SARNAQÄWI
“Nuwasiñajj Jehová Diosankiwa”
JUEVES 28 de enero de 2010 urojja, Estrasburgo (Francia) markan wali thaya urünwa. Uka markajj wali sumäkchïnsa, janiw ukarojj paseytʼir sarkayätti, jan ukasti Jehová Diosan Testigonakapan derechonakap arjjatiriw Tribunal Europeo de Derechos Humanos ukar sarayäta. Kuna laykutejj Francia markankir Gobiernow niya 64 millones de euros (89 millones de dólares) impuestot pagapjjañapatak jilat kullakanakar mayipjjäna, ukham mayiñatakejj janiw kuna leyes utjkänti. Ukham pagañajj janipuniw walïkaspänti, ukatwa leyirjamajj tribunalar sarapjjayäta, ukhamat Jehová Diosan sutipasa, servirinakapas sumat uñjatäpjjañapataki, ukat jan kuna jarkʼat predicaskakiñataki. Kunatï ukan paskäna ukajja, ‘nuwasiñajj Jehová Diosankatapwa’ uñachtʼayäna (1 Sam. 17:47, nota). Uk jukʼamp cuenttʼapjjäma.
1993 marat 1996 marakam churaskäna uka donacionanakatjja, 1999 maran Francia markankir gobiernow uka markankir sucursalar impuestonak mayïna. Ukatwa markankir tribunalanakar qellqapjjayäta, ukampis janiw arjjatapkitänti. Ukatwa Gobiernojj 4.500.000 jila euro qollqe (6.300.000 dólares) sucursalan cuentapat apaqapjjäna. Ukhamïpan Tribunal Europeo ukar sarañwa amtapjjayäta. Ukampis uka tribunalankirinakajja, janïr juicior sarkasajj gobiernonkir abogadonakampiru nanakampirojj Tribunal Europeonkir mä funcionariamp tantachasipjjañajatakiw mayipjjetäna.
Uka funcionariajj akham sistaniwa sasaw amuyapjjayäta: “Gobiernojj impuestot qollq mayipktam uk mä parte churapjjam, ukhamat askichasjjañapataki” sasa. Ukampis uk lurañajj janiw leyirjamäkänti, mä euro qollqeks churapjjeriskayäta ukhajja, janiw Jehová Diosatakejj walïkaspänti. Jilat kullakanakajj Diosan gobiernopar apoyañatakiw donacionat qollqep churapjjäna, ukhamajj uka qollqejj janiw gobiernotakïkaspänti (Mat. 22:21). Ukampis Tribunalar respetapjjatajatwa ukar sarapjjayäta.
2010 maranwa Tribunal Europeo de Derechos Humanos uka nayraqatankaskta, abogadöpki uka mä qhawqha jilatanakaw nayamp chikäsipki.
Uka tantachäwejj Tribunal Europeonkir mä salapanwa apasïna. Kunatï qalltan amuyapkayäta ukapuniw pasäna, funcionariajj ‘Francia markankir sucursalajj impuesto mä parte churañapapuniwa’ sasaw säna. Ukjjarojj akham sasaw jisktʼapjjayäta: “Gobiernojj cuatro millones y medio euro qollqwa banconkir cuentat apaqjjapjjetu, ¿uk yatiyätati?” sasa. Janipuniw ukham jisktʼañ amtapkayätti.
Funcionariajj uk istʼasajj qʼalpun mayjtʼasïna, janiw gobiernon sucursalar qollqe apaqatap yatkänti. Gobiernonkir abogadonakajj “ukhamapunïskiwa” sasin sapjjäna ukhajja, funcionariajj colertʼasïnwa, jupanakar toqenoqasajj ukharuw tantachäw suytʼayäna. Janitï Jehová Diosäkaspänjja, janiw ukajj paskaspänti, ukwa amuyayäta. Uka tantachäwit wali kusisitaw sarjjapjjayäta, ¡kunatï paskäna ukajj janipuniw creyiñjamäkänti!
30 de junio de 2011 maranjja, Tribunal Europeon apaskäna uka juicion atipjapjjayätwa. Janiw kuna impuestsa pagjjapjjañajäkänti, Gobiernorojj interesamp qollqe nanakar kuttʼayapjjañapatakiw mayipjjäna. Ukajj jichhürkamaw Francia markankir jilat kullakanakarojj yanaptʼaskaki. Funcionariar jisktʼapkayäta ukajja, Davidajj Goliat jachʼa jaqer qalamp qʼorawtʼkäna ukamp sasïnwa, juicion atipjañatakiw yanaptʼapjjetäna. Kuntï Davidajj Goliat chachar siskäna ukhamapunïnwa, “nuwasiñajj Jehová Diosankiwa” (1 Sam. 17:45-47).
Janiw uka mä juicionak atipjasiwaykiti. Gobiernonakasa wali chʼamani religionanakas jiwas contras saytʼawayapkchejja, 1.225 juicionakwa Testigonakajj atipjawaytanjja, 70 markanakankir jachʼa tribunalanakapansa, tribunal internacionalanakans atipawayaraktanwa. Ukanakajj derechonakas arjjatañatakiw yanaptʼistu, Diosan markapjam suma uñtʼatäñataki, predicañataki, akapachan utjki uka fiestanakar jan mitisiñataki, wilamp jan uchayasiñatakiw yanaptʼistu.
Nayajj Jehová Diosan Testigonakapan central mundialapanwa serviyäta (Nueva York, Estados Unidos), kunjamatsa abogadöpkäna uka jilatanakampejj Europan apaskäna uka juicionkayäta uk jichhajj cuenttʼapjjäma.
DIOSAR TAQE CHUYM SERVIR TATAJ MAMAJAW UYWAPJJETÄNA
George papitujasa Lucille mamitajas Galaad escuelaruw clase 12 ukar sarapjjatayna. 1956 maran Etiopía markan servisipkäna ukhaw nayajj nasiyäta. Biblian Felipe yatiyirit parlatap laykojja, Philip sasaw sutiyapjjetäna (Hech. 21:8). Mä mara qhepatjja, uka markan jan predicasiñapatakiw Gobiernojj jarkʼäna. Ukhamïpan familiajajj jamasatwa tantachäwinakar sarapjjerïna, predikiris sarapjjarakirïna, ukajj nayar wal gustitäna, jiskʼäkchiyäta ukhas uk sum amuyayäta. Ukampis 1960 maranjja, markat sarjjañatakiw obligapjjetäna.
1959 maranjja, Nathan Knorr (chʼeqa toqena) jilataw Adís Abeba (Etiopía) markan familiajar visitaski.
Wichita (Kansas, Estados Unidos) markaruw sarjjapjjayäta. Papit mamitajajj misioneronakjamaw taqe chuym predicasipkakïna, ukajj wali yateqaskañänwa. Biblian yatichäwinakaparjamaw sarnaqapjjäna, Diosar taqe chuym serviñatakiw Judy kullakajarusa, Leslie sullkajarusa, nayarus chʼamañchapjjetäna, kimspachaniw Etiopía markan nasipjjayäta. 13 maraniw bautisasta, kimsa maranak qhepatjja, Perú markankir Arequipa markaruw sarjjapjjayäta, ukan predicañatak yanaptʼajj wal munasïna.
1974 maranjja, 18 maranïkayäta ukhaw Perú markankir sucursalajj nayampiru pusi jilatanakampir precursor especialat uttʼayapjjetäna. Cordillera central de los Andes uksaruw predicañatak khitapjjetäna. Ukan quechua ukat aymara parlirinakaruw predicapjjayäta. Mä autonipjjayätwa, viajisajj ukanwa ikipjjarakirïta, uka autorojj Arca sasaw sutiyapjjarakiyäta. Quechua ukat aymara parlirinakarojja, Jehová Diosajj niyaw pisin jakasiñsa, usunaksa, jiwañsa chhaqtayjjani sasaw Bibliamp yatiyapjjerïta (Apoc. 21:3, 4). Jupanakat waljaniw Diosan serviripäjjapjje.
Arca sat auto, 1974 marana.
CENTRAL MUNDIALARUW INVITAPJJETU
1977 maranjja, Albert Schroeder jilatajj Perú markaruw jutäna. Jupajj Cuerpo Gobernante taypinkänwa, central mundialan serviñatak solicitud phoqantañajatakiw jupajj mayitäna, ukatwa phoqantayäta. Mä jukʼa tiempotjja, 17 de junio de 1977 maranwa Brooklyn markankir Betelan serviñ qalltayäta. Utanak Qʼomachaski ukat Mantenimiento luraski uka departamentonakanwa pusi maranakajj trabajiyäta.
Casarasipkta uka uru, 1979 marana.
Elizabeth Avallone kullakarojja, junio de 1978 maran Nueva Orleans (Luisiana) markan apaskäna uka asamblea internacionalanwa uñtʼayäta. Awk taykapasa nayan awk taykajasa, taqe chuymaw Jehová Diosar servipjjäna. Elizabeth kullakajj pusi maraw precursora regularäjjäna, janiw jupajj precursoräñ jaytañ pienskänti. Asamblea qhepat parlasipkakiyätwa, ukat paninejj munasjjapjjayätwa. Ukatwa 20 de octubre de 1979 maran casarasisajj Betelan serviñ qalltapjjayäta.
Brooklyn Spanish congregacionankapjjayätwa, ukankir jilat kullakanakajj wal munasipjjetäna. Uka qhepat yaqha kimsa congregacionanakanwa servipjjayäta, ukhamarakiw ukankirinakajj munasipjjetäna, Betelan servisipkakiñajatakis chʼamachtʼapjjarakitänwa. Chuymankipstat awk taykanakajar uñjañatak yanaptʼapjjatapatjja, amigonakajarusa familiaranakajarus wal yuspärapjjta.
1986 maran Brooklyn Spanish congregacionar sarapkäna uka betelitanaka.
JEHOVÁ DIOSAN MARKAPARUW LEYINAKAMP ARJJATAYÄTA
Enero de 1982 maranjja, jan suykayäta uka asignación churapjjetäna. Departamento de Asuntos Legales ukaruw Betelan asignapjjetäna. Kimsa mara qhepatjja, abogadöñajatakiw universidadar khitapjjetäna. Estudiaskayäta ukhajj Jehová Diosan Testigonakapajj tribunalanakan atipjapjjatapatwa yatjjatayäta, ukajj Estados Unidos markansa yaqha markanakansa, jaqenakan derechonakap arjjatasiñapatakiw yanaptʼawayi, uk yatiñajj wal kusisiyitäna. Clasenakanjja walja horanakaw uka juicionakat yatjjatapjjayäta.
1986 maran 30 maranïkayäta ukhajja, Departamento de Asuntos Legales ukanwa superintendentet uttʼayapjjetäna. Waynäkasin uka wakiskir asignación nayar confiyapjjatapat wals kusiskchiyätjja, kuntï lurañajäkäna uk yatisajj llakisiyätwa.
1988 maranwa abogadöjjayäta, ukampis universidadar saratajajj Diosar serviñan aynachtʼayitänwa. Universidadajj maynirojj jukʼamp yateqaskakiñatakiw chʼamañchaspa, ukar jan saririnakarojj janis kunäpkaspa ukhamwa maynejj uñj-jjaspa. Ukampis esposajaw Jehová Diosamp wasitat sum apasiñatak yanaptʼitäna. Walja toqenakat yatiñajj janiw taqe kunat sipans wali importantëkiti, jan ukasti Jehová Diosan amigopäña, jupar munasiña, ukat servirinakapar munasiñaw jukʼamp importantejja.
SUMA YATIYÄWINAK YATIYASIÑAPATAKEJJ LEYINAKARJAMAW ARJJATAPJJTA
Abogadöjjayäta ukhajja, leyinakamp yanaptʼañatakisa, Jehová Diosan markapar tribunalanakan arjjatañatakis wakichtʼatäjjayätwa. Ukanakan yanaptʼañajj wal kusisiyitäna, ukampis Jehová Diosan markapan cambionak utjatapat awisajj chʼamakïnwa. Sañäni, 1990 maranjja qellqatanakasat jan qollqe mayisjjañapatakejj instruccionanak wakichapjjañajatakiw mayipjjetäna. Ukat aksarojj Testigonakajj jan qollq mayisaw qellqatanak churjjapjje. Ukhamätapat Betelansa congregacionanakans trabajojj minustʼänwa, janiw impuestonak churañas wakisjjänti. Yaqhepanakajj uka cambio utjatapat qollqetsa predicacionans aynachtʼañäniwa sasaw amuyapjjäna. Ukampis ukajj janiw paskänti. Jichhajj 1990 marat sipans jilat kullakanakajj mä ukhampiw jiljjattawayi, jaqenakas jan kun pagasaw Bibliat apstʼat qellqatanakanïpjjaspa. Ukham cambionakajj Jehová Diosana ukat suma phoqeri amuyasir esclavon yanaptʼapampikiw lurasispa, ukwa qhan amuyawayta (Éx. 15:2; Mat. 24:45).
Jiwasan abogadonakasan yanaptʼapat sipansa, jilat kullakanakasan suma chuymanïpjjatapatwa juicionakan atipapjjayäta. Sañäni, Cuba markan 1998 maran apaskäna uka wali uñtʼat asamblearojja, Cuerpo Gobernantenkirinakat kimsaniw esposanakapamp sarapjjäna. Nanakan arunakajat sipansa, jupanakan munasirïpjjatapata respetomp parlapjjatapatwa autoridadanakajj jan politicar mitisitas jukʼamp sum amuyapjjäna.
Suma yatiyäwinak leyinakarjam arjjatañatakejja, awisajj tribunalanakar sarañaw wakisi (Filip. 1:7). Sañäni, Corea del Sur ukat Europanjja, cuartelar jan sarañatak derechonïpjjataj janiw reconosiñ munapkänti, ukatwa Corea del Sur markankir 19.000 jilatanakajj cuartelar jan sarañ munapjjatapat carcelan llawintat uñjasipjjäna. Uka pachparakiw Europankir markanakan niya 18.000 jilatanakampejj pasäna.
7 de julio de 2011 urojj Tribunal Europeo de Derechos Humanos ukanjja, Bayatyan contra Armenia sat juiciow tukuyasïna, ukanjja maynejj cuartelar sarañ lantejj yaqha luräwimpiw phoqaspa sasaw Europankir markanakarojj mayisïna. Mä tiempo qhepatjja, 28 de junio de 2018 urojj Tribunal Constitucional de Corea del Sur ukankirinakajj uka pachpa amtaruw puripjjarakïna. Uka markanakankir wayna jilatanakatï cuartelar sarasipkakispäna ukhajja, janiw uka amtar puriskaspänti.
Central mundialansa, sucursalanakansa, departamento de asuntos legales ukankirinakas Diosan markapar arjjatañatakejj jan inaktʼasaw trabajapjje. Jilat kullakanakajj autoridadanakamp jarkʼat uñjasipjje ukhajja, jupanakar arjjatañajj wali kusiskañawa. Mä juicion atipjsnawa, awisajj janirakiw atipjksnati, ukampis marka sarayirinakaru, reyinakaru, jaqenakaruw uka juicionakan Diosat yatiyasi (Mat. 10:18). Juezanakasa, autoridadanakasa, noticia churirinakasa, juicionkir taqe jaqenakasa, Bibliat liytʼapjjta ukhajj taqeniw istʼapjje, ukat documentonakar textonak qellqtʼapkta ukanak mun jan munaw liytʼapjjaraki. Ukhamätapatwa suma chuymani jaqenakajj Testigonakar uñtʼapjje, ukat kuntï jiwasajj creyktan ukajj Bibliarjamätapwa amuyapjjaraki, ukhamatwa yaqhepajj Testigöjjapjjaraki.
JEHOVÁ DIOSARUW YUSPÄRTA
Aka 40 maranakajja, aka oraqpachanwa walja sucursalanakar yanaptʼawayta, jachʼa tribunalanakansa autoridadanak nayraqatans arjjatawayarakta. Central mundialan Departamento de Asuntos Legales ukan yanapirinakarusa, aka oraqpachan Departamento de Asuntos Legales ukan yanapirinakarus wal munasta, wal respetarakta. Jakañ vidajan walja bendicionanakwa katoqawayta, ukatwa wal kusista.
Elizabeth esposajajj walinsa jan walinsa, wali munasiñampiw aka 45 maranakajj yanaptʼawayitu. Wali usutätapat cuerpopajj janiw yaqha usunakat jarkʼaqasiñ puedkiti, uka usojj jan chʼamaniw jupar tukuyaraki. Ukhamäkchisa yanaptʼaskakituwa, ¡wali musparkañawa!
Chʼamanïñatakisa atipjañatakis Jehová Diosakiw yanaptʼistaspa, ukwa esposajampejj uñjawayapjjta. Kunjamtï Davidajj siskänjja, “Jehová Diosaw markaparojj chʼam churi” (Sal. 28:8). Cheqas “nuwasiñajj Jehová Diosankiwa”.