Taqe kun Luriri Diosasajj wal munasistu jiwasatsa llakisirakiwa
1. JUPAW INTI JALSUYI
¿Aka oraqen intejj jan utjkaspa ukhajj kunjamakïspasa? Intin utjatap laykuw qoqanakajj laphinïpjje, panqarapjje, achunïpjje, jathanïpjjaraki. Intirakiw qoqanakan saphip toqe oraqet uma chʼamsus laphinakapar puriñapatak yanaptʼi, ukatsti jumpʼsjjarakiwa.
2. JUPAW JALLU PURIYI
Jallojj Diosan mä suma regalopawa, ukaw aka oraqen achunaka utjañapatak yanaptʼi. Diosaw alajjpachat jallu puriyani, ukïpanwa suma cosecha tiemponakas utji, manqʼañanakas utjaraki, ukatwa kusisita jakasiraktanjja.
3. JUPAW ISSA MANQʼSA CHURISTU
Walja awk taykanakaw familiapan isisa manqʼañanakas jan faltañapatak llakisipjje. Diosan Arupajj akham siwa: “Jamachʼinakar sum uñtapjjam, jupanakajj janiw phawapkisa, ni yawipkisa, janirakiw manqʼsa imañanakar apthapipkiti. Jupanakarojj alajjpachankir Awkimaw manqʼayi. ¿Janit jumanakajj uka jamachʼinakat sipansa jukʼamp valoranïpkta?” sasa (Mateo 6:25, 26).
“Kunjamsa lirio panqaranakajj pampanakan jilaski uk sum amuyapjjam [...], janiw ni [rey] Salomonas wali qamirïkasajj uka panqaranakjam sum isthapiskänti. Uka alinakarojj Diosaw ukha sum isthapiyi [...], ¿janit jumanakarojj ukham isthapiyapkätamjja?” (Mateo 6:28-30).
Niyakejjay Diosajj manqʼañsa issa churchistojja, kunatï wakiski ukjja churarakistaspawa. Diosan munañaparjam kuns lurtan ukhajja, Jupaw manqʼaña jikjjatañatak chʼamachasitasarojj bendisistaspa, jan ukajj kunatï jakañatak munaski uk alasiñatakis trabajo jikjjatayistaspa (Mateo 6:32, 33).
Intita, jalluta, jamachʼinakata, panqaranakat lupʼtan ukhajja, Diosarojj jukʼampiw munastanjja. Akjjar jutki uka yatichäwinjja, Diosajj kunjamsa jaqenakamp parläna ukwa yatjjatañäni.