¿Internetan jw.org cheqar apir tarjetanakamp yatiyasktanti?

Jachʼa tʼaqhesiña urojj wali jakʼankiwa, ukatwa jaqenakar jankʼak yatiyañajj wakisi (Pr 24:11, 12, 20). Jaqenakar yatiyañatakejja tarjetanakaw yanaptʼistaspa, ukajja Diosan Arupa liytʼañataki ukhamarak Internetan jw.org cheqar mantañatakiw chʼamañchi. Ukatsti ¿Kunatsa Bibliat yatjjatañama? sat video uñtañatakisa, jukʼampi yatjjatañ munañapataki jan ukajj Bibliat yatjjatañ munapki ukanakan qellqtʼapjjañapatakisa mä codigow (QR) Internetar mantañatak utjaraki. Yaqhepanakajj janiw Bibliat apstʼat qellqatanak munapkiti, ukampis Internetan jw.org cheqar mantañ munapjjaspawa. Ukhamajja tarjeta jaqenakar churañ jan ajjsarañäniti. Janiw chʼusa utanakarusa ukhamarak Diosat jan kunsa yatiñ munapki ukanakarus jaytañasäkiti.

Kun lurkasasa akham sasaw jaqenakar tarjeta chursna: “Aka tarjeta churañ munsma, aka tarjetajja Internetan jw.org cheqar mantañataki ukat uka cheqar mantas kunayman toqet parlir yatichäwinaka ukat videonak uñjañatakiwa” sasa (Jn 4:7). Tarjetanakajja jiskʼakiwa, ukhamasti taqe cheqaruw apassna ukhamatwa kawkhankkasas tarjetampi yatiysna.