Jiwasatakejj Diosar jakʼachasiñajj wali sumawa

1, 2. 1) ¿Kunas mä suma amigonïñatakejj wakisi? 2) ¿Kunsa yatjjataskañäni?

MÄ SUMA amigomat amuytʼam. ¿Kunjamatsa amigomäjjäna uk amtastati? Walja kutiw jupamp jikispachätajja, kunanaksa nayrajj luräna uks sum yatpachätajja, kunas jupar gusti kunas jan gustkaraki ukanaks yatirakpachätawa. Kunja suma chuymanisa ukanak uñjasajj jupjamäñwa munarakpachätajja, tiempompejj wal munasjjarakpachätajja.

² Maynimp suma amigöñatakejj tiempow munasi, chʼamachasiñasarakiwa. Jehová Diosamp suma amigöñatakejj ukaw wakisiraki. Aka yatichäwinjja, kunsa Jehová Dios amigosar jakʼachasiñatakejj lursna, kunjamsa jupar jakʼachasiñajj yanaptʼistu ukwa yatjjataskañäni. Nayraqatjja, kunatsa uk lurañajj wakisi uk parltʼañäni.

3. Kunjamsa Jehová Diosar jakʼachasiñajj yanaptʼistu uka toqet ¿kunatsa lupʼiñasapuni?

³ Jehová Diosar jakʼachasiñatakejj kuna razonanakas utji ukanakat lupʼiñajj wali wakiskiripuniwa (Sal. 63:6-8). Uk amuyañatakejj ak amuytʼañäni. Suma alimentonak manqtʼasiñasa, walja uma umañasa, ejercicio lurañasa, sum iktʼañas kunja wakiskirisa uk jaqenakajj sum yatipjje. Ukhamäkchisa janiw jaqenakajj ukanak lurapkiti, janirakiw kʼumaräñatakejj cuerpop cuidapkiti. Ukampis taqe ukanak lurañajj kunjamsa sum jakasiñatak yanaptʼistu ukanak sapa kuti amuytʼir jaqejja, taqe ukanak lurañatakiw chʼamachasi. Jehová Diosampejj ukhamarakiwa, jupar jakʼachasiñajj kunja wakiskirisa uk yatkstansa, jupar jakʼachasiñajj kunjamsa yanaptʼistu ukanak lupʼisakiw jupar jukʼamp jakʼachasiñäni (Sal. 119:27-30).

4. ¿Kunsa Salmo 73:28 texton salmistajj qhanañchäna?

⁴ (Salmo 73:28 liytʼäta). Salmo 73 qellqerejj Leví tribut jutirïnwa, templon mä musicorakïnwa. Jupajj walja maranakas Jehová Diosar jan jitheqtas serviskchïnjja, Diosar jakʼachasiñajj wali sumawa sasin amuytʼañajj jupatak kunja wakiskirisa ukwa amuyasïna. Jehová Diosan amigopäñajj kunja sumasa uk mayninakan amuyapjjañapwa munarakïna. Jichhajj ukanakat mä qhawqha amuytʼañäni.

DIOSAR JAKʼACHASISAJJ KUSISITÄTANWA

5. 1) ¿Kunatsa Diosar jakʼachasisajj kusisitätanjja? 2) ¿Kunjamsa Jehová Diosan yatiñapajj jumar yanaptʼtam, jarkʼaqaraktam? (Proverbios 2:6-16).

⁵ Jehová Diosar jukʼamp jakʼachasisajj jukʼamp kusisitätanwa (Sal. 65:4). Kunatsa ukham sistan uk amuytʼañäni. Biblian yatiñani ewjjtʼanakaparjam sarnaqtan ukhajja, sum jakastanjja, yatichäwinakapajj kunanakatï jan waltʼaykistaspa ukanakatwa jarkʼaqestu, sinti jan walinakar jan purtʼasiñatakiw yanaptʼarakistu (Proverbios 2:6-16 liytʼäta). Ukatwa Biblian akham saraki: “Khititï yatiña jikjjatki ukajj kusisitawa, khititï amuytʼasirïña jikjjatki ukajj kusisitarakiwa” sasa (Prov. 3:13).

6. ¿Kunatsa salmistajj jan kusisitäjjäna?

⁶ Awisajj Jehová Diosan amigonakapajj llakit uñjasipjjarakispawa. Salmo 73 qellqerejja, kunanakatï jan cheqaparjam luraskäna ukanak uñjasajj janiw kusisitäjjänti. Diosampir mandatonakapampir jan respetir jaqenakatakejj taqe kunas facilakïkaspasa ukhamwa amuyjjäna, jupanakat envidiasjjarakïnwa. Nuwasiri, jachʼa jachʼa tukuri, jan wali jaqenakajj jukʼamp utjirinïpkaspasa, jukʼamp kʼumaräpkaspasa, janis tʼaqesipkaspa ukhamwa amuyäna (Sal. 73:3-7, 12). Chuyma ustʼatäsajja, Jehová Diosar serviñatak chʼamachasitapajj inamayäkaspasa ukhamwa amuyäna. Jupajj wali llakitäsajj akham sänwa: “Cheqpachansa inamayakiw qʼoma chuymanïñatak nayajj chʼamachasta, jan juchanïtaj uñachtʼayañatakejj inamayakiw amparanakaj jareqasta” sasa (Sal. 73:13).

7. ¿Llakitäktan ukhajj kunsa lurañasa? (Dibujo uñjjattʼarakïta).

⁷ Salmistajj wali llakitäkchïnsa, jan jukʼamp llakisjjañatakejj ‘Diosan sagrado santuarioparuw’ mantäna, ukanwa Jehová Diosajj jan ukham amuyjjañapatak yanaptʼäna (Sal. 73:17-19). Niyakejjay Jehová Diosajj jiwasan wali suma amigosächejja, kunapachas llakitätan uk sum yati. Juparuw oracionan yanaptʼa mayiñasa, ukat Arup toqe, congregación toq churkistu uka yanaptʼapsa katoqasiñasawa. Ukhamatwa llakitäkañäni ukhajj Jehová Diosar serviskakiñatakejj chʼamanïñäni. Walja llakinakanïñäni ukhasa, jupaw chuymachtʼistani, tranquilokïñatakis yanaptʼistani (Sal. 94:19).a

DIOSAR JAKʼACHASISAJJ SUM JAKASTANJJA MÄ SUYTʼÄWINIRAKÏTANWA

8. ¿Diosar jakʼachasiñajj kuna pä toqenakansa yanaptʼarakistu?

⁸ Diosar jakʼachasiñajj aka pä wakiskir toqenakanwa yanaptʼistu: Maya, jichhürunakan sum jakasiñatakiw yanaptʼistu. Paya, mä suytʼäwinïñatakiw yanaptʼistu (Jer. 29:11). Jichhajj ukanakat jukʼamp yatjjatañäni.

9. Jehová Diosar jakʼachasiñajj sum jakasiñatakiw yanaptʼistu sasajj ¿kunatsa sissna?

⁹ Jehová Diosar jakʼachasiñajj sum jakasiñatakiw yanaptʼistu. Jichhürunakan walja jaqenakaw Diosan utjatapar jan creyipkiti. Kunatsa jaqenakajj aka oraqenktan uk janiw yatipkiti, jutïrin taqe jaqenakaw tukusjjañäni sasaw amuyapjjaraki. Ukampis Diosan Arupat yatjjatasajja, ‘jupan utjatapsa jupar taqe chuyma thaqerinakar pago churirïtapsa creyiraktanwa’ (Heb. 11:6). Alajjpachankir Jehová Dios Awkisajj jupar serviñ munir chuymanwa lurtʼasistu. Ukatwa jupar servisajj wali kusisit jakastanjja (Deut. 10:12, 13).

10. Salmo 37:29 textorjamajj ¿kunsa jutïrin Jehová Diosar confiyirinakajj katoqapjjani?

¹⁰ Walja jaqenakajj janiw cheqpach suytʼäwinïpkiti. Jupanakajj trabajiñataki, wawanak uywañataki, jilïrëjjapjjani ukhatak qollq imasiñatakiw chʼamachasipjje. Janiw Diosat amtasipkiti. Ukampis Jehová Diosan servirinakapajj juparuw confiyapjje (Sal. 25:3-5; 1 Tim. 6:17). Jïsa, jiwasajj Jehová Dios amigosaruw confiytanjja, jupajj taqe promesanakap phoqapuniniwa. Jutïrin walja kusiskañ bendicionanakwa katoqañäni, ukanakat mayajj Jehová Diosar wiñayatak Paraison adorañawa (Salmo 37:29 liytʼäta).

11. ¿Kunjamsa Diosar jakʼachasiñajj yanaptʼistu, ukat jupar jakʼachastan ukhajj kunjamas jupajj jikjjatasi?

¹¹ Diosar jakʼachasiñajj walja toqenakatwa yanaptʼistu. Jiwasatï juchanakasat arrepentisiñänejja, Jehová Diosajj perdonistaniwa (Is. 1:18). Ukhamajj kuna juchanaktï nayrajj lurkayätan ukanakat janiw llakisjjañasäkiti (Sal. 32:1-5). Ukhamarus Jehová Diosar jakʼachasisajj juparuw kusisiytanjja (Prov. 23:15). Cheqas Jehová Diosan amigopäsajj walja bendicionanak katoqtanjja. Ukampis ¿kunsa jupar jukʼamp jakʼachasiñatakejj lursna?

¿KUNSA DIOSAR JUKʼAMP JAKʼACHASIÑATAK LURSNA?

12. ¿Kunsa Diosar jukʼamp jakʼachasiñatakejj lurañama?

¹² Jumatï Jehová Diosan Testigopjam bautisatäjjsta ukhajja, Jehová Diosatsa Jesucristots waljanak yateqpachätajja, juchanakamats arrepentisjjpachätawa, Diosar confiyatams uñachtʼaypachätawa, mandatonakapar istʼañatakis chʼamachasirakpachätawa. Taqe ukanakajj Diosan jakʼapankatamwa uñachtʼayi. Ukampis Diosar jukʼamp jakʼachasiskakiñatakejj taqe ukanak luraskakiñasawa (Col. 2:6).

13. ¿Kunanaksa Jehová Diosar jukʼamp jakʼachasiñatakejj lursna?

¹³ Diosar jukʼamp jakʼachasiñatakejj akanakwa lursna: 1) Bibliat liytʼaskakiñasawa, yatjjataskakiñasawa. Janiw Diosjjat mä jukʼanakak yatjjatañasäkiti. Jan ukasti Diosajj kunsa amuyi, kun lurañassa muni ukanak yateqañatak chʼamachasiñasawa, Biblian yatichäwinakaparjamaw sarnaqañasaraki (Efes. 5:15-17). 2) Jehová Diosajj kunjamanakats jiwasar wal munasitap uñachtʼayistu ukanakat lupʼiñasawa, ukaw jupar jukʼamp confiyañatak yanaptʼistani. 3) Kunanakatï Jehová Diosan chuymap ustʼayki uka jan walinak uñisiskakiñasawa, janirakiw jan walinak lurir jaqenakan amigopäñasäkiti (Sal. 1:1; 101:3).

14. ¿Kunsa sapür lurañanakasan Jehová Diosar kusisiyañatak lursna? (1 Corintios 10:31; fotonak uñjjattʼarakïta).

¹⁴ (1 Corintios 10:31 liytʼäta). Kunanakas Jehová Diosar kusisiyi uk yatisajja, ukanak lurañatakejj chʼamachasiskakiñasawa, ukajj wali importantewa. Janiw predicañakisa jan ukajj tantachäwinakar sarañakis wakiskiti, kunanaktï sapür lurktan ukanakajj Jehová Diosaruw kusisiyañapa. Mä toqetjja, kunapachatï jiwasajj honradötan, kunanakatï utjkistu ukanak mayninakar wajjtʼtan ukhajja, Jehová Diosajj wal kusisi (2 Cor. 8:21; 9:7). Maysa toqetjja, mä regalor uñtat churkistu uka jakañ vidas wali valoranit uñjsna ukwa munaraki. Qhawqhatï wakiski ukhak manqtʼastan umtʼaraktan ukhasa, kʼumar jakasiñatak cuidastan ukhasa, jukʼampiw Diosar jakʼachastanjja. Kun lurkasas Jehová Diosar kusisiyañatak chʼamachastan ukhajja, jupajj jukʼampiw munasistu (Luc. 16:10).

15. Jehová Diosajj mayninakar ¿kunjam uñjañassa muni?

¹⁵ Jehová Diosajj cheqapar sarnaqer jaqenakarusa, jan cheqapar sarnaqer jaqenakarus taqeniruw munasiñamp uñji (Mat. 5:45). Jiwasajj mayninakar munasiñamp uñjaraksna ukwa jupajj muni. Jehová Diosan servirinakapajj “janiw khititsa jan wal parlapjjañapäkiti, janirakiw chʼajjwirïpjjañapäkisa”, antisas “taqe jaqenakarus llampʼu chuymampiw uñjapjjañapa” ukwa jupajj muni (Tito 3:2). Ukhamajj janisay jaqenakajj Jehová Diosar creyipkchinejja, janiw jupanakat sipans jukʼamp jilanksnas ukham amuyasktanti (2 Tim. 2:23-25). Mayninakarutejj munasiñampipun uñjañäni ukhajja, jukʼampiw Jehová Diosar jakʼachasiñäni.

PANTJASTAN UKHAS JEHOVÁ DIOSAR JAKʼACHASSNAWA

16. Mä kutejj ¿kunjamas Salmo 73 qellqerejj jikjjatasïna?

¹⁶ Awisajj janis Jehová Diosajj jakʼasankkaspa ukhamwa amuyassna. Kunas Salmo 73 qellqerirojj pasäna uk amuytʼañäni. Jupajj akham sänwa: “Kayunakajajj niyapuniw maysar saranuküna, kayunakajajj niyapuniw llustʼtäna” sasa (Sal. 73:2). Ukat akham sarakïnwa: “Chuymajajj llakitänwa [...]. Nayajj jan amuytʼañ munir jaqëyätwa, [...] jan amuytʼasir mä animalar uñtatäyätwa” sasa (Sal. 73:21, 22). Salmistajj pantjasirïtapat janis Jehová Diosajj jupar munasjjaspa, janis jupar perdonkaspa ¿ukhamti amuyasïna?

17. 1) Salmistajj wali llakitäkäna ukhajj ¿kunsa amuyatajj luräna? 2) ¿Kunatï salmistar paskäna ukat kunsa yateqsna? (Fotonak uñjjattʼarakïta).

¹⁷ Jehová Diosajj jupar apanukkaspasa ukhamsa salmistajj amuyaskchïnjja, janiw jaya tiempo ukham amuykpachänti. Amuyatajj wali llakitäkäna ukhaw Jehová Diosar jakʼachasiñ wakisitap amuyasjjäna. Ukatwa akham säna: “Ukampis jichhajj juma chiktʼatapunïtwa, kupi amparajatwa jumajj katjjasistajja. Ewjjtʼanakamampiw jumajj irpistajja, ukatjja sumwa uñjarakitäta” sasa (Sal. 73:23, 24). Diosar jan añch confiyjjañäni jan ukajj desanimasjjañäni ukhajja, jiwasajj ukhamarakiw jan ukhamäjjañatakejj Jehová Diosar chʼam mayisiñasa (Sal. 73:26; 94:18). Ukampis jiwasatï Jehová Diosan suma thakipat saranukuñäni ukhajja, ‘perdonañatak jankʼakïtap’ yatisajj jan payachasisaw jupan ukar kuttʼsna (Sal. 86:5). Jukʼampis wali desanimatäktan ukhaw Jehová Diosar jukʼamp jakʼachasiñasa (Sal. 103:13, 14).

DIOSAROJJ WIÑAYATAK JAKʼACHASIPJJAÑÄNI

18. Jehová Diosarojj wiñayatakiw jakʼachassna sasajj ¿kunatsa sissna?

¹⁸ Jehová Diosarojj wiñayatakiw jakʼachassna. Jupat yateqañajj janirakiw tukuskaniti. Bibliarjamajj Jehová Diosan yatiñapasa, uñtʼañapasa, thakinakapas ‘jan amuykañawa’ (Rom. 11:33).

19. Uka pä Salmorjamajj ¿kuna toqets jan payachasiñasäki?

¹⁹ Salmo 79:13 textojj akham siwa: “Nanakajja, juman markamajja, mä arunjja pastomankir uywanakamajj wiñayatakiw jumar yuspärapjjäma. Nanakasa jutïr wawanakan wawanakapas jumaruw jachʼañchapjjäma” sasa. Janipun akat payachasimti: jumatï Jehová Diosar jakʼachasiskakïta ukhajja, wiñayatakiw bendicionanak katoqäta. Ukat akham sarakïtawa: “Diosaw chuymajar jarkʼaqe, jupaw nayan qarqajajja ukhamarak taqe kunatï wiñayatak utjkitu ukasa” sasa (Sal. 73:26).