Kusisitaw suma yatiyäwinak yatiyañasa

Awisajj janiw Diosan arunakap yatiyir sarañ munktanti, taqeniw ukham uñjastanjja. ¿Kunatsa? Inas jaqenakajj jan istʼañ munapkchiti, jan ukajj jaqenakamp parlañ ajjsarstan, ukanakaw aynachtʼayistaspa. Ukampis Jehová Diosajj kusisit Diosawa, juparojj kusisita sirvsna ukwa munaraki (Sl 100:2; 1Ti 1:11). Ukhamasti kunatsa kusisita yatiyir sarañajj wakisi uk kimsa toqet yatjjatañäni.

Maya, jutïrin sumaw jakasjjañäni sasaw yatiytanjja. Jaqenakajj kunas jutïrin pasani ukjjat wal llakisipjje, janirakiw kuna suytʼäwinïpkisa. Yatiyir sarasajja, “suma kusiskañ yatiyäwinak” jaqenakar yatiytanjja (Isa 52:7). Diosan Reinopat suma yatiyäwinakajja, jiwasarojj kusisiyarakistuwa. Janïr yatiyir mistkasajja, kuna bendicionanaksa Diosan Reinopajj apanini uka toqetwa lupʼiñasa.

Paya, suma yatiyäwinakajja waljaniruw sum jakasipjjañapatakisa Diosar uñtʼapjjañapatakis yanaptʼi. Jan walinak jaytasajja jupanakajj Diosatakjam sarnaqañ qalltapjje, jutïrinsa wiñayaw jakasipjjarakispa (Isa 48:17, 18; Ro 1:16). Ukatakejj jaqenakar salviri mä jaqet parltʼañäni. Yaqhep jaqenakajj janis salvasiñ munapkchejja, jupajj khitinakatï salvasiñ munapki ukanakar thaqaskakiwa, jiwasajj ukhamarakiw lurañasa (Mt 10:11-14).

Kimsa, yatiyir sarasajj Jehová Diosaruw jachʼañchasktanjja. Ukaw taqe kunat sipansa jukʼamp wakiskirejja. Diosatakejj yatiyir sarañajj wali wakiskiriwa (Isa 43:10; Heb 6:10). Ukatwa Diosajj espíritu santopampi yanaptʼistu. Ukhamajj kusisita yatiyir sarañatakejj Diosaruw yanaptʼa mayisiñasa (Gál 5:22). Diosaw yatiyañatak yanaptʼaskistani, janiw yatiyir sarañ ajjsarañasäkiti (Hch 4:31). Jaqenakajj janis istʼañ munapkchejja, yatiyirejj saraskakiñasawa (Eze 3:3).

¿KUNAS DIOSAR KUSISIT CHUYMAMPI SERVISKAKIÑATAK YANAPTʼAWAYITU? SAT VIDEO UÑTASAJJA, AKA JISKTʼANAKARUW QHANAÑCHTʼÄTA:

• Phajjsin walja horanakas yatiyir sarkstanjja, ¿kunatsa Diosat yatjjatañajj nayrankañapa?

• ¿Kunjamsa María kullakat yateqassna?

• ¿Kunapachas Diosan Arupat lupʼta?

• ¿Kunas suma yatiyäwinak yatiyir saratamat wal gusttamjja?