Internetan jw.org cheqan qallta paginapampiw predicasma

Internetan jw.org cheqankir qallta paginapanjja, videonaka, Bibliat apstʼat yatichäwinakaw utji, ukajj suma chuyman jaqenakan chuymapar purtʼañatak wakichtʼatawa (Hch 13:48). Uka cheqanwa kunanakattï noticianakan parlaski uka temanakajj mistu, jan ukajj kunatï jaqenakar llakisiyki uka temanakajj mistu.

¿Kunjamsa Internetan jw.org cheqankir qallta paginapampejj predicasma?

• Kunanakas Internetan jw.org cheqan mistu ukanak uñjañamapuniwa. “Akanak liytʼañamapuniwa” siski uka cheqan uñstki uka yatichäwinak uñjam, kunjamsa ukanakampejj jaqenakar parltʼasma ukwa amuytʼañamaraki (“Akanak liytʼañamapuniwa” siski uka cheqan kuna yatichäwinakas jichhak mistutayna uk uñjañatakejja, “Jukʼampinaka” siski ukaruw limtʼañama). Ukanjja wali wakiskir yatichäwinakwa predicañatakejj jikjjatäta, ukaw sum predicañatak yanaptʼätam.

• Internetan jw.org cheqankir qallta paginapan videonaka, Bibliat apstʼat yatichäwinakajj utjki ukampiw parltʼañ qalltasma. Kunanakas jaqenakar llakisiyi uk amuytʼañatakiw ukanakajj yanaptʼiristam.

• Internetan jw.org cheqankir qallta paginap uñachtʼayam. Wakiskir temanakwa qhanstayañama, kunjamsa jukʼamp yatichäwinak thaqtaspa ukwa uñachtʼayañama.

• Mantañapatakejj mä enlace aptʼayañama. Yaqhepanakajj janiw jiwasanakamp parlañ munapkiti. Ukampis Internetan utjkistu uka cheqarojj mantañ munapjjewa. Bibliat jukʼamp yatiñ munapki ukanakarojja, Internetan jw.org cheqankir qallta paginapar mantañapatakiw mä enlace aptʼayasma, jan ukajj mä yatichäwiru, mä videor mantañapatakiw mä enlace aptʼayasma. Jan payachasisaw aptʼayañama.