin juykhunakas utjarakiwa. Ukhamajja, kunatï cheqäki uk Diosan Arupat amuyapjjañapatakiw jupanakar yanaptʼañasa (2 Cor. 4:4). Jesusajja, Jericó marka jakʼan pä juykhunakar uñjasinjja, khuyaptʼayasiñapatwa qolläna (Mat. 20:34). Jiwasatï juykhunakat khuyaptʼayasstan ukhajja, Jehová Diosar uñtʼapjjañapatakiw yanaptʼañäni, cheqas Jupakiw qollaspa ukat wiñay jakañsa churarakispa.