¿Akapachajj tukusjjpachäniti?

Bibliajj akapachan tukusiñapatwa parli, inas jumajj uk yatchiyäta (1 Juan 2:17). Ukampis ¿taqe jaqenakaw tukjatäpjjani sañti muni? ¿Janit kunas aka oraqen utj-jjpachäni, jan ukajj taqe kunat tʼunjatäpachäni?

BIBLIAJJ JANIW UKHAMÄKANITI SASAW QHANAÑCHI.

**Akanakaw jan tukjatäkaniti**

JAQENAKA

¿Bibliajj kamsisa? Diosajj ‘janiw aleq ukhamakïñapatak oraq lurkiti, jan ukajj jaqenïñapatakiw luri’ (ISAÍAS 45:18).

Mä qotaw qollunak taypin utji, walja qoqanakamp muyuntatarakiwa.

AKA ORAQE

¿Bibliajj kamsisa? ‘Mä tiempon jakir jaqenakajj sarjjapjjewa, yaqhanakaw jutapjjaraki, ukampis oraqejj wiñayatak utjaskakiniwa’ (ECLESIASTÉS 1:4).

¿UKAJJ KAMSAÑSA MUNI? Bibliarjamajja aka oraqejj janipuniw tukjatäkaniti, jaqenakajj utjapuniniwa. Ukhamajj akapachan tukusiñapat parlki ukhajj ¿kuna toqetsa Bibliajj parlaski?

AKA TOQET AMUYTʼAM. Akapachan tukusiñapajja, ‘Noé chachan tiempopar uñtasitawa’ sasaw Bibliajj qhanañchi. Uka tiemponjja, ‘aka oraqejj kunayman jan walinakampi phoqantatänwa’ (Génesis 6:13). Ukampis Noé chachajj Diosar istʼasaw sarnaqäna. Ukatwa Diosajj juparusa familiaparus salväna. Ukhamarus jan wali jaqenakarojj Uma Juicionwa jiwarayäna. Bibliajj kunas pasäna uk akham qhanañchi: “Kunapachatï umajj aka oraqpachar phoqantkäna ukhajja, nayra tiempo jaqenakajj ukanakampi tʼunjatarakïnwa” (2 Pedro 3:6). Ukhaw ukapachajj tukusïna. Ukampis ¿kunas tʼunjatäna? Janiw aka oraqejj tʼunjatäkänti, jan ukasti jan wali jaqenakaw jiwarayatäpjjäna. Ukhamasti Bibliajj akapachan tukusiñapat parlki ukhajja, janiw aka oraqen tʼunjasiñapat parlkiti. Jan ukasti jan wali jaqenakampiru, kuna jan walinakatï aka oraqen utjki taqe ukanakampir tʼunjasiñapatwa parlaski.

Akanakaw tukjatäni

PROBLEMANAKAMPI JAN WALINAKAMPI

¿Bibliajj kamsisa? ‘Mä jukʼa tiempotjja jan wali jaqenakajj janiw utj-jjaniti, kawkjantï jupanakajj jakapkäna uka lugarar uñtkäta ukhajja, janiw jupanakajj ukankjjapjjaniti. Ukampis llampʼu chuymaninakajj oraqwa katoqapjjani, jan tukuskir sumankañampiw jupanakajj wal kusisipjjarakini’ (SALMO 37:10, 11).

Fotonaka: 1) Lunthatanakaw mä tiendat ajanus tapantat mistusipki, kunanaktï lunthatsuwayapki ukanak aptʼatäsipkarakiwa. 2) Mä chachaw yaqha chacharojj walja qollqeni mä maletín churañ munaski.

¿UKAJJ KAMSAÑSA MUNI? Uma Juicio qhepatjja, jan wali jaqenakajj mayampiw aka oraq jan waltʼayjjapjjäna. Ukhamasti Noé chachan tiempopanjja, Uma Juiciojj janiw jan walinak phoqatpach chhaqtaykänti. Ukampis Diosajj niyaw jan walinak jan mayampitak chhaqtayani. Kunjamtï Salmo qellqatan siskejja, ‘jan wali jaqenakajj janiw utj-jjaniti’. Diosajj Reinop toqew jan walinak chhaqtayani. Uka Reinojja jan ukajj Gobiernojja alajjpachankiwa, Diosar istʼapkani uka jaqenakaruw apnaqarakini.

AKA TOQET AMUYTʼAM. ¿Jaqenakan gobiernonakapampejj kunas pasani? ¿Diosan Reinopar yanaptʼapjjpachäniti? Bibliajj janiw ukham siskiti, jan ukasti aka oraqenkir gobiernonakajj Dios contraw saytʼasipjjani sasaw qhanañchi (Salmo 2:2). Ukampis ¿kunas pasani? Diosan Reinopaw jaqenakan gobiernonakap lanti apnaqjjani, ‘uka Reinokiw wiñayatak utjarakini’ (Daniel 2:44). Ukampis ¿kunatsa jaqenakan gobiernonakapajj jukʼamp jan apnaqjjapjjañapajj wakisi?

Jaqenakan gobiernonakapajj jan apnaqjjapjjañapwa MUNTANJJA

¿Biblia kamsisa? ‘Janiw jaqerojj pachpa thakip ajlliñajj waktʼkiti. Janirakiw jaqerojj chellqtatanakap amtañas waktʼkiti’ (JEREMÍAS 10:23).

Jaqenakaw politicat parli cartelanakani mä perqa jakʼa pasasipki.

¿UKAJJ KAMSAÑSA MUNI? Jaqenakajja janiw jiwasanakpachpa apnaqasiñatak luratäktanti. Janirakiw mayni jaqenakarus apnaqksnati, ni problemanakapsa askichksnati.

AKA TOQET AMUYTʼAM. Enciclopedia Britannica Academic qellqatajj akham siwa: ‘Gobiernonakajja oraqpachan utjki uka jan walinak janiw askichapkaspati. Sañäni: qollqet pistʼaña, manqʼat pistʼaña, usunaka, desastres naturales, guerranaka, yaqha jan walinakampi’ sasa. Ukat saskakiwa: ‘Oraqpachan mä gobiernok utjaspa ukhajja, jan walinak wiñayatakiw chhaqtayaspa sasaw yaqhepanakajj amuyapjje’ sasa. Ukhamarusa, aka oraqenkir taqe gobiernonakajj mayachtʼasipkaspa ukhasa, janiw taqe jan walinak chhaqtayapkaspati. ¿Kunatsa? Jaqenakajj pantjasirinakäpjjtanwa, aka oraqen utjki uka jan walinaksa janirakiw askichksnati. Diosan Reinopakiw oraqpachan utjki uka jan walinak wiñayatak chhaqtayaspa.

Bibliajj yatichki ukarjamajja, suma chuymani jaqenakajj janiw akapachan tukusiñapar ajjsarapjjañapäkiti. Jan ukasti ukanak yatisajj kusisipjjañapawa. Jan walinakajj niyaw aka oraqet chhaqtayatäjjani, Diosan Reinoparakiw aka oraq apnaqjjani.

¿Kunapachas ukanakajj pasani? Akjjar jutki uka yatichäwinwa Bibliajj uka toqet kamsisa uk yatjjatañäni.