Jehová Diosajj wal munastamjja

1. ¿Kunatsa Jehová Diosar jakäwim katuyasta? (Fotonak uñjjattʼarakïta).

¿JEHOVÁ DIOSAR jakäwis katuyaskayätan uka urut amtasisktanti? Jehová Diosarojj akham sispachayätanwa: “Juman munañam lurañapuniw jakäwijan nayrankani, ‘taqe chuymajampi, taqe almajampi, taqe amuyujampi, taqe chʼamajampiw munasïma’” sasa (Mar. 12:30). Diosar uñtʼjjatasata, jupar wal munasitas laykuw jakäwis jupar katuyasiñ amtpachayätanjja, ukat aksarojj jukʼampiw Jehová Diosar munasjjpachätanjja. Maynitï “¿cheqpachapunit Jehová Diosar munasta?” sasin jisktʼistaspa ukhajj jankʼakiw akham sissna: “¡Jïsa, wal jupar munasta! Janiw khitirus juparjam munaskti” sasa.

2, 3. ¿Kuna toqetsa jan payachasiñasäki? (Jeremías 31:3). ¿Kunsa aka yatichäwin yatjjatañäni?

² Inas maynejj “¿Jehová Diosajj cheqpachapunit munaspachätam?” sasin jisktʼchistaspa. Ukham satajj inas jan kamsañs puedjjsnati, kuna laykutejj Jehová Diosajj janis munaskistaspa ukham amuyasajj payachasjjaksnawa. Wawäkasin munasiñamp jan uñjat mä kullakat parltʼañäni, jupajj akham siwa: “Nayajj Jehová Diosar wal munasta, ukampis walja kutiw jupajj nayar munaspachïtuti sasin payachasta” sasa. Ukampis Jehová Diosan jiwasar munasitapat jan payachasiñatakejj ¿kunas yanaptʼistaspa?

³ Jehová Diosajj wal munasistu, jupajj uka munasiñapat jan payachasiñaswa muni (Jeremías 31:3 liytʼäta). Cheqas jupaw amigosäñ wal munäna, ukatwa jupan ukar irpanirakistu. Kunapachatï jakäwis jupar katuyasisin bautisaskayätan ukhajja, jiwasar munasiñat jan jaytjañwa arsüna, ukajj mä suma regalopuniwa. Ukhamajj Jehová Diosajj wal munasistu, janipuniw jaytjkistaniti, ukhamarus taqe servirinakaparusa jiwasarus wali valoranit uñjarakistu (Mal. 3:17). Jehová Diosajja apóstol Pabljam munasiñapat jan payachasksna ukwa muni, Pablojj akham sänwa: “Janiw nayajj Diosan munasiñapat payachaskti. Ukhamajj janiw jiwañasa, ni jakañasa, ni angelanakasa, ni gobiernonakasa, ni kunanakatï jichhajj utjki ukanakasa, ni jutkani ukanakasa, ni chʼamanakasa, ni alayankki ukasa, ni manqhankki ukasa, ni kuna luratanakas Diosan munasiñapat apaqkistaspati” sasa (Rom. 8:38, 39). Aka yatichäwinjja, Jehová Diosan jiwasar munasitapat kunatsa jan payachasiñasäki, ukat uka toqet jan payachasiñatakejj kunsa lurañasa ukanakatwa yatjjatañäni.

JEHOVÁ DIOSAN JIWASAR MUNASITAPAT JAN PAYACHASIPJJAÑÄNITI

4. ¿Supayajj kun amuyañassa muni, ukat kunjamsa jupa contra saytʼsna?

⁴ Jehová Diosan jiwasar munasitapat jan payachaskañäni ukhajja, Supayan ‘engañjir trampanakaparojj’ janiw jaltʼkañäniti (Efes. 6:11). ¿Kunjamsa Supayajj Diosat jitheqtayañ munistu? Jehová Diosajj janis munaskistaspa ukham amuyañaswa muni, ukampis ukajj janiw cheqäkiti, jupajj wal munasistu. Bibliajja Supayajj mä leonar uñtasitawa sasaw qhanañchi (1 Ped. 5:8, 9). Jilapartejja leonanakajj debiläpki, jan jarkʼaqerinïpki uka animalanakaruw atacapjje. Supayajj niya ukhamarakiw jiwasar atacañ munistu. Kunapachatï debiläktan, qaritäktan, nayra tiempon jan walinakan uñjasitasat desanimatäktan, problemanakan uñjasis llakitäktan, jan ukajj kunas jutïrin pasani sasin llakisktan ukhaw jilpachajj atakistu (Prov. 24:10). Ukhamajj Supayan trampanakapar jan jaltʼañatakejja, jupa contraw saytʼasiñasa, Jehová Diosan munasiñapat jan payachasiñatakiw wal chʼamachasiñasaraki (Sant. 4:7).

5. Jehová Diosan jiwasar munasitapa ukat wali valoranit uñjatap amuyañasajj ¿kunatsa wali wakiskirejja?

⁵ Jehová Diosan jiwasar munasitapat jan payachaskañäni ukhajja, jukʼampiw jupar jakʼachasiñäni. Kunatsa ukham sistan uk jichhajj amuytʼañäni. Jehová Diosajj munasir chuyman lurtʼawayistu, ukatwa mayninakar munastanjja, ukat jupanakajj jiwasar munasipjjestaspa ukwa munaraktanjja. Kunapachatï maynejj munasiñamp uñjistu ukhajja, jiwasajj ukhamarakiw jupar munasiñamp uñjtanjja. Jehová Diosampejj ukhamarakiwa, jiwasar wal munasitapa, valoranit uñjatap amuyañäni ukhajja, jukʼampiw jupar munasirakiñäni (1 Juan 4:19). Ukhamarus jupar jukʼamp munasiñäni ukhajja, jukʼampirakiw jupajj munasistani. Bibliajj akham siwa: “Diosar jakʼachasipjjam, jupajj jumanakar jakʼachasirakiniwa” sasa (Sant. 4:8). Jichhajj kunsa Jehová Diosan jiwasar munasitapat jan payachasiñatakejj lursna ukwa yatjjatañäni.

JEHOVÁ DIOSAN JIWASAR MUNASITAPAT JAN PAYACHASIÑATAKEJJ ¿KUNSA LURSNA?

6. Jehová Diosan jiwasar munasitapat payachasstan ukhajja, ¿kunsa lursna?

⁶ Kutin kutiniw Jehová Diosar orasiñasa (Luc. 18:1; Rom. 12:12). Jehová Diosarojj “qhawqsa munasista uk amuyañatak yanaptʼita” sasin inas urun walja kuti orasiñasächispa. Awisajja, Jehová Diosajj janis munaskistaspa ukhamwa chuymasajj juchañchistaspa, ukampis Jehová Diosajj chuymasat sipans jukʼamp jachʼawa (1 Juan 3:19, 20). Jiwasat sipansa Jehová Diosajj sum uñtʼistu, kunja suma chuymanïtansa uks yatirakiwa (1 Sam. 16:7; 2 Crón. 6:30). Ukhamajj kunjamas jikjjatastan uk jupar cuenttʼañasawa, ukat nayar munasitamat jan payachasiñatak yanaptʼita sasaw mayisiñasaraki (Sal. 62:8). Ukatsti mayisitasarjam lurarakiñäni. Kunanaksa lursna uk jichhajj mä qhawqha uñjañäni.

7, 8. Jehová Diosan jiwasar munasitapat jan payachasiñatakejja, ¿kunjamsa Salmonkir textonakajj yanaptʼistu?

⁷ Jehová Diosan aruparuw confiyañasa. Espíritu santon yanaptʼapampiw chachanakajj Biblia qellqapjjäna, ukhamajj kunatï Jehová Diosat Biblian qhanañchaski ukajj cheqawa. Diosajj qhawqsa jiwasat llakisi uk akham sasaw Davidajj qellqäna: “Jehová Diosajj khitinakatï chuyma pʼakintatäpki ukanakan jakʼapankiwa, jupaw sinti desanimatäpki ukanakarojj salvaraki” sasa (Sal. 34:18). Wali llakit jikjjatasisajja, inas jiwasajj janiw khitis entiendkitaspati jan ukajj janiw khitis yanaptʼkitaspati sasin amuysna, ukhaman uñjasisaw yanaptʼa necesittanjja, uk Jehová Diosajj sum yati, ukatwa jupajj sapak jan jaytjkistaniti. Yaqha horasan Davidajj akham sarakïnwa: “Jachanakajsa lipʼichit lurat wayaqamaruy apthapim” sasa (Sal. 56:8). Wali jaya lugaranakar viajirinakajja, lipʼichit lurat wayaqanakaruw um apasipjjerïna, uka um wali valoranitwa uñjapjjerïna, qʼal tukstañapkamaw umsupjjarakirïna. Jehová Diosajj ukhamarakiw jachanakas wali valoranit uñji, lipʼichit lurat mä wayaqarus apthapkaspa ukhamawa, ukhamatwa jiwasat wal llakisitap uñachtʼayi. Cheqas sinti jan walinakan uñjasktan ukhajja, Jehová Diosajj wal chuym usuyasi. Davidajj Jehová Diosar akham sarakïnwa: “Taqe thakinakajwa jumajj uñtʼtajja” sasa (Sal. 139:3). Jehová Diosajj taqe thakinakaswa uñji, mä arunjja taqe kunanaktï lurktan ukanakwa uñji, ukampis suma luratanakasakwa uñji (Heb. 6:10). Taqe kunanaktï jupar kusisiyañatak lurktan ukanakajj jupatakejj wali valoraniwa.a

⁸ Uka chʼamañchtʼkir textonakampejja, akham sasas Jehová Diosajj siskistaspa ukhamawa: “Walpun jumar munasma, jumat llakisiraktwa” sasa. Ukampis kunjamtï yatjjataniwayktanjja, Jehová Diosajj janis munaskistaspa ukham amuyañaswa Supayajj muni, ukatwa Jehová Diosan munasiñapat payachaskañäni ukhajj akham sasin jisktʼasiñasa: “¿Khitirus creyëjja: ‘Kʼarin awkipäki’ uka Supayaruti, jan ukajj ‘cheq parlir’ Jehová Diosarucha?” sasa (Juan 8:44; Sal. 31:5).

9. Jupar munasipki ukanakarojj ¿kunsa Jehová Diosajj arsuwayi? (Éxodo 20:6).

⁹ Jupar munasipki ukanakarojj kunjamsa Jehová Diosajj uñji uka toqetwa lupʼiñasa. Sañäni, Jehová Diosajj Moisesarusa israelitanakarus kamsänsa uka toqetwa lupʼsna (Éxodo 20:5, 6 liytʼäta). Munasipkitu ukanakarojja, munasiñat janipuniw jaytjkäti sasaw Diosajj arsuwayi. Jan jaytjasirïtap laykojja, jupar munasipki ukanakarojj munasiñ uñachtʼayaskakiniwa (Neh. 1:5). Ukhamajj Jehová Diosan munasiñapat payachasiñäni ukhajja, akham sasaw jisktʼasiñasa: “¿Jehová Diosarojj munastti?” sasa. Jiwasatï jupar munasstan, jupar kusisiyañatak chʼamachasirakstan ukhajja, jupajj ukhamarakiw jiwasar wal munasistani (Dan. 9:4; 1 Cor. 8:3). Mä arunjja, jiwasatï Jehová Diosar munasitasat jan payachaskañäni ukhajja, janirakiw jiwasar munasitapat payachaskañäniti, ukhamïpan janipuniw jupajj jaytjkistaniti.

10, 11. Jesusajj jiwasanak layku jakäwip loqtasiwayki ukarojj ¿kunjam uñjañassa Jehová Diosajj muni? (Gálatas 2:20).

¹⁰ Jesusajj juchampit jiwañampit kutsuyawaykistu uka toqetwa lupʼiñasa. Jesusajj jaqenak layku jakäwip churañatakiw aka oraqer jutawayi, ukajj Jehová Diosan mä jachʼa regalopawa (Juan 3:16). Ukampis Diosajj janiw Yoqaparojj taqe jaqenak layku jiwañapatakik khitaniwaykiti, jan ukasti juma layku jiwañapatakiw khitaniwayaraki. Apóstol Pablot amuytʼañäni: janïr cristianökasajja, jupajj sinti jan walinakwa luräna, qhepat juchar jan purtʼasiñatakiw chʼamachasiskakiñapäna (Rom. 7:24, 25; 1 Tim. 1:12-14). Ukhamäkchïnsa Jehová Diosajj jupa layku Yoqapar khitanitapwa Pablojj amuyäna (Gálatas 2:20 liytʼäta). Apóstol Pablojja Diosan espíritu santopan yanaptʼapampiw Gálatas 2:20 textonkir arunak qellqäna, jiwasar yatichañatakiw Diosajj uka arunak Bibliar qellqayawayi (Rom. 15:4). Juma layku Jesusan jiwatap amuyañamwa Diosajj munaraki. Ukham amuyasajj janiw Jehová Diosan jumar munasitapat payachasjjätati.

¹¹ Jiwasanak layku jiwañapatak Yoqapar khitanitapatjja, walpun Jehová Diosar yuspärtanjja. Ukampis Jesusajj janiw uka laykuk aka oraqer jutkänti, jan ukasti Diosat kunatï cheqäki uk yatichiriw jutarakïna, ukanakat mayajj qhawqsa jaqenakar munasi ukänwa. Uk jichhajj uñjañäni (Juan 18:37).

JEHOVÁ DIOSAN JIWASAR MUNASITAPWA JESUSAJJ YATICHÄNA

12. ¿Kuntï Jesusajj Jehová Diosat siskäna ukat kunatsa jan payachasksna?

¹² Jesusajj aka oraqenkkäna ukhajja, Jehová Diosat yatichañajj jupar wal gustäna (Luc. 10:22). Niyakejjay Awkip jakʼan walja waranqa maranak jakchïnjja, juparojj wali sum uñtʼi. Ukhamajj kuntï Awkipat siski ukan cheqäskapunitapat janiw payachasksnati (Col. 1:15). Jehová Diosajj kunja munasiñampis alajjpachankir wawanakaparusa aka oraqenkir wawanakaparus uñji uk Jesusajj sum uñjäna. Jichhajja Jehová Diosajj qhawqsa jaqenakar munasi uka toqet kunsa Jesusajj yatichäna uk uñjañäni.

13. ¿Jesusajj Awkipar kunjam uñjañassa muni?

¹³ Jesusajja wali munasir Awkisarjam Jehová Diosar uñjsna ukwa muni. Evangelionakanjja Jesusajj 160 jila kutiw Jehová Diosarojj ‘Awki’ sasin säna. Discipulonakaparojja Jehová Diosaw ‘alajjpachankir Awkimajja’ sasaw sarakirïna (Mat. 5:16; 6:26). Jesusajj janïr aka oraqer jutkäna ukhajja, servirinakapajj Jehová Diosarojj “Taqe Chʼamani”, ‘Jachʼa Dios’, ‘Jachʼa Lurir Dios’ sasaw sapjjerïna. Ukampis Jesusajj Awki sasaw Jehová Diosarojj sapa kut sirïna. ¿Kunsa Jesusajj ukampejj yatichañ munaskäna? Kunjamtï mä wawajj wali munasir awkipar jakʼachaskejja, ukhamarak jiwasajj Jehová Diosar jakʼachassna ukwa Jesusajj yatichañ munaskäna. Kuna pä horasanakansa Jesusajj ‘Awki’ sasin Jehová Diosar säna uk jichhajj yatjjatañäni.

14. ¿Jehová Diosatak wali valoranïtas kunjamsa Jesusajj qhanañchäna? (Mateo 10:29-31; dibujo uñjjattʼarakïta).

¹⁴ Mateo 10:29-31 (liytʼäta) textonkir Jesusan arunakapat amuytʼañäni. Jesusajja sapa gorrión jamachʼejj kawkjankaskisa uk Jehová Diosajj sum yati sasaw säna. Uka jiskʼa jamachʼinakajj janiw Diosar adorapkiti ni munasipkisa, ukhampachas Diosajj jupanakat wal llakisi. Ukampis jiwasajj munasiñatwa Jehová Diosar adortanjja, ukhamajj ¿janit Diosajj uka jiskʼa jamachʼinakat sipans jiwasat jukʼamp llakiskpacha? Ukatsti Jesusajj ñikʼutanakamas taqpach jakhutarakiwa sasaw sarakïna, uk yatitapajj qhawqsa Diosajj jiwasat llakisi ukwa uñachtʼayarakistu. Ukhamajj Jesusajj Jehová Diosatak wali valoranïtas amuyañaswa muni.

15. ¿Kunsa Juan 6:44 textojj Jehová Diosat yatichistu?

¹⁵ Yaqha horasan Jesusajj ‘Awki’ sasaw Jehová Diosar sarakïna, ukajj Juan 6:44 (liytʼäta) textonkiwa. Uka textorjamajja, alajjpachankir Awkisaw jupar uñtʼañasatakisa munasiñasatakis yanaptʼawayistu. ¿Kunatsa uk luräna? Kuna laykutejj suma chuymanïtaswa uñjäna (Hech. 13:48). Kunapachatï Jesusajj Juan 6:44 textonkir arunak arskäna ukhajja, inas Jeremías 31:3 textonkir Jehová Diosan arunakapat aytaskchïna, ukanjja Diosajj markapar akham sänwa: “Nayajj munasiñat jan jaytjasirïtaja[twa] nayan ukar irpansma” sasa (Jer. 31:3; Oseas 11:4 liytʼarakïta). Ukhamajj Jehová Diosajj munasiskakistuwa, janisay jiwas pachpajj suma chuymanïtas amuyaskstanjja, jupajj suma chuymanïtas uñjaskakiwa.

16. 1) ¿Kunsa Jesusajj yatichistu, ukat kunatsa jupar confiysna? 2) Jehová Diosajj mä awkjam jiwasar cuidatapat jan payachasiñatakejja, ¿kunas yanaptʼistani? (“Mä awkjamarakiw wali sum cuidistu” sat recuadro liytʼarakïta).

¹⁶ Jesusajj akham siskistaspas ukhamawa: “Jehová Diosajj janiw nayan Awkijakïkiti, juman Awkimarakiwa. Jupajj wal munastamjja, jumats walpun llakisiraki” sasa. Ukhamajj Jehová Diosajj nayar munaspachïtuti sasin payachaskañäni ukhajja, Jesusan arunakapatwa amtasiñasa, kuna laykutejj jupajj cheqpunwa parli, Jehová Dios Awkisarus sum uñtʼaraki (1 Ped. 2:22).

JAN PAYACHASIÑATAK CHʼAMACHASISKAKIÑÄNI

17. ¿Kunatsa Jehová Diosan jiwasar munasitapat jan payachasiñatak chʼamachasiskakiñasa?

¹⁷ Kunjamtï yatjjataniwayktanjja, Supayajj mä jan wali enemigowa, kunayman toqenakatwa Jehová Diosat jitheqtayañ munarakistani. Jupajj janis Jehová Diosajj munaskistaspa ukham amuyayañwa munistu, ukatwa Jehová Diosan munasiñapat jan payachasiñatak chʼamachasiskakiñasa. Ukhamajj ¡janipun Supayamp engañjayasipjjañäniti! (Job 27:5).

18. ¿Jehová Diosan jiwasar munasitapat jan payachasiñatakejj kunanakas yanaptʼistaspa?

¹⁸ Aka yatichäwinjja, kunanakas Jehová Diosan jiwasar munasitapat jan payachasiñatak yanaptʼistaspa ukanakwa mä qhawqhanak yatjjatawaytanjja. Sañäni, “qhawqsa jumajj munasista uk amuyañatak yanaptʼita” sasaw Diosar orassna, qhawqsa jupajj munasistu uk uñachtʼayir textonakatwa lupʼiraksna. Jupar munasipki ukanakarojj munasirakiniwa, ukwa amtañasa. Jesusajj naya laykuw jiwawayi sasaw amuyañasa. Ukat kunjamtï Jesusajj siskänjja, Jehová Diosajj Awkisawa, uk janipuniw armañasäkiti. Ukhamajj ukhamtï lurañänejja, “¿Jehová Diosajj cheqpachapunit munaspachätam?” sasin jisktʼapjjestani ukhajj jankʼakiw akham sañäni: “¡Jïsa, jupajj munasituwa! Jupar munasiñatakejj nayajj sapüruw chʼamachasirakta” sasa.