Aka oraqen guerranakasa jan waltʼäwinakas janiw utj-jjaniti

GOBIERNONAKAROJJ DIOSAW CHHAQTAYANI

Diosajj aka oraq apnaqerinakaruw mä guerran tukjani, Biblian uka guerrajj Armagedón sasin uñtʼatawa (Apocalipsis 16:16).a Uka urojj purinkani ukhajja, “oraqpachankir reyinakaw [jan ukajj gobernantenakaw]” ‘Diosan jachʼa urupan guerrajj apaskani ukatak tantachthapitäpjjani’ (Apocalipsis 16:14). Uka Armagedonanwa Diosajj guerranak chhaqtayjjani.

Diosajj aka oraq apnaqerinak lantejj Reinopwa apnaqañapatak uttʼayani, uka Reinojj janipuniw tukjatäkaniti, alajjpachatwa apnaqanirakini (Daniel 2:44). Diosajj Jesús Yoqaparuw Reyïñapatak ajlliwayi (Isaías 9:6, 7; Mateo 28:18). Jesusajj discipulonakapar orasiñ yatichkäna ukhajja, uka Reinotwab parlaskäna (Mateo 6:9, 10). Ukhamajj aka oraqpachan mä gobiernokiw utj-jjani, Jesusaw alajjpachat apnaqanirakini.

Aka oraqenkir gobiernonakat sipansa, Jesusajj janiw jupan munañaparjamakejj taqe kuns lurkaniti. Niyakejjay cheqapar uñjir Reyïchejja, janiw khititsa armaskaniti. Ukhamajj janiw khitis yaqha jañchinïtap laykusa yaqha markatätap laykus tʼaqesjjaniti (Isaías 11:3, 4). Jaqenakajj janiw derechonakapat chʼajjwjjapjjaniti, kunattejj jaqenakan sum jakasipjjañapatakejj Jesusaw yanaptʼani. Ukatjja “jupaw yanaptʼa mayiñatak arnaqasir jaqerojj salvani, humilde jaqerusa jan khiti yanapirin jaqerus jupaw salvarakini […]. Jupaw tʼaqesiyirinakatsa nuwasir jaqenakatsa jupanakar salvani” (Salmo 72:12-14).

Diosan Reinopajja, kawkïr armanakatï jaqenakar jiwarayki ukanak qʼalwa tʼunjani (Miqueas 4:3). Janiw ukakïkiti, khitinakatï chʼajjwapki ukat sumankañsa jan utjayapki taqe uka jan wali jaqenakarus chhaqtayaniwa (Salmo 37:9, 10). Maysa toqetjja, chachanakasa warminakasa wawanakas taqe cheqan segurow jakasjjapjjani (Ezequiel 34:28).

Diosan gobiernopanjja jakañajj wali sumäniwa. Kunanakatï jan waltʼaykistu ukanakajj chhaqtjjaniwa. Sañäni, pobren jakasiñasa manqʼat pistʼañasa jan utanïñas janiw utj-jjaniti. Taqenitakiw manqʼañanakajj jilarkir utj-jjani ukat jaqenakajj sum jakasiñatakejj utanïpjjaniwa (Salmo 72:16; Isaías 65:21-23).

Diosan Reinopajj aka oraq apnaqjjani ukhajja, kuna jan walinaktï guerrajj utjayki ukanakajj chhaqtawayjjaniwa. Janiw jañchi toqet jan waltʼäwinakakejj chhaqtkaniti, jan ukasti guerrajj llaki usunak apjjatawaykistu ukanakas chhaqtjjarakiniwa. Jiwatanakas aka oraqenwa jaktanipjjarakini (Isaías 25:8; 26:19; 35:5, 6). Familianakajj mayampiw juntuk jakasjjapjjani, kuna llakinaktï guerranakajj utjayawayki ukanakas armatäjjaniwa (Apocalipsis 21:4).

DIOSAW JUCHAROJJ CHHAQTAYJJANI

Diosan Reinopajj apnaqjjani ukhajja, jaqenakajj mayachtʼataw cheqpach Jehovác Diosaruk adorjjapjjani, “wali munasiri, sumankañ churiri” Diosaru (2 Corintios 13:11). Jaqenakajj sumankañan jakasiñwa yateqapjjani (Isaías 2:3, 4; 11:9). Khitinakatï yateqatarjam lurapkani ukanakajja, jucha laykojj kuna jan walinakantï uñjasipki ukanakat salvatäpjjaniwa (Romanos 8:20, 21).

SUPAYARU DEMONIONAKAPAMPIROJJ DIOSAW TUKJANI

Diosan Reinopaw Supayampiru demonionakapampir chhaqtayani. Ukhamajja, janiw guerranak utjayañatakejj jaqenakar chʼamañchjjapjjaniti (Apocalipsis 20:1-3, 10). Jupanakan jan utjatapatjja “sumankañajj waljapuniw utjani” (Salmo 72:7).

Diosajj guerranaksa jan waltʼäwinaks chhaqtayäwa sasin arski uk phoqaniwa, uka toqet janiw payachasiñamäkiti. Kuna laykutejj uka jan walinak wal chhaqtayañ muni, chhaqtayañatakejj chʼamanirakiwa.

• Diosajj guerranaka jan walinak chhaqtayañatakejj chʼamaniwa, kunjamsa chhaqtayani uks sum yatiraki (Job 9:4). Jupatakejj janiw kunas chʼamäkiti (Job 42:2).

• Jaqenakar tʼaqesir uñjasajj Diosajj llakisiwa (Isaías 63:9). Ukat “khititï nuwasiñanakar munaski ukarojj uñisiwa” (Salmo 11:5).

• Diosajj arsutap phoqapuniwa, janiw kʼariskaspati (Isaías 55:10,11; Tito 1:2).