JW Library sat yanaptʼa

JW Library sat yanaptʼajja, computadoraru, tabletaru jan ukajj celularar inakiw Internetat apaqasispa. Ukarojj Biblia, yaqha qellqatanaka, videonaka ukat istʼañatak grabacionanakwa apaqsna.

¿KAWKINSA UK JIKJJATASMA? Internetanwa JW Library sat yanaptʼajj utji. Ukasti celularanakaru, tabletanakaruw apaqasispa. Internetar mantasajj kuna qellqatanaksa apaqañ munta ukanakwa celularamaru ukat tabletamar apaqasma. Utamantï Internetajj jan utjkchi ukhajj inas Tantachasiñ Utaru jan ukajj kawkhantï inaki Internetajj utjki uka cheqanakar sarchisma. Celulararu jan ukajj tabletaru mä qellqata apaqasajja, janiw Internetar mantañajj wakisjjaniti jan ukasti cheqakwa maynejj liytʼjjaspa. Ukampis JW Library yanaptʼajj sapa kutiw mayjtʼayasi. Ukhamajj kuna machaq yanaptʼanakay utjchi ukanak apaqañatakisa Internetar mantañaw wakisispa.

¿KUNATSA UKA YANAPTʼA APAQASIÑAMA? Tantachäwitakisa, Bibliat sapaki yatjjatañatakisa JW Library yanaptʼajj wali askipuniwa. Diosan arunakap yatiyir sarktan ukhas yanaptʼarakistaspawa. JW Library yanaptʼampejj taqe cheqanwa yatiysna.