Kunsa yatichi sat librompejj ¿kunjamsa yatichsna?

Yateqerinakajj jukʼat jukʼata Bibliat yatjjatapjje ukat kuntï yateqapki ukarjam sarnaqapjje ukhajja, jankʼakiw ajay toqet nayrar sartapjje (Sal. 1:1-3). Jiwasatï Kunsa yatichi sat libro sum apnaqañ yatiñäni ukhajja, ajay toqet nayrar sartapjjañapatakiw yateqerinakasar yanaptʼañäni.

Qallta jisktʼanaka. Sapa yatichäwejj mä qawqha jisktʼanakampiw qallti, qhanañchäwipajj uka pachpa yatichäwinwa utjaraki. Ukhamajja, uka jisktʼanakwa yatjjatañ munañapatakejj jisktʼsna. Jan ukajj sapa jisktʼarjam mä jukʼa qhanañchañapatakis mayiraksnawa. Inas jupajj jan sum qhanañchkchiniti, ukampis janiw uka ratpacha kunjamäkiti uk qhanañchtʼañajj wakiskiti, antisas yatichkañäni ukhaw uka toqet sum qhanañchjjañasa (Pro. 16:23; 18:13).

Jukʼampi yatjjatañataki. Yateqeritï uka yatichäw sum amuyjjchi ukhajja, “Jukʼampi yatjjatañataki” siski uk jupa pachpa yatjjatañapatakiw ewjjtʼaraksna. Ukat mayan yatichkañäni ukhaw sumti amuyi, janicha uk yatiñatak mä qawqhanak jisktʼsna. Ukampis wakischini ukhajja, yatichktan ukhaw “Jukʼampi yatjjatañataki” siski uk jupampi taqpach yatjjatsna jan ukajj mä jukʼaksa yatjjataraksna. Nayraqatjja, tʼaqanak liytʼañasawa ukat mä qawqha jisktʼanakwa jisktʼaraksna, ukampis jayäkipanwa jisktʼañatakejj wakichtʼasiñasa.

Amtañatak recuadro. Sapa yatichäw tukuyanjja, qalltan jisktʼanak utjkäna ukan qhanañchäwipaw mä recuadron utji. Ukanak yateqerimpi yatjjatañäni ukhajja, amuyaskiti janicha uk sum amuyañäni. Ukhamajja, jupampiw uka qhanañchäwinaka ukat Biblian jiskʼa tʼaqanakap liytʼañasa. Ukjjarusti, kunatsa uka recuadron qhanañchaski ukajj cheqäskapuniwa sasin amuyi uk Biblian jiskʼa tʼaqanakapampi yanaptʼasis qhanañchtʼañapatakiw mayiñasa (Hech. 17:2, 3).