Jiwasatakejj jilat kullakanakar jakʼachasiñajj wali sumawa

1, 2. ¿Kunas Jehová Diosatakejj jukʼamp importantejja, ukat kun lurañassa munaraki?

KUNJAMSA jaqenakar uñjtan ukajj Jehová Diosatak wali importantewa. Jesusajj kunjamtï jiwas pachpar munastan ukhamwa mayninakar munasiñasa sasaw yatichäna (Mat. 22:37-39). Jehová Diosar jan servipki ukanakarus munasiñampiw uñjañasaraki. Ukhamatwa alajjpachankir Awkisat yateqasitas uñachtʼaytanjja, “jupajj jan wali jaqetakisa suma jaqetakisa taqenitakiw intip jalsuyani, cheqapar sarnaqeritakisa jan cheqapar sarnaqeritakisa ukhamarakiw jallu puriyani” (Mat. 5:45).

² Jehová Diosajj taqe jaqenakarus munaskchejja, jupar istʼirinakarojj jukʼampiw munasi (Juan 14:21). Jupat yateqassna ukwa Jehová Diosajj muni, ukatwa jilat kullakanakarojj “wal munasipjjam”, “taqe chuyma munasipjjam” sasin chʼamañchtʼistu (1 Ped. 4:8; Rom. 12:10). Uka munasiñajja, kunjamtï mä jakʼa familiarasaru jan ukajj mä munat amigosar munasktan ukhamäñapawa.

3. ¿Kunsa mayninakar munasiñjjat amtañasa?

³ Munasiñajj mä plantar uñtasitawa, jiltañapatakejj cuidañasawa umampiw warjjattʼañasaraki. Apóstol Pablojj akham sasaw cristianonakar säna: “Maynit maynikamajj jilapurjam munasisipkakim” sasa (Heb. 13:1). Jehová Diosajj mayninakar munasitasajj jiltaskakispa ukwa muni. Aka yatichäwinjja, kunatsa jilat kullakanakar jakʼachasiñasa, kunjamsa uk lursna ukwa yatjjatañäni.

¿KUNATSA JILAT KULLAKANAKAR JUKʼAMP JAKʼACHASIÑASA?

4. Jilat kullakanakan mayachtʼatäpjjatapar valoranit uñjaskakiñatakejj ¿kunsa Salmo 133:1 textorjamajj lursna? (Fotonak uñjjattʼarakïta).

⁴ (Salmo 133:1 liytʼäta). Salmo qellqerjamaw akham saraktanjja, Jehová Diosar munasipki ukanakan amigopäñajj “wali sumapuniwa, wali munkañarakiwa” sasa. Ukampis Jehová Diosan markapajj kunja suma mayachtʼatasa uk janiw yäqjjsnati. Kunjamtï maynejj mä jachʼa qoqa sapür uñjasajj wal musparaspa, ukampis tiempompejj uk uñjasin jan musparjjaspa ukhamarakïspawa. Niyakejjay jilat kullakanakarojj sapa kuti jan ukajj semanan walja kuti uñjstanjja, ¿kunas jupanakar qalltanjam munasiskakiñatak yanaptʼistaspa? Kunatsa jupanakat sapa maynejj congregacionatakisa jiwasatakis valoranïpjje uk amuytʼañatakiw tiempo apstʼasiñasa.

5. Testigonakan munasiñamp uñjasitasajj ¿kun lurañatakis mayninakar yanaptʼaspa?

⁵ Mä tantachäwisar nayrïr kuti sarapki ukanakajja, qhawqsa munastan uk uñjasajj wal musparapjje. Jesusan cheqpach arkiripätaswa uñjapjjaraki. Jupajj akham sänwa: “Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35). Chaithra kullakan experienciapat parltʼañäni, jupajj universidadankasaw Testigonakamp Bibliat yateqañ qalltäna. Juparojj mä asamblea regionalaruw invitapjjäna, nayrïr uru uka asambleankasajj Bibliat yatichkäna uka kullakarojj akham sänwa: “Papit mamitajajj janipuniw mä kutis qhomanttʼapjjerïkituti. Ukampis aka asamblean mä urunakwa 52 kuti qhomanttʼapjjetu. Aka jachʼa familiajj qhawqsa Jehová Diosajj munasitu ukwa uñachtʼayitu. Jupanakajj familiajäpjjaspa ukwa munta” sasa. Jupajj Bibliat yateqaskakïnwa, 2024 maranwa bautisasjjarakïna. Bibliat yateqerinakajj suma luratanakassa qhawqsa munastan uks uñjapjje ukhajja, jilapartejj Jehová Diosar serviñwa munapjjaraki (Mat. 5:16).

6. ¿Kunjamsa jilat kullakanakar jukʼamp jakʼachasiñajj jarkʼaqestu?

⁶ Jilat kullakanakar jukʼamp jakʼachasiñajj jarkʼaqarakistuwa. Pablojj akham sasaw cristianonakar säna: “Jumanakajj sapüru maynit maynikam chʼamañchtʼasisipkakim, [...] ukhamat jan khitis jumanakat juchan chʼamapampi engañjayasisajj chuymap qalarayasiñapataki” sasa (Heb. 3:13). Jiwasatï desanimassna cheqap thakit saranukuskatas amuyasiraksna ukhajja, Jehová Diosajj jilat kullakanak toqew yanaptʼistaspa (Sal. 73:2, 17, 23). ¡Ukham yanaptʼanïñajj wali kusiskañawa!

7. ¿Kunjamsa munasiñajj mayachtʼatäñatak yanaptʼistu? (Colosenses 3:13, 14).

⁷ Maynit maynikam munasiñ uñachtʼayasipki uka mä grupo taypinktanwa, ukatwa walja bendicionanak katoqtanjja (1 Juan 4:11). Munasiñajj maynit maynikam aguantasiskakiñatakiw yanaptʼistu, ukaw jilat kullakanakamp cheqpach mayachtʼatäñatakejj yanaptʼarakistu (Efes. 4:2-6; Colosenses 3:13, 14 liytʼäta). Ukatwa tantachäwinakasan wali kusisitätanjja, janiw kawkjansa ukajj uñjaskiti.

MAYNIT MAYNIKAM HONRAMPI RESPETOMPI UÑJASIPJJAÑÄNI

8. ¿Kunjamsa Jehová Diosajj mayachtʼatäñasatak yanaptʼistu?

⁸ Pantjasirïkstansa oraqpachankir jilat kullakanakampejj mayachtʼatätanwa, ukajj Jehová Diosan mä milagropawa (1 Cor. 12:25). Biblianjja, “jumanakarojj Diosaw maynit maynikam munasiñ yatichasipktamjja” sasaw qhanañchi (1 Tes. 4:9). ¿Kunjamsa Diosajj uk luri? Jilat kullakanakamp maynit maynikam jakʼachasiñasatakejj kunsa lursna uk Arup toqew yatichistu. Bibliat wali sum yatjjatasa, ukat ukarjam sarnaqasaw Jehová Diosamp yatichayasisktanjja (Heb. 4:12; Sant. 1:25). Jehová Diosan Testigonakapajj uk lurañatakiw chʼamachastanjja.

9. ¿Kunsa Romanos 12:9-13 textojj maynit maynikam honramp uñjasiñat yatichistu?

⁹ ¿Kunjamsa Diosan Arupajj jilat kullakanakar jukʼamp jakʼachasiñatak yanaptʼistaspa? Kuntï Pablojj Romanos 12:9-13 (liytʼäta, notapampi) texton siskäna uk amuytʼapjjañäni. Jupajj “maynit maynikam respetasiñansa [jan ukajj honra uñachtʼayasiñansa] nayrankapjjam” sasaw säna. ¿Uka arunakampejj kamsañsa munaskäna? Kunjamanakatsa mayninakarojj munasiñ uñachtʼaysna ukwa amuytʼañasa. Sañäni, mayninakar katoqtʼasa, perdonasa ukat wajjtʼasirïsaw munasiñ uñachtʼaysna (Efes. 4:32). Janiw jilat kullakanakan jiwasar jakʼachasipjjañap suyañasäkiti, jan ukasti jiwasaw nayraqat jakʼachasiñasa. Ukhamatwa Jesusan aka arunakap phoqasir uñjañäni: “Katoqañat sipansa churañanwa jukʼamp kusisiñajj utji” (Hech. 20:35).

10. ¿Mayninakar honra uñachtʼayasajj kunjamsa qʼaphätas uñachtʼaysna? (Foto uñjjattʼarakïta).

¹⁰ Pablon arunakapat amuytʼaskakiñäni. Maynit maynikam respetasiñansa jan ukajj honra uñachtʼayasiñans nayrankapjjam siskäna uka qhepatjja, akham sarakïnwa: “Wali qʼaphäpjjam, jan jayräpjjamti” sasa. Wali qʼaphäki ukatï mä kun lurañ katoqe ukhajja, taqe chuymaw uk luri. Proverbios 3:27, 28 texton akham sasaw ewjjtʼistu: “Khitinakatï yanap munapki ukanakarojja, jan janiw samti, jumatï yanaptʼirjamästa ukhajja yanaptʼam” sasa. Maynitï yanaptʼa munchi ukhajja, jankʼakiw yanaptʼañasa, janiw suyañasäkiti, janirakiw yaqhaw yanaptʼaskani sasajj amuyañasäkiti (1 Juan 3:17, 18).

11. ¿Kunas jilat kullakanakar jukʼamp jakʼachasiñatak yanaptʼistaspa?

¹¹ Mayninakajj chuym ustʼayapkistu ukhajja, jupanakar jankʼak perdonasaw honra uñachtʼayaraksna. Efesios 4:26 textojj akham siwa: “Jumanakatejj colerasipjjäta ukhajja, [...] janirak inti jalantkamajj coleratäpjjamti” sasa. ¿Kunatsa ukajj wakisi? Efesios 4:27 textorjamajj ‘janiw Diablorojj lugar churañasäkiti’. Mayninakarojj perdonapjjañamawa sasajj walja kutiw Jehová Diosajj Arupan sistu. Colosenses 3:13 texton akhamwa ewjjtʼistu: “Jumanakkamajj taqe chuyma perdonasisipkakim” sasa. Jilat kullakanakan pantjasitanakap perdonasajja, jukʼampiw jupanakar jakʼachastanjja. Ukhamatwa “espíritu santojj mayachtʼat jakasiñ churkistu ukarjam” suman jakasiñ utjañapatak yanaptʼasktanjja (Efes. 4:3). Mä arunjja, janitï perdonasiñajj utjkaspa ukhajj janiw mayachtʼatäksnati, ni sumankañas utjkaspati.

12. ¿Kunjamsa Jehová Diosajj mayninakar perdonañatak yanaptʼistu?

¹² Maynitï jan waltʼaychistu ukhajj jupar perdonañajj chʼamakïspawa. Ukampis Diosan espiritupan yanaptʼapampejja, juparojj perdonsnawa. Maynit maynikam taqe chuym munasipjjam qʼaphäpjjam sasin chʼamañchtʼasajja, Bibliajj akham sarakistuwa: “Espíritu santoy jumanakar chʼam katjjataypan” sasa. Ukhamajj Jehová Diosajj espíritu santopampiw kuntï lurañas munki uk taqe chuym lurañasatak chʼam katjjatayistaspa, ukarakiw mayninakar munasiñamp uñjañatakisa taqe chuym perdonañatakis yanaptʼistaspa (Biblia de estudion Romanos 12:11 liytʼasajja, payïr notap liytʼäta). Ukatwa Jehová Diosarojj jiwasar yanaptʼañapatak ruwtʼastanjja (Luc. 11:13).

“JAN JUMANAK TAYPIN TʼAQA TʼAQ SARNAQAÑAJJ UTJPANTI”

13. ¿Kunas tʼaqanoqtayistaspa?

¹³ Congregacionanakan “taqe kasta” jaqenakaw utji (1 Tim. 2:3, 4). Ukhamïpanjja kunjamsa isthaptʼasiñäni kʼachachtʼasiñäni, kunjamsa qollayasiñäni, kunjamsa kusistʼañäni uka toqenakan janiw mä igualak amtktanti, ukampis janitï amuyasksnajja ukanakajj tʼaqanoqtayistaspawa (Rom. 14:4; 1 Cor. 1:10). Ukampis Jehová Diosajj maynit maynikam munasiñasatakiw yatichistu, ukatwa amtanakasajj mayninakan amtanakapat sipans jukʼamp sumäkaspas ukham jan amuyktanti (Filip. 2:3).

14. ¿Kun lurañatakis chʼamachasiñasapuni, ukat kunatsa?

¹⁴ Mayninakar chʼamañchtʼañatak chʼamachasipuntan ukhajja, congregacionan mayachtʼatäñapatakiw yanaptʼaraktanjja (1 Tes. 5:11). Aka qhepa maranakanjja, waljaniw inactivonakatsa congregacionat apsutäpkäna ukanakats Jehová Diosan ukar kuttʼanjjapjje. Jiwasajj munasiñampiw jupanakar katoqtanjja (2 Cor. 2:8). Inactiva mä kullakajja, 10 maranakat Salonar kuttʼasajj akham siwa: “Taqeniw ukan wali kusisit aruntapjjetäna” sasa (Hech. 3:19). ¿Kullakajj kunjamas ukham katoqtʼatäsajj jikjjatasïna? Jupajj akham siwa: “Jehová Diosajj wasitat kusisitäjjañatakis yanaptʼkitaspa ukhamwa amuyasiyäta” sasa. Mayninakar chʼamañchtʼañatak chʼamachastan ukhajja, Jesusajj jiwas toqew ‘jatjatanakar’ samartʼayaspa (Mat. 11:28, 29).

15. ¿Kunjamatsa congregacionan mayachtʼatäñapatakejj yanaptʼaraksna? (Foto uñjjattʼarakïta).

¹⁵ Arunakasampejj mayachtʼatäñatakiw yanaptʼaraksna. Job 12:11 textojj akham siwa: “¿Janit jiñchojj arunak amuytʼki, kunjamtï lajjrajj manqʼanak malltʼki ukhamjja?” sasa. Mä suma phayirejja, manqʼapajj sumati janicha uk yatiñatakejj janïr sirvkasajj phayatap malltʼapuniwa. Jiwasajj ukhamarakiw janïr arskasajj arunakasajj mayninakar chʼamañchtʼaniti janicha, yanaptʼaniti janicha uk sum amuytʼasiñasa (Sal. 141:3; Efes. 4:29).

16. ¿Khitinakas chʼamañchtʼkir arunakamp parlañatak jukʼamp chʼamachasipjjañapa?

¹⁶ Jukʼampis casado jilatanakampi awk taykanakampiw chʼamañchtʼkir parlañatak chʼamachasipjjañapa (Col. 3:19, 21; Tito 2:4). Ancianonakajj Jehová Diosan ovejitanakaparojj chʼamañchtʼapjjañapawa, chuymachtʼapjjañaparakiwa (Is. 32:1, 2; Gál. 6:1). Yatiñamp arsut mä arojj akham siwa: “¡Tiempoparu arsut arunakajj wali sumawa!” sasa (Prov. 15:23).

“LURATASAMPI CHEQAPAMPI” MUNASIPJJAÑÄNI

17. ¿Kunsa jilat kullakanakar chuymatpach munasiñatakejj lursna?

¹⁷ Apóstol Juanajj akham sänwa: “Janiw arumpikisa ni lakampikisa munasiñasäkiti, jan ukasti luratasampi cheqapampi munasiñasawa” sasa (1 Juan 3:18). ¿Mayninakarojj chuymatpach munasiñatakejj kunsa lursna? Ukatakejj jilat kullakanakampïñatakiw tiempo apstʼasiñasa, ukhamatwa jupanakar jukʼamp jakʼachasiñäni, jukʼamp munasirakiñäni. Tantachäwinakansa predicacionans jupanakampïñatakiw tiempo apstʼasiñasa. Jupanakar visittʼañatakis chʼamachasipjjapuniñäni. Ukhamtï lurañänejja, akham sapjjestaniwa: “Jumanakarojj Diosaw maynit maynikam munasiñ yatichasipktamjja” sasa (1 Tes. 4:9). “¡Kunapachatï jilat kullakanakajj mayachtʼata mä juntuk jakasipki ukhajja, wali sumapuniwa, wali munkañarakiwa!” siski uka arunak phoqasirs uñjarakiñäniwa (Sal. 133:1).