“Diosar jakʼachasipjjam, jupajj jumanakar jakʼachasirakiniwa” (Santiago 4:8).
¿Diosajj oracionanakas istʼpachati?
¿‘Diosajj janiw oracionanakaj istʼkiti’ sasin sirïtati? Waljaniw ukham sapjje. Jan walinakan uñjasisajj waljaniw Diosar yanaptʼa mayisipjje. Ukampis problemanakapajj janiw chhaqtkiti. Ukhamajja, ¿Diosajj janiw oracionanakas istʼkiti sissnati? Janiwa. Kunjam orasiñastï jupajj munki ukham orastan ukhajja, Diosajj istʼistuwa sasaw Bibliajj qhanañchi. Uk jichhajj yatjjatañäni.
DIOSAJJ ORACIONANAKAS ISTʼIWA
“Jumajj mayisitanakar istʼirïtawa. Taqe jaqenakaw jumarojj makhatapjjtam” (Salmo 65:2).
Yaqhep jaqenakajj sum jikjjatasiñ laykukiw Diosar orasipjje, ukampis ‘janiw khitis oracionanakas istʼkistuti’ sasaw amuyapjje. Oracionajj janiw sum jikjjatasiñatakikisa jan walinakar saykatañatakikisa yanaptʼkistuti. Bibliajj akham siwa: “[Jehová]a Tatitojj artʼasirinakapan jakʼapankaskiwa, taqpach chuymamp jupat artʼasirinakan jakʼapankiwa. [...] Arnaqasitanakap istʼi” sasa (Salmo 145:18, 19).
Ukhamajja, Jehová Diosajj servirinakapan oracionanakap istʼiwa. Jupajj munasiñampiw akham sistu: “Jumanakajj nayaru artʼasipjjetäta, ukatsti nayan ukaruw jutapjjarakïta, nayaru mayisisa, nayasti mayisitanakamjja istʼapjjarakïmawa” sasa (Jeremías 29:12).
DIOSAJJ JUPAR ORASIÑAMWA MUNI
“Oración lurapjjapunim” (Romanos 12:12).
Bibliajja, oración jan jaytjas lurañataki, taqe horasan mayisiñatakiw chʼamañchistu. Ukhamajja, Jehová Diosajj jupar orasiñaswa muni (Mateo 26:41; Efesios 6:18).
¿Kunatsa Diosajj jupar orasiñas muni? Akham amuytʼañäni, awkinakajja, wawanakapajj jupampi yanaptʼayasiñ munapki ukhajj wal kusisipjje. Wawapajj kunsa muni, kunjamas jikjjatasi uk inas awkejj yatjjchi, ukampis wawapar istʼasajja, wawapajj jupar confiyatapa, jupar munasitapwa amuyi. Jiwasajj Jehová Diosar orasktan ukhajj ukhamarakiw jupar confiyatasa, jupar jakʼachasiñ munatas uñachtʼaytanjja (Proverbios 15:8; Santiago 4:8).
DIOSAJJ JUMAT LLAKISIWA
“Taqe llakinakam jupan amparapar katuyapjjam, jupajj kunatï jumanakar pasapktam ukanakat wal llakisi” (1 Pedro 5:7).
Diosajj jiwasar wal munasistu, wal jiwasat llakisiraki, ukatwa jupar orasiñas muni. Jupajja, kuna jan walinakansa uñjastan uk sumwa yati, yanaptʼañ wal munarakistu.
David reyejja, Jehová Diosaruw yanaptʼa mayisirïna. Kunsa amuyäna, kunjamakis jikjjatasïna uks Diosar yatiyarakirïnwa (Salmo 23:1-6). ¿Kunjamsa Diosajj Davidar uñjäna? Wal jupar munasïna, taqe oracionanakapwa istʼarakïna (Hechos 13:22). Diosajj ukhamarakiw jiwasat llakisi, ukatwa oracionanakas istʼi.
“NAYAJJ TATITURUW MUNASTA, MAYISITAJAR ISTʼATAP LAYKU”
Uka arunakajj Salmo libron qellqatawa. Uka arunak qellqerejja, ‘Jehová Diosajj oracionanakaj istʼapuniwa’ sasaw confiyäna, ukaw jupar wal yanaptʼäna. Diosan jakʼapankkaspasa ukham amuyasiñatakiw ukajj yanaptʼäna, jan walinakar saykatañatakis yanaptʼarakïnwa (Salmo 116:1-9).
‘Diosajj oracionanakaj istʼapuniwa’ sasin jan pächaskañäni ukhajja, orasipuniñäniwa. Pedro chachat parltʼañäni, jupajj España markan norte toqenwa jakasi. Jupan yoqapajj 19 maranïkäna ukhaw automp accidentasisajj jiwäna. Ukham jan walin uñjasisajja, Pedrojj Diosaruw kunjamakis jikjjatasïna uk yatiyäna, ‘chuymachtʼita, yanaptʼita’ sasaw mayisirakïna. ¿Kunas ukat pasäna? Pedrojj akham siwa: “Jehová Diosajj oracionanakaj istʼitänwa. Jilat kullakanak toqew Diosajj nayarusa esposajarus chuymachtʼapjjetäna yanaptʼapjjarakitäna” sasa.
Jehová Diosajja, walja kutiw amigonakas toqe yanaptʼapsa munasiñapsa uñachtʼayistu.
Cheqans janiw wal orasipjjatap laykojj yoqapajj jaktankänti, ukampis oracionajj Pedrorusa familiaparus yanaptʼänwa. Esposapajj María del Carmen satawa, jupajj akham siwa: “Orasiñaw llakimp jan aynachtʼañatak yanaptʼitäna. Orasisajj janiw sint llakisjjayätti, sumakëjjarakiyätwa, ukhamatwa Jehová Diosajj kunjamakis jikjjatasiyäta uk sum amuyatap yatiyäta” sasa.
Bibliasa walja jaqenakan experiencianakapasa, Diosajj oracionanak istʼatapwa uñachtʼayistu. Ukampis Diosajj janiw taqpach oracionanak contestkapuniti. ¿Kunatsa Diosajj taqe oracionanak jan contestki?
a Diosan sutipajj Jehová satawa sasaw Bibliajj qhanañchi (Salmo 83:18, TNM).