Diosan Arupat yatichañatak yanaptʼanaka
1. Diosan arunakap yatirinakajj ¿kunanakansa artesanonakampi niya pachpakïpjje?
1 Artesanonakajj walja herramientanak apnaqapjje. Yaqhep herramientanakap awisakiw apnaqapjje, yaqhepsti sapa kutiw apnaqapjjaraki. Wali yatjjattʼat mä artesanojja, kawkïr herramientanakatï wakiski ukanak jupa chikapuniw apnaqasi, ukanak apnaqañsa sumarak yati. Cristianonakajj yatiyañ toqet wali suma wakichtʼata, ‘jan kunatsa phenqʼasisaw irnaqañapa’ sasaw Bibliajj qhanañchi (2 Tim. 2:15, MT). Jaqenakar Bibliat yatichañatakejj Diosan Arupaw wali wakiskirejja, ukampiw Jesusan ‘arkiripar tukupjjañapatak’ yanaptʼtanjja (Mat. 28:19, 20). Ukatwa Diosan ‘cheqa arupjja yäparu apnaqañataki’ chʼamachasiñasa. Ukampis yatichañatakejj yaqha yanaptʼanakaw utjarakistu, ukanak sum apnaqañatakiw cristianonakajj chʼamachasiñasa (Pro. 22:29).
2. Bibliat jaqenakar yatichañatakejja, ¿kuna yanaptʼanakas utjistu?
2 Jaqenakar yatichañatak yanaptʼanaka. Jaqenakar Bibliat yatichañatakejj janiw Biblia sapaki utjkistuti, ¿Kunsa Bibliax chiqpachapuni yatichi? sat librompiw yatichtanjja. Uka libro tukuyasajja, “Diosan munasiñapan jakasipxañäni” sat librompiw yanaptʼaraktanjja, ukajj Biblian yatichäwinakaparjam sarnaqañatakiw yanaptʼi. Ukatwa uka pä libronak sum apnaqañatak chʼamachasiñasa. Bibliat jaqenakar yatichañatakejja, Diosan apayanit suma yatiyäwinaka sat folletos utjarakistuwa, ukajj Bibliat yatichañ qalltañatakejj wali askiwa. Territoriosantï jan sum liytʼasirinak utjchi, jan ukajj Bibliat apstʼat qellqatanakas uka arut jukʼaki utjarakchi ukhajja, Diosar istʼañäni jan ukajj Diosar istʼañäni ukat wiñayatakiw jakañäni sat folletonakampiw yaticharaksna. Diosan markapar uñtʼapjjañapatakejja, ¿Khitinakas Jehová Diosan munañap lurasipki? sat folletow mä suma yanaptʼaraki. Jesusan arkiripar tukuyañatakejja, ¿Kunatsa Bibliat yatjjatañama?, ¿Kunjamsa tantachäwinakajj apasi?, ukat ¿Tiene Dios un nombre? sat videonakasa ukat yaqhanakas utjarakiwa, ukanak apnaqañsa sumarak yatiñasa.
3. Diosan Apnaqäwipat Yatiyañataki sat qellqatanakan mistkani ukajj ¿kun lurañatakis yanaptʼistani?
3 Diosan Apnaqäwipat Yatiyañataki sat qellqatanakanwa, uka yanaptʼanak sum apnaqañatakejj yatichistani. Ukanak sum apnaqañataki chʼamachasiñäni ukhajja, aka ewjjtʼar istʼataswa uñachtʼayañäni: “Jumapachpat imasim ukhamarak yatichäwimatsa, taqe kunansa chʼamani tukum. Ukhamtejj lurätajja jumapachpaw qhespiyasïta, ukhamarak khitinakatejj jumar istʼapktam ukanakarus qhespiyarakïtawa” sasa (1 Tim. 4:16).